راتبەك قاجى نىسانبايۇلى 1940 جىلدىڭ قاراشاسىندا تۇركىستان وبلىسىندا دۇنيەگە كەلدى. قازپي-ءدىڭ تاريح فاكۋلتەتىن ءبىتىردى. 1964 جىلى بۇحاراداعى «مير-اراب» مەدرەسەسىن جانە بۇحارا پەداگوگيكالىق ينستيتۋتىن ءتامامدادى. 1969-1975 جىلدارى ليۆيا ۋنيۆەرسيتەتىنىڭ شاريعات جانە قۇقىق فاكۋلتەتىندە وقىپ، جوعارى ءدىني ءبىلىم الدى. راتبەك قاجى نىسانبايۇلى 1979 جىلدان باستاپ قازاقستاننىڭ قازيى بولدى.

1990 جىلدىڭ 12 قاڭتارىندا الماتىدا قازاقستان مۇسىلماندارىنىڭ ءى قۇرىلتايى ءوتىپ، قازاقستان مۇسىلماندارى ءدىني باسقارماسى قۇرىلدى. قمدب تاشكەنتتەگى ورتا ازيا جانە قازاقستان مۇسىلماندارى ءدىني باسقارماسىنان (سادۋم) ءبولىنىپ، دەربەس ءدىني باسقارما بولدى. قمدب-نىڭ العاشقى توراعاسى، باس ءمۇفتي بولىپ راتبەك قاجى نىسانبايۇلى سايلاندى.

راتبەك قاجى 2000 جىلعا دەيىن ءدىني باسقارمانى باسقاردى.

قازاقستان مۇسىلماندارى ءدىني باسقارماسىنىڭ توراعاسى، باس ءمۇفتي ناۋرىزباي قاجى تاعانۇلى مارقۇم بولعان راتبەك قاجى نىسانبايۇلىنىڭ وتباسىنا كوڭىل ايتتى.

«قازاقستاننىڭ تۇڭعىش ءمۇفتيى راتبەك قاجى نىسانبايۇلى حازىرەتىمىز قايتىس بولدى دەگەن قارالى حابار مەنىڭ دە جانىما قاتتى باتتى.

جۋىردا عانا راتبەك ۇستازدىڭ ۇيىندە بولىپ، احۋال سۇراسىپ، سۇحباتتاسقان ەدىك. اقساقالدىڭ ءدام-تۇزى تاۋسىلعان ەكەن. اللا الدىنان جارىلقاسىن. يمانى وزىنە سەرىك بولسىن.

ءوزىمنىڭ جانە قازاقستان مۇسىلماندارى ءدىني باسقارماسى ۇجىمى اتىنان مارقۇمنىڭ وتباسىنا، تۋعان-تۋىستارىنا، ەلىمىزدەگى بارشا مۇسىلمان قاۋىمىنا كوڭىل ايتامىن. مارقۇمنىڭ ماڭگىلىك مەكەنى ءجاننات بولعاي.

راتبەك حازىرەتىمىز ءمۇفتي بولعان جىلدارى مۇسىلمان مەملەكەتتەرىمەن تىعىز قارىم-قاتىناس ورناتىپ، ىنتىماقتاستىقتى ارتتىرا ءتۇستى. قازاقستان مۇسىلماندارى ءدىني باسقارماسىنىڭ ىرگەتاسىن قالاعان راتبەك نىسانبايۇلى ءوزى باسقارعان مەرزىم ىشىندە 30-دان استام مەشىت سالدىرۋعا ىقپال ەتتى.

حالىقتىڭ ءدىني ساۋات اشۋىنا دەن قويدى. راتبەك قاجى اقساقالدىڭ مۇفتيلىك كەزەڭى «العاشقى ساۋات اشۋ كەزەڭى» دەپ اتالدى. ويتكەنى، وسى كەزەڭدە حالىقتىڭ ءدىني ساۋاتىن اشۋ ماڭىزدى ءىستىڭ ءبىرى بولدى. ۇستازىمىز بويىندا بار كۇش-قايراتىن شاكىرت تاربيەلەۋگە ارنادى. وزىنەن كەيىنگى شاكىرتتەرىنە ارقاشان اعالىق كەڭەسىن ايتىپ، جاناشىرلىق تانىتتى.

اللا تاعالا راتبەك حازىرەتىمىزدىڭ وتباسىنا كوركەم سابىر بەرگەي. جاتقان جەرى جايلى، توپىراعى تورقا بولعاي. ءدىني سالادا جاساعان ساۋاپتى امالدارىنىڭ يگىلىگىن كورگەي. ءامين» دەلىنگەن باس ءمۇفتيدىڭ كوڭىل ايتۋ جەدەل حاتىندا.

Abai.kz