31 قاڭتاردا قارۋلى كۇشتەردىڭ بارلىق اسكەر بولىمدەرىندە مەرزىمدى قىزمەتتەگى اسكەري قىزمەتشىلەردىڭ تۋىستارى مەن جاقىندارى ءۇشىن «اشىق ەسىك» كۇنى وتكىزىلەدى. ءىس-شارا اياسىندا اتا-انالار ۇلدارىنىڭ قىزمەت جاعدايىن كوزبەن كورىپ، اسكەري قىزمەتشىلەردىڭ كۇندەلىكتى قىزمەتىمەن جاقىنىراق تانىسا الادى.

«اشىق ەسىك» كۇنى باعدارلاماسىنا قارۋ-جاراق پەن اسكەري تەحنيكا ۇلگىلەرىن كورسەتۋ، مەرزىمدى قىزمەتتەگى اسكەري قىزمەتشىلەردىڭ كورسەتىلىمدىك جاتتىعۋلارى، ولاردىڭ تۇرمىستىق جاعدايلارىن، كازارمالار مەن اسحانالاردى كورسەتۋ كىرەدى.

سۋرەت: gov.kz سايتىنان الىندى.

اسكەر بولىمدەر مەن بولىمشە كومانديرلەرى مەرزىمدى اسكەري قىزمەتكە قاتىستى كەز كەلگەن سۇراققا جاۋاپ بەرەدى. «اشىق ەسىك» كۇنىن وتكىزۋدىڭ ماقساتى ارميا مەن قوعام اراسىنداعى سەنىمدى نىعايتۋعا، اشىقتىقتى ارتتىرۋعا جانە مەرزىمدى اسكەري قىزمەتتىڭ ناقتى جاعدايىن تانىستىرۋعا باعىتتالعان.
ءىس-شارا قورىتىندىسى بويىنشا ەڭ ۇزدىك مەرزىمدى اسكەري قىزمەتشىلەرگە ادال قىزمەتى مەن ۇلگىلى اسكەري ءتارتىبى ءۇشىن ماراپات رەتىندە ءبىر كۇندىك سەيىلدەمە بەرىلەدى.

ءار اسكەري ءبولىم «اشىق ەسىك» كۇنىن وتكىزۋ ۋاقىتىن ءوزى بەلگىلەيدى. ال اتا-انالارعا اقپاراتتى اسكەري بولىمدەردىڭ قولباسشىلىعى جەتكىزەدى.

سۋرەت: gov.kz سايتىنان الىندى.

قارۋلى كۇشتەردىڭ اسكەري بولىمدەرىندە اتا-انالار مەن شاقىرىلۋعا دەيىنگى جاستار ءۇشىن «اشىق ەسىك» كۇندەرىن تۇراقتى تۇردە وتكىزىپ تۇرۋ تاجىريبەگە اينالعان. ول اسكەري قىزمەتتىڭ اشىقتىعىن قامتاماسىز ەتۋگە جانە اتا-انالاردى حاباردار ەتۋگە باعىتتالعان. وسى ماقساتتا ءبولىم كومانديرلەرى WhatsApp مەسسەندجەرىندە ارنايى چاتتار اشادى. سونداي-اق، «وتباسىمەن بەينە قوڭىراۋ» سەرۆيسى ارقىلى اتا-انالارمەن تۇراقتى بەينەقوڭىراۋ بايلانىسى ۇيىمداستىرىلعان. سول ءۇشىن ارنايى پلانشەتتەر ساتىپ الىنعان.

سۋرەت: gov.kz سايتىنان الىندى.

سونىمەن قاتار، اسكەري بولىمدەردە «انالاردىڭ جۇرەگى» سارباز انالارى كوميتەتى رەسپۋبليكالىق قوعامدىق بىرلەستىگىنىڭ وكىلدەرىنە تۇراقتى تۇردە تولىق قولجەتىمدىلىك بەرىلگەن. ولار اسكەري بولىمدەردەگى ساربازداردىڭ قىزمەت ەتۋ جاعدايىن ۇنەمى تەكسەرىپ، ول جەردەگى جاعداي تۋرالى قارۋلى كۇشتەردىڭ باسشىلىعى مەن اتا-انالارعا اقپارات بەرىپ تۇرادى.

سۋرەت: gov.kz سايتىنان الىندى.

Abai.kz