ماسەلەگە جەرگىلىكتى بيلىك پەن پروكۋرورلار ارالاستى. 

وسى جىلدىڭ ءساۋىر ايىندا پاۆلودار قالاسىنداعى اۋەجاي جۇمىسى ۋاقىتشا توقتاعان بولاتىن. مۇندا ۇشۋ-قونۋ جولاعىن جاڭعىرتۋ جۇمىستارى قولعا الىندى. بۇل ۇشۋ سەرتيفيكاتىن ۇزارتۋ ءۇشىن كەرەك، دەپ حابارلايدى inbusiness.kz تىلشىسى. 

بۇگىندە اۋەجاي مەملەكەتتىڭ يەلىگىندە بولعاندىقتان، ونى جاڭعىرتۋ جۇمىستارىنا قوماقتى قارجى قازىنادان قاراستىرىلىپ جاتىر. بىلتىر مەردىگەرمەن 16,4 ملرد تەڭگەگە كەلىسىمشارت جاسالعان-دى. بىراق بۇل قاراجات ءتيىستى جۇمىستاردى اتقارۋعا جەتپەي قالدى. بىلتىر بولىنگەن سوماعا جوسپارلى ءىستىڭ تەك 44%-ى ورىندالدى. قالعانىن جالعاستىرۋ ءۇشىن تاعى 9,3 ملرد تەڭگە كەرەك بولدى. سوندىقتان شارۋانىڭ ءبارى تۇرالاپ قالدى. قاجەتتى كولەمدەگى قارجى تەك قازان ايىندا تابىلدى.

پاۆلودار وبلىسى اكىمدىگىنىڭ ءباسپاسوز قىزمەتىنىڭ حابارلاۋىنشا، بۇل سوما ارنايى قوردان ءبولىنىپ، شوتقا ءتۇستى. ءسويتىپ، جۇمىستار جالعاساتىن بولدى. قايتا جاڭارتۋ جوباسى ۇشۋ-قونۋ جولاعىن 45 مەتردەن 60 مەترگە دەيىن كەڭەيتۋدى، قوزعالىس جولى مەن اۋەجاي پەررونىن قالپىنا كەلتىرۋدى، زاماناۋي جارىقتاندىرۋ، بەينەباقىلاۋ جانە درەناج جۇيەلەرىن ورناتۋدى قامتيدى. جۇمىستار اۋەايلاقتىڭ سايكەستىك سەرتيفيكاتىن ساقتاۋ قاجەتتىلىگىنە بايلانىستى ورىندالۋدا. باس مەردىگەر - "Kyrylys Group RK" جشس. جوبانىڭ جالپى قۇنى 16,4 ملرد تەڭگەنى قۇرايدى.

بولىنگەن قاراجاتتىڭ ەسەبىنەن جوبانى ىسكە اسىرۋ قارقىنىن ارتتىرىپ، 2026 جىلدىڭ شىلدە ايىندا تولىق اياقتاۋ جوسپارلانۋدا.

"جاڭارتىلعان ۇشۋ-قونۋ جولاعى ۇشۋ قاۋىپسىزدىگىن ارتتىرۋعا، ءارتۇرلى ساناتتاعى اۋە كەمەلەرىن قابىلداۋعا مۇمكىندىك بەرەدى. جوبانى ىسكە اسىرۋ ينۆەستيتسيا تارتۋعا جانە اۋە رەيستەرىنىڭ باعىتىن ۇلعايتۋعا جاعداي جاسايدى. بۇل ءوڭىردىڭ كولىك-لوگيستيكالىق الەۋەتىن نىعايتۋدىڭ ماڭىزدى كەزەڭى بولادى", – دەگەن ەدى پاۆلودار وبلىسىنىڭ اكىمى اسايىن بايحانوۆ. 

الايدا مۇنداي اۋقىمدى ءىس اتقارىلىپ جاتقان اۋەجايدىڭ قىزمەتكەرلەرى ءبىر ايدان استام ۋاقىت بويى جالاقى الا الماي قينالدى. امالى تاۋسىلعان قىزمەتكەرلەر "قاراشا ايىنىڭ ايلىعى قاشان بولادى؟" دەگەن ساۋالىن الەۋمەتتىك جەلىلەر ارقىلى قالدىرىپ، نەسيە تولەپ، بالا-شاعاسىنىڭ شىعىندارىن جابۋدا پروبلەمالار تۋىنداي باستاعانىن مالىمدەدى.

ابىروي بولعاندا بۇل ىسكە ەڭبەك دەپارتامەنتى مەن جولاۋشىلار كولىگى جانە اۆتوموبيل جولدارى باسقارماسى ارالاسىپ، ماسەلە وڭ شەشىمىن تاپتى. كۇنى كەشە "پاۆلودار اۋەجايى" اق-نىڭ 161 قىزمەتكەرى جالپى سوماسى 26,1 ملن تەڭگە بولاتىن جالاقىسىن الدى. ال پاۆلودار كولىك پروكۋرورىنىڭ قاۋلىسىمەن ۋاقىتىلى ايلىق تولەمەگەن كومپانيا اكىمشىلىك جاۋاپكەرشىلىككە تارتىلدى.

Abai.kz