ورتا سالماقتا WBO جانە IBF تۇجىرىمدارى بويىنشا الەم چەمپيونى جانىبەك ءالىمحانۇلى وزىنە قاتىستى تۋىنداعان دوپينگ داۋىنا بايلانىستى جانكۇيەرلەرىنە ۇندەۋ جولدادى.

بوكسشى دوپينگ سىناماسىنىڭ ۆ ۇلگىسىنىڭ قورىتىندىسى ءالى شىقپاعانىن اتاپ ءوتىپ، الەۋمەتتىك جەلىدە قولداۋ بىلدىرگەن كوپشىلىككە العىس ايتتى. ءالىمحانۇلى قيىن كەزەڭدە جانكۇيەرلەرىنىڭ سەنىمى مەن قولداۋى ۇلكەن رۋح بەرگەنىن جەتكىزدى. ونىڭ ايتۋىنشا، اسىرەسە وتانداستارىنىڭ تازا ەكەنىنە كۇمان كەلتىرمەي، قولداۋ تانىتۋى ەرەكشە دەمەۋ بولعان.

«شەتەلدىكتەر بۇل داۋعا قۋانىپ جاتقاندا، ءوز قازاعىمنىڭ ماعان قارسى شىقپاي، تازا ەكەنىمىزگە سەنگەنى جانىما دەمەۋ بولدى. مەن تەك جەڭىستى ساتتەردە عانا ەمەس، اۋىر كەزدە دە قاسىمنان تابىلاتىن ناعىز جاناشىر جانكۇيەر جيناعانىما قۋانىشتىمىن»، – دەپ جازدى ول.

Abai.kz