ءماجىلىس دەپۋتاتى ءۇنزيلا شاپاق كونستيتۋتسيالىق كوميسسيانىڭ كەزەكتى وتىرىسىندا ۇسىنىلعان كونستيتۋتسيا جوباسىندا حالىقارالىق شارتتارعا قاتىستى ءۇش نەگىزگى ەرەجە كوزدەلگەنىن اتادى.

– ءبىرىنشىسى، قازاقستان  رەسپۋبليكاسىنىڭ حالىقارالىق شارت مىندەتتەمەلەرىنىڭ نورمالارى قازاقستان رەسپۋبليكاسىنىڭ قولداناتىن قۇقىق جۇيەسىنىڭ قۇرامداس بولىگى ەكەنى ايقىندالادى. وسىلايشا جوبانىڭ 5-بابىنىڭ 1-تارماعىندا قازاقستان رەسپۋبليكاسىنىڭ قولدانىلاتىن قۇقىعى كونستيتۋتسيانىڭ، وعان سايكەس كەلەتىن زاڭداردىڭ، قر كونستيتۋتسيالىق سوتى مەن جوعارعى سوتىنىڭ نورماتيۆتىك قاۋلىلارىنىڭ، وزگە دە نورماتيۆتىك-قۇقىقتىق اكتىلەرىنىڭ، قازاقستاننىڭ حالىقارالىق شارت مىندەتتەمەلەرىنىڭ نورمالارى دەپ ناقتى كورسەتىلگەن، - دەدى دەپۋتات.

ءۇنزيلا شاپاق بۇل قازاقستاننىڭ حالىقارالىق مىندەتتەمەلەردەن باس تارتپايتىنىن، كەرىسىنشە، ونى قولدانىلاتىن قۇقىقتىڭ، ياعني قوعامدىق قاتىناستاردى رەتتەيتىن ماڭىزدى قۇرامى، بولىگى رەتىندە مويىندالاتىنى تۇجىرىمدالعانىن اتادى.

– بۇل بويىنشا داۋ تۋىنداۋى مۇمكىن ەمەس، بۇل بۇرىننان كەلە جاتقان قاعيدات، ءالى دە سول قالپىنلدا جۇمىس ىستەيتىن بولادى، - دەدى ول.

ءماجىلىس دەپۋتاتى جاڭا كونستيتۋتسياداعى وزگەرىستەر حالىقارالىق مىندەتتەمەلەردەن باس تارتۋ تۋرالى ەمەس، ولاردى قولدانۋ تارتىبىنە قاتىستى ەكەنىن ايتتى.

– جوبادا حالىقارالىق شارتتاردىڭ ەل اۋماعىندا قولدانىلۋ مەحانيزمى زاڭدارمەن بەلگىلەنەتىنى جازىلعان. بۇل قالىپتى حالىقارالىق شارتتاردىڭ زاڭدى كۇشى مەن مىندەتتىلىگىنە كۇمان كەلتىرۋگە جول بەرىلمەيدى. ءۇشىنشى، قازاقستان رەسپۋبليكاسىندا راتيفيكاتسيالانعان بارلىق حالىقارالىق شارتتار جاريالانادى. بۇل جوعارىدا اتالعان ەكى ەرەجەنىڭ ىسكە اسۋىنىڭ ءبىرىزدى ناتيجەسى. ياعني بىرىنشىدەن، ءبىز حالىقارالىق مىندەتتەمەلەردى قولدانىستاعى قۇقىقتىڭ بولىگى رەتىندە تانيمىز. ەكىنشىدەن، ولاردى زاڭ تالاپتارىنا سايكەس قولدانامىز. ۇشىنشىدەن، ولاردى جاريالايمىز، - دەپ تولىقتىردى دەپۋتات.

ونىڭ ايتۋىنشا، قازاقستان رەسپۋبليكاسىندا راتيفيكاتسيالانعان حالىقارالىق شارتتاردى جاريالاۋ مەملەكەت قابىلداعان مىندەتتەمەلەرمەن بارلىق ازاماتتىڭ تانىسۋىن قامتاماسىز ەتەدى.

– حالىقارالىق شارتتارعا قاتىستى جوعارىدا ايتىلعان ەرەجەلەردى ەسكەرە وتىرىپ، ۇسىنىلىپ وتىرعان كونستيتۋتسيانىڭ نورماسى قۇقىقتىق ايقىندىقتى ەنگىزۋگە، كونستيتۋتسيالىق قۇندىلىقتاردى قورعاۋعا جانە قۇقىقتىق رەتتەۋدىڭ تۇراقتىلىعىن قامتاماسىز ەتۋگە مۇمكىندىك بەرەدى، - دەدى ءۇنزيلا شاپاق.

Abai.kz