سەنات قۇرىلىس كودەكسىنىڭ جانە ىلەسپە قۇجاتتىڭ جەكەلەگەن باپتارىن ماقۇلداماي جاڭا نورمالارمەن تولىقتىرۋ ارقىلى ماجىلىسكە قايتاردى. 

— قۇرىلىس كودەكسى — قازاقستان رەسپۋبليكاسىندا ساۋلەت، قالا قۇرىلىسى جانە قۇرىلىس قىزمەتىن جۇزەگە اسىرۋعا، ادام مەكەندەيتىن جانە تىرشىلىك ەتەتىن تولىققاندى ورتانى قالىپتاستىرۋعا، ەلدى مەكەندەردى، قونىسارالىق اۋماقتاردى جوسپارلاۋعا جانە دامىتۋعا، قۇرىلىس وبەكتىلەرىنىڭ ومىرلىك تسيكلىنىڭ بارلىق كەزەڭىندە ولاردىڭ قاۋىپسىزدىگىن قامتاماسىز ەتۋگە بايلانىستى قوعامدىق قاتىناستاردى رەتتەيدى. سەناتتا كودەكستى قاراۋ بارىسىندا تۇراقتى كوميتەتتەر تاراپىنان قولدانىستاعى زاڭناماعا سايكەستەندىرۋ بولىگىندە بىرقاتار وزگەرىس پەن تولىقتىرۋلار ەنگىزدى، — دەدى سەناتور سۇيىندىك الداشەۆ.

ونىڭ اتاپ وتۋىنشە، ساۋلەت، قالا قۇرىلىسى جانە قۇرىلىس ىستەرى جونىندەگى ۋاكىلەتتى ورگاننىڭ قۇزىرەتىنەن رەسپۋبليكالىق ماڭىزى بار قالالاردىڭ، استانانىڭ جانە وبلىستاردىڭ باس ساۋلەتشىلەرىن تاعايىنداۋدى كەلىسۋ جونىندەگى نورما، جەر كودەكسىنە سايكەستەندىرۋ ماقساتىندا اۋداندار اكىمدىكتەرىنىڭ قۇزىرەتىنەن جەر ۋچاسكەلەرىن بەرۋ قۇقىعى الىپ تاستالادى.

— قۇرىلىس وبەكتىلەرى بويىنشا جوبالاۋ-سمەتالىق قۇجاتتامانى ازىرلەۋ پروتسەسىن ۇيىمداستىرۋ مەملەكەتتىك ينۆەستيتسيالار ەسەبىنەن قارجىلاندىرىلاتىن قۇرىلىس وبەكتىلەرى ءۇشىن مىندەتتى بولىپ تابىلاتىن «ءبىر تەرەزە» قاعيداتى بويىنشا جوبالاردى ازىرلەۋ مەن ساراپتاۋدى ۇيىمداستىرۋعا ارنالعان پورتالدا جۇزەگە اسىرىلادى. سونداي-اق جەكە تۇرعىن ءۇي قۇرىلىسى اۋماعىندا الەۋمەتتىك، كولىك جانە ينجەنەرلىك ينفراقۇرىلىم وبەكتىلەرىن سالۋ مەن پايدالانۋدى قارجىلاندىرۋ جونىندەگى پايدالانۋشىنىڭ مىندەتىن الىپ تاستاۋدى كوزدەيتىن وزگەرىس ەنگىزىلەدى. بۇعان قوسا، مەردىگەردىڭ (باس مەردىگەردىڭ) مەنشىك يەسىمەن تەڭ دارەجەدە قۇرىلىس وبەكتىسىن پايدالانۋدان كەيىنگى كەزەڭگە (بۇزۋعا) قاتىستى شەشىم قابىلداۋ قۇقىعىن كوزدەيتىن نورما الىنىپ تاستالادى، ويتكەنى مەردىگەردىڭ قولدانىستاعى زاڭناماعا سايكەس مۇنداي شەشىمدەر قابىلداۋعا زاڭدى نەگىزدەرى جوق، — دەدى ول.

سونىمەن بىرگە سەناتوردىڭ اتاپ وتۋىنشە، سەل، كوشكىن جانە قار كوشكىنى قاۋپى مەن تاۋەكەلدەرى كارتالارىن قولدانۋعا باعىتتالعان ەرەجەلەردىڭ 2030 جىلعا دەيىن قولدانىلۋىن توقتاتا تۇرۋدى كوزدەيتىن نورمانى ناقتىلاۋ ۇسىنىلادى. ال ىلەسپە زاڭنىڭ ماقساتى — قازاقستان رەسپۋبليكاسىنىڭ زاڭنامالىق اكتىلەرىن قۇرىلىس كودەكسىنە سايكەستەندىرۋ، سونداي-اق مەملەكەتتىك قىزمەتتەر، سانيتارلىق-قورعاۋ ايماقتارى جانە تۇرعىن ءۇي قۇرىلىسىنا ۇلەستىك قاتىسۋ ماسەلەلەرىن رەتتەۋ جانە تاعى باسقالارى.

— زاڭدى قاراۋ بارىسىندا دا قولدانىستاعى زاڭناماعا سايكەستەندىرۋ بولىگىندە وزگەرىستەر مەن تولىقتىرۋلار ەنگىزىلدى. ونىڭ ىشىندە ادال ەمەس قۇرىلىس سالۋشىلار ءتىزىلىمىن ىسكە اسىرۋ تەتىگىن جان-جاقتى پىسىقتاۋ ماقساتىندا اتالعان نورمالاردىڭ قولدانىلۋىن 2026 جىلعى 1 شىلدەگە دەيىن توقتاتا تۇرۋ ۇسىنىلادى. جوعارىدا باياندالعانداردى ەسكەرە وتىرىپ، ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتى قازاقستان رەسپۋبليكاسىنىڭ «قازاقستان رەسپۋبليكاسى پارلامەنتىنىڭ كوميتەتتەرى مەن كوميسسيالارى تۋرالى» زاڭىنىڭ 29-بابىنىڭ 7) تارماقشاسىن باسشىلىققا الا وتىرىپ، قازاقستان رەسپۋبليكاسى كونستيتۋتسياسىنىڭ 61-بابىنىڭ 4-تارماعىنا سايكەس قازاقستان رەسپۋبليكاسى سەناتىنىڭ وتىرىسىنىڭ قاراۋىنا قازاقستان رەسپۋبليكاسىنىڭ قۇرىلىس كودەكسىن جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ساۋلەت، قالا قۇرىلىسى جانە قۇرىلىس ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىن ەنگىزە وتىرىپ، قۇرىلىس كودەكسىنىڭ جانە زاڭنىڭ جەكەلەگەن باپتارىن ماقۇلداماۋدى جانە كودەكس پەن زاڭدى اتالعان باپتاردىڭ جاڭا رەداكتسياسىن ۇسىنۋ ارقىلى ماجىلىسكە قايتارۋدى ۇسىنادى، — دەدى سەناتور.

كەشە پرەزيدەنت قۇرىلىس كومپانيالارىنىڭ جاۋاپكەرشىلىگىن كۇشەيتۋ قاجەت ەكەنىن ايتقان بولاتىن.

Abai.kz