پرەزيدەنت باس پروكۋراتۋرادا جيىن وتكىزدى. مەملەكەت باسشىسى ەلىمىزدە اۋقىمدى وزگەرىستەر جاسالىپ جاتقانىن جانە الدىمىزدا كونستيتۋتسيالىق رەفورما جۇرگىزۋ، مۇلدە جاڭا ساياسي جۇيەگە قادام باسۋ مىندەتى تۇرعانىن ايتتى.

سونىمەن قاتار جاڭا داۋىردە بارلىق سالاعا تسيفرلاندىرۋ مەن جاساندى ينتەللەكتىنى جاپپاي ەنگىزۋ جۇمىسىمەن بەلسەندى تۇردە اينالىسۋ قاجەت ەكەنىن اتاپ ءوتتى.

قاسىم-جومارت توقاەۆ: «كەيبىر شەت ەلدەردە بولىپ جاتقان قازىرگى وتە كۇردەلى احۋالدى كورىپ، بۇل ساياساتىمىزدىڭ دۇرىستىعىنا ءبارىمىزدىڭ كوزىمىز جەتىپ وتىر، وعان ەشقانداي كۇمان جوق. زاڭ مەن ءتارتىپ مەملەكەتتىك ساياساتىمىزدىڭ نەگىزگى قاعيداتى رەتىندە قابىلدانۋى كەرەك، بۇل قاعيداتتى جاڭا كونستيتۋتسيامىزعا مىندەتتى تۇردە ەنگىزۋ قاجەت دەپ سانايمىن. سەبەبى بۇل ەشقاشان وزەكتىلىگىن جوعالتپايتىن، ومىرشەڭ قاعيدات ەكەنى داۋسىز. باس پروكۋراتۋرانىڭ وسى سالاداعى ءرولى اسا ماڭىزدى. پروكۋراتۋرا قىزمەتكەرىنىڭ زاڭنىڭ بۇزىلۋىنا بەيتاراپ، سەلقوس قاراۋعا قۇقىعى جوق»، - دەدى.

مەملەكەت باسشىسى: «ءار مەكەمە تسيفرلىق جۇيەسىن ءوز بەتىمەن دامىتۋدا. بۇل شارۋا جۇيەسىز جۇرگىزىلىپ جاتىر. ءبىرتۇتاس جۇيە جوق. مىسالى، كەيبىر ورگاندار تسيفرلىق تاسىلدەردى ۇتىمدى قولدانىپ جۇمىس ىستەۋدە. ال كەيبىرى دۇرىس امال-ءتاسىل تابا الماي، قىرۋار قارجى جۇمساپ ءجۇر. بۇل، باسقا سوزبەن ايتقاندا، ناعىز جىمقىرۋ. سوندىقتان قاراجاتتى ورىنسىز جۇمساپ، جاڭا دۇنيە جاساۋدىڭ قاجەتى جوق. ۇكىمەتكە قولدانىستاعى بارلىق تسيفرلىق شەشىمدەردى سارالاپ، تەكسەرىپ، ولاردىڭ تيىمدىلىگىن ارتتىرۋدى تاپسىرامىن. كۇشتىك قۇرىلىمدارعا ارنالعان تۇسىنىكتى قۇرىلىمى بار جانە تەحنولوگيالىق ستاندارتتارى بىركەلكى بىرىڭعاي تسيفرلىق ەكوجۇيە جاسالۋعا ءتيىس»، - دەدى.

پرەزيدەنت ازاماتتاردىڭ دەربەس دەرەكتەرىن قورعاۋ قاجەت ەكەنىن ايتتى.

«اقپاراتتىق كەڭىستىكتە ازاماتتاردىڭ دەربەس دەرەكتەرى جاريالانىپ كەتكەنى تۋرالى حابار ءجيى شىعىپ جاتادى. دەربەس دەرەكتەردى بارىنشا قورعاۋ ءۇشىن بۇل جۇمىسپەن جۇيەلى تۇردە اينالىسۋ كەرەك»، - دەدى توقاەۆ.

قاسىم-جومارت توقاەۆ: «الەمدە كيبەرقىلمىس ءورشىپ بارادى. جىل سايىن مىڭداعان ازاماتىمىز سونىڭ قۇربانى بولىپ جاتىر. قازىر ينتەرنەتتەگى الاياقتىق قىلمىستاردىڭ بەستەن ءبىرى عانا اشىلادى. بۇل – وتە تومەن كورسەتكىش. كيبەرقىلمىسپەن كۇرەس تاسىلدەرىن تۇبەگەيلى قايتا قاراۋ قاجەت. تسيفرلىق قاتەرگە توتەپ بەرۋ ءۇشىن قۇقىق قورعاۋ ورگاندارى ءبىر قادام الدا جۇرۋگە ءتيىس. وزىق ويلاپ، ارتتا قالماۋدىڭ امالىن تابۋ قاجەت»، - دەدى.

قاسىم-جومارت توقاەۆ كوشى-قون ۇدەرىستەرىن جاپپاي تسيفرلاندىرۋدى وتە وزەكتى ماسەلە رەتىندە اتادى.

«كوشى-قون ۇدەرىستەرىن جاپپاي تسيفرلاندىرۋ كەرەك. بۇل – وتە وزەكتى ماسەلە. باياعىدان بەرى تالقىلاپ جاتىرمىز، دۇرىس، وڭ ناتيجە از. قازىر الەمدە كۇردەلى احۋال قالىپتاسىپ وتىر. دۇنيە جۇزىندە كەڭ اۋقىمدى كوشى-قون ءجۇرىپ جاتىر دەسەك، قاتە بولمايدى. قونىس اۋدارعىسى كەلەتىن شەتەلدىكتەر ءۇشىن قازاقستان – باسقا ەلدەرگە وتۋگە دە، تۇراقتاپ قالۋعا دا قولايلى مەملەكەت. ەلگە كەلگەن شەتەل ازاماتتارىن ۋاقتىلى ەسەپكە الىپ، ولاردىڭ ءجۇرىس-تۇرىسىن باقىلايتىن تەحنيكالىق قۇرالداردى جەتىلدىرۋ – اسا ماڭىزدى مىندەت. ۇكىمەتكە ۇلتتىق قاۋىپسىزدىك كوميتەتىمەن بىرلەسىپ، وسى جۇمىستى تەزدەتۋدى تاپسىرامىن»، - دەدى.

مەملەكەت باسشىسى: «تەحنولوگيانىڭ قارقىندى دامۋى اقپاراتتىق كەڭىستىكتىڭ تۇبەگەيلى ترانسفورماتسياسىنا جول اشادى. قوعامدى جىككە ءبولىپ، ازاماتتاردى ءبىر-بىرىنە قارسى قوياتىن دەسترۋكتيۆتى اقپارات تاراتۋعا بەيىل ادامدار دا بار. مۇنىڭ ءبارى وشپەندىلىككە باستايتىن ەشكىمگە قاجەتسىز، ءتىپتى قاۋىپتى پىكىرتالاسقا جالعاسادى. جاساندى ينتەللەكتىنى وسىنداي ادامدار اقپاراتتىق قارۋعا اينالدىرىپ، زاڭعا قايشى كەلەتىن كونتەنتتەردى كوپتەپ تاراتا باستايدى. بۇعان جول بەرۋگە بولمايدى. ونداي ارەكەتتەرگە قۇقىقتىق باعا بەرىپ، جاۋاپكەرشىلىككە تارتۋ قاجەت. ازاماتتارعا دەسترۋكتيۆتى كونتەنتتى تاراتۋدىڭ قۇقىقتىق سالدارى جونىندە ۇنەمى ءتۇسىندىرۋ جۇمىستارىن جۇرگىزگەن ءجون»، - دەدى.

قاسىم-جومارت توقاەۆ: «ۇلتتىق قۇرىلتاي وتىرىسىندا مەن وتانشىلدىق ۇعىمى تۋرالى پىكىرىمدى ايتتىم. وتانشىلدىق، بۇل جاي ۇران ەمەس، وتانشىلدىق دەگەنىمىز – قاسيەتتى سەزىم، مۇنىڭ اسىرەۇلتشىلدىققا ەش قاتىسى جوق. قازاقستاندا ءبىز وتانشىلدىق ۇعىمىنا جاۋاپكەرشىلىك جانە جاسامپازدىق تۇرعىسىنان قاراۋىمىز كەرەك، ياعني وتانشىل ازامات ەڭ الدىمەن جاۋاپكەرشىلىگى جوعارى جانە جاسامپاز ازامات بولۋعا ءتيىس. وتانعا دەگەن سۇيىسپەنشىلىك – ساياسي ۇپاي جيناۋ نەمەسە قىزمەتتىك مانساپ جاساۋ ەمەس، بۇل – وتانىڭا جاقسىلىق جاساۋ، ەلىڭە پايدا اكەلۋ دەگەن ءسوز»، - دەدى.

Abai.kz