جەتىسۋ وبلىسىندا وتكەن جىلى 3 284 وتباسى باسپانالى بولسا، بيىل 4 600 وتباسى قونىس تويىن تويلايدى.

ولاردىڭ قاتارىندا اقسۋ اۋدانىنىڭ تۇرعىندارى دا بار. بۇل تۋرالى اۋدان حالقىمەن كەزدەسۋدە وبلىس اكىمى بەيبىت يساباەۆ مالىمدەدى.

ءوڭىر باسشىسىنىڭ ايتۋىنشا، وتكەن جىلدىڭ مامىر ايىنان باستاپ تۇرعىن ءۇي بەرۋ فۋنكتسياسىنىڭ «وتباسى بانككە» بەرىلۋىنە بايلانىستى بيىل اقسۋ اۋدانىندا كەزەكتە تۇرعان ازاماتتارعا وتكەن جىلى قۇرىلىسى اياقتالعان 116 پاتەر مەن تۇرعىن ءۇي بەرىلدى.

- كەزەكتە تۇرعان ازاماتتارعا كوپقاباتتى تۇرعىن ۇيدەن 60 پاتەردىڭ جانە 56 جەكە تۇرعىن ءۇيدىڭ كىلتى تابىستالدى. سونىمەن قاتار بيىل جانسۇگىروۆ جانە قاپال اۋىلدارىندا 40 جەكە تۇرعىن ءۇيدىڭ قۇرىلىسى جۇرگىزىلۋدە. جىل سوڭىنا دەيىن ولار پايدالانۋعا بەرىلەدى، - دەدى ب. يساباەۆ.

جالپى، سوڭعى 3 جىلدا اقسۋ اۋدانىندا 297 وتباسى قولجەتىمدى باسپانامەن قامتىلدى. اتاپ ايتقاندا، تۇرعىن ۇيلەر جانسۇگىروۆ، قاپال، ەسەبولاتوۆ، التىنارىق، ساعابۇيەن اۋىلدارىنان بەرىلدى.

بيىل قونىس تويىن تويلاعانداردىڭ ءبىرى - جانسۇگىروۆ اۋىلىنىڭ تۇرعىنى گۇلنارا سابىرباەۆا پىكىر ءبىلدىردى.

- بيىل ءوزىمنىڭ جەكە پاتەرىمە قول جەتكىزدىم. جارىق، كەڭ، ساپالى باسپانا. وتباسىمىزدا وسىنداي قۋانىشتى ءساتتىڭ بولعانىنا وتە ريزامىن. بارشاعا، اسىرەسە جاس وتباسىلارعا وسىنداي قۋانىش تىلەيمىن، - دەدى ول.

Abai.kz