قاراعاندى وبلىسى رەسپۋبليكا كۇنىن بۇكىل ەلمەن بىرگە اتاپ وتۋدە. ۇلتتىق مەرەكە كۇنى تۋ تۇعىرى ورنالاسقان الاڭعا جۇزدەگەن ادام جينالىپ، قازاقستاننىڭ مەملەكەتتىك تۋىن سالتاناتتى تۇردە كوتەرۋ راسىمىنە قاتىستى.

ءىس-شاراعا وبلىس اكىمى ەرماعانبەت بولەكپاەۆ، قوعام جانە مەملەكەت قايراتكەرلەرى، اسكەري قىزمەتشىلەر، ارداگەرلەر مەن جاستار قاتىستى.

— رەسپۋبليكا كۇنى — مەملەكەتتىلىگىمىزدىڭ، بىرلىگىمىزدىڭ جانە ەل بولاشاعى الدىنداعى جاۋاپكەرشىلىگىمىزدىڭ سيمۆولى. بيىل بۇل مەرەكەنى قازاقستان تاۋەلسىزدىگىنىڭ 35 جىلدىعى قارساڭىندا اتاپ ءوتىپ وتىرمىز. وسى ۋاقىت ىشىندە ەلىمىز قالىپتاسۋ مەن دامۋ جولىنان ءوتىپ، تالاي بەلەستى باعىندىردى. بۇگىندە مەملەكەت باسشىسى قاسىم-جومارت توقاەۆتىڭ باسشىلىعىمەن ادىلەتتىلىك، زاڭدىلىق پەن جاۋاپكەرشىلىك قاعيداتتارىنا نەگىزدەلگەن اۋقىمدى وزگەرىستەر جۇزەگە اسىرىلىپ كەلەدى. ءبىز ءاربىر ازاماتتىڭ قۇقىعى قورعالىپ، ادال ەڭبەگى لايىقتى باعالاناتىن ادىلەتتى قازاقستاندى بىرگە قۇرىپ جاتىرمىز. قاراعاندى وبلىسى ەلىمىزدىڭ وركەندەۋىنە ەلەۋلى ۇلەس قوسىپ كەلەدى. ءوڭىرىمىز — وندىرىستىك الەۋەتى زور، ەڭبەك ءداستۇرى قالىپتاسقان ءىرى يندۋستريالىق ورتالىق. الدىمىزداعى ورتاق مىندەت — قول جەتكىزگەن جەتىستىكتەرىمىزدى ەسەلەي وتىرىپ، ءوڭىرىمىزدى كەلەر ۇرپاقتىڭ يگىلىگى ءۇشىن ودان ءارى دامىتۋ، - دەدى ەرماعانبەت بولەكپاەۆ.

مەملەكەتتىك تۋ كوككە كوتەرىلگەن ساتتە الاڭعا جينالعان جۇرتشىلىق قازاقستاننىڭ مەملەكەتتىك ءانۇرانىن بىرگە ورىندادى.

رەسپۋبليكا كۇنى ءتۇرلى بۋىن وكىلدەرىن ءبىر الاڭعا جيناپ، ەلدىك پەن بىرلىكتىڭ ورتاق مەرەكەسىنە ۇلاستى.

— بيىل ەلىمىز ءۇشىن ايرىقشا جىل. قازاقستاننىڭ تاۋەلسىزدىك العانىنا 35 جىل تولىپ وتىر. وسى ۋاقىت ىشىندە ەلىمىز دامۋ جولىمەن العا باسىپ كەلەدى. ءبىز ءوز تاريحى، مادەنيەتى جانە بولاشاعىنا زور مۇمكىندىكتەرى بار ەگەمەن مەملەكەتتە ءومىر ءسۇرىپ جاتىرمىز. بارشاڭىزدى رەسپۋبليكا كۇنىمەن قۇتتىقتايمىن! ءار شاڭىراققا اماندىق پەن بەرەكە، بارشا ازاماتقا اشىق اسپان، ال ەلىمىزگە بىرلىك پەن وركەندەۋ تىلەيمىن، - دەدى قاراعاندى وبلىستىق ارداگەرلەر كەڭەسىنىڭ توراعاسى عابيت تۋياقوۆ جەرلەستەرىن مەرەكەمەن قۇتتىقتاپ.

مەرەكەلىك شاراعا بالالارىن ەرتىپ، وتباسىمەن كەلگەندەر دە از بولمادى.

— رەسپۋبليكا كۇنى — ەلىمىز ءۇشىن دە، ارقايسىمىز ءۇشىن دە ماڭىزى زور مەرەكە. بارشاڭىزعا بەيبىت اسپان تىلەيمىن. ەلىمىزدىڭ اسپانى ءاردايىم اشىق، حالقىمىز باقىتتى بولسىن! بۇگىن مۇندا جۇبايىممەن جانە ەكى بالاممەن كەلدىم. كىشى قىزىم ءۇش جاستا. سوعان قاراماستان، قازاقستاننىڭ ءانۇرانىن بىلەدى. ءانۇران ورىندالا باستاسا، بىردەن قوسىلىپ ايتادى. پاتريوتتىق تاربيەنى بالا بويىنا كىشكەنتاي كەزىنەن ءسىڭىرۋ كەرەك دەپ ەسەپتەيمىن، - دەدى قاراعاندىلىق جانبولات جولداسپەكوۆ.

قاراعاندى جوعارى گۋمانيتارلىق كوللەدجىنىڭ ستۋدەنتتەرى، ەگىز قىزدار اياجان مەن ساياجان سارسەنباەۆالار دا مەرەكەگە بىرگە كەلدى. ولار كۇندەلىكتى ومىردە دە ۇنەمى بىرگە جۇرەدى.

— ءبىز، جاستار ءۇشىن رەسپۋبليكا كۇنى — بوستاندىقتىڭ، بىرلىكتىڭ جانە تۋعان ەلگە دەگەن ماقتانىشتىڭ سيمۆولى. ەلىمىزدىڭ بولاشاعىن قۇرۋ بىزگە دە جۇكتەلەدى. سوندىقتان تاريحىمىزدى باعالاپ، تاۋەلسىزدىگىمىزدى كوزدىڭ قاراشىعىنداي ساقتاۋىمىز كەرەك، - دەدى ەگىزدەر.

سالتاناتتى راسىمنەن كەيىن مەرەكەلىك كونتسەرت ۇيىمداستىرىلدى.

مەملەكەتتىك تۋدى كوتەرۋ ءراسىمى وبلىستىڭ بارلىق قالالارى مەن اۋداندارىندا دا ءوتتى. رەسپۋبليكا كۇنى قارساڭىندا بۇقار جىراۋ اۋدانىنىڭ بوتاقارا كەنتىندەگى «داڭق الاڭىندا» بيىكتىگى 30 مەتر بولاتىن تۋ تۇعىرى ورناتىلدى.