استانادا مەملەكەت باسشىسىنىڭ باستاماسىمەن تاعايىندالعان پرەزيدەنتتىك ارناۋلى ادەبي سىيلىق پەن «ايبوز – 2025» ۇلتتىق ادەبي سىيلىعى لاۋرەاتتارىن ماراپاتتاۋ ءراسىمى ءوتتى.

سالتاناتتى ءىس-شاراعا قر پرەمەر-ءمينيسترىنىڭ ورىنباسارى – مادەنيەت جانە اقپارات ءمينيسترى ايدا بالاەۆا، پارلامەنت دەپۋتاتتارى، قازاقستان جازۋشىلار وداعىنىڭ توراعاسى مەرەكە قۇلكەنوۆ، سونداي-اق زيالى قاۋىم وكىلدەرى قاتىستى.

جەڭىمپازداردى قۇتتىقتاعان ۇكىمەت باسشىسىنىڭ ورىنباسارى ولاردىڭ ۇلتتىق ادەبيەتتى دامىتۋعا قوسقان ۇلەسىن اتاپ ءوتىپ، قوعامدىق سانانى جاڭعىرتۋ كەزەڭىندەگى قالامگەرلەردىڭ ايرىقشا رولىنە توقتالدى.

سونداي-اق مەملەكەت باسشىسىنىڭ تاپسىرماسىنا سايكەس ەلدە اقىن-جازۋشىلاردى قولداۋعا باعىتتالعان جۇيەلى مەملەكەتتىك ساياسات جۇزەگە اسىرىلىپ جاتقانىن ايتتى. سونىمەن قاتار ايدا بالاەۆا كونستيتۋتسيالىق رەفورما ماسەلەسىنە ارنايى توقتالىپ، وندا تاريحي مۇرانى ساقتاۋ مەن ۇلتتىق مادەنيەتتى قولداۋعا ەرەكشە ءمان بەرىلگەنىن اتاپ ءوتتى. ونىڭ ايتۋىنشا، بۇل رەفورمالار قۇقىقتىق كەڭىستىكتى جاڭعىرتۋمەن قاتار، ەلدىڭ رۋحاني نەگىزىن نىعايتۋعا، ۇلتتىق قۇندىلىقتاردى زاماناۋي تالاپتارمەن ۇيلەستىرۋگە باعىتتالعان.

«وسى كۇندەرى ءبىز تاريحي كەزەڭدى باستان وتكەرىپ جاتىرمىز. مەملەكەت باسشىسىنىڭ ادىلدىك پەن بىرتۇتاستىققا، زاڭ مەن تارتىپكە نەگىزدەلگەن اۋقىمدى رەفورمالارى ەل دامۋىنىڭ جاڭا باعدارىنا اينالىپ وتىر. بۇل وزگەرىستەر قوعامدى جان-جاقتى جاڭعىرتۋدىڭ بەرىك نەگىزىن قالىپتاستىرادى. مەملەكەتىمىزدە ءجۇرىپ جاتقان كونستيتۋتسيالىق رەفورمالار – تەك قۇقىقتىق وزگەرىستەر عانا ەمەس، ەلدىڭ بولاشاعىن ايقىندايتىن، قوعامدىق سانانى جاڭعىرتاتىن، ازاماتتار مەن مەملەكەت اراسىنداعى جاۋاپكەرشىلىكتى ارتتىراتىن تۇبەگەيلى بەتبۇرىس. وسىنداي سىندارلى كەزەڭدە قوعامنىڭ رۋحاني باعدارىن ايقىنداۋ، ەلدى ورتاق مۇراتتارعا ۇيىستىرۋ – ايرىقشا ماڭىزدى»، – دەدى ايدا بالاەۆا.

سونداي-اق، پرەمەر-ءمينيستردىڭ ورىنباسارى تاريحي مۇرانى ساقتاۋ مەن ءتول مادەنيەتتى قولداۋ بارشاعا ورتاق مىندەت ەكەنىن، بۇل ۇستانىم العاش رەت كونستيتۋتسيا جوباسىندا ناقتى كورىنىس تاۋىپ، مادەنيەت پەن رۋحانيات مەملەكەت دامۋىنىڭ ماڭىزدى تىرەكتەرىنىڭ ءبىرى رەتىندە ايقىندالعانىن ايتتى.

«جاڭا كونستيتۋتسيادا ءبىلىم مەن عىلىمعا، مادەنيەت پەن يننوۆاتسيالىق دامۋعا ايرىقشا باسىمدىق بەرىلۋى – مەملەكەتىمىزدىڭ ستراتەگيالىق ۇستانىمىن ايقىن كورسەتەدى. بۇل تاڭداۋ ەلدىڭ باستى كاپيتالى – ادام الەۋەتىن دامىتۋعا، ءار ازاماتتىڭ ءبىلىمى مەن دارىنىن اشۋعا، پروگرەسكە باستايتىن جاڭا تەحنولوگيالار مەن شىعارماشىلىق ويدى قولداۋعا باعىتتالعان. مۇنىڭ ءبارى قازاقستاننىڭ ۇزاق مەرزىمدى دامۋى تەك ەكونوميكالىق كورسەتكىشتەرمەن ەمەس، ەڭ الدىمەن رۋحاني قۋاتى مىقتى، باسەكەگە قابىلەتتى، وزىق ويلى ۇلت قالىپتاستىرۋمەن تىكەلەي بايلانىستى ەكەنىن تاعى دا دالەلدەي تۇسەدى. بۇل جاۋاپكەرشىلىگى زور ميسسيادا قالامگەر قاۋىمىنىڭ ءرولى ەرەكشە. سەبەبى ادەبيەت – قوعام ايناسى، ۇلتتىڭ جان الەمى»، – دەدى ۇكىمەت باسشىسىنىڭ ورىنباسارى.

ايتا كەتەرلىگى، بيىل پرەزيدەنتتىك ارناۋلى ادەبي سىيلىققا «پروزا»، «پوەزيا»، «دراماتۋرگيا» جانە «بالالار ادەبيەتى» نوميناتسيالارى بويىنشا 49 جاس اۆتوردان ءوتىنىم كەلىپ ءتۇستى. ناتيجەسىندە مەملەكەت باسشىسىنىڭ جارلىعىمەن سىيلىق «پروزا» نوميناتسياسى بويىنشا «تەرگەۋشى» شىعارماسى ءۇشىن ارمان المەنبەتكە، «پوەزيا» نوميناتسياسى بويىنشا «قۇمداعى حيكايا» ولەڭدەر جيناعى ءۇشىن سايان ەسجانعا، «دراماتۋرگيا» نوميناتسياسى بويىنشا «اق كيىز» درامالىق تۋىندىسى ءۇشىن باۋىرجان مۇستافيەۆكە، «بالالار ادەبيەتى» نوميناتسياسى بويىنشا «جازدا اتامنىڭ اۋىلىندا…» شىعارماسى ءۇشىن اسىلان تىلەگەنوۆكە تابىستالدى.

ال، 2025 جىلى «ايبوز» ۇلتتىق ادەبي سىيلىعىنا «ۇزدىك پروزا»، «ۇزدىك پوەزيا»، «ۇزدىك بالالار ادەبيەتى»، «ۇزدىك دراماتۋرگيا»، «ۇزدىك ادەبي اۋدارما»، «ۇزدىك ادەبي سىن» جانە «ۇزدىك كوميكس» نوميناتسيالارى بويىنشا بارلىعى 180 ءوتىنىم قابىلداندى. بايقاۋ قورىتىندىسى بويىنشا ءار نوميناتسيادان ءبىر جەڭىمپاز انىقتالدى.

پرەزيدەنتتىك ارناۋلى ادەبي سىيلىعىنىڭ جەڭىمپازدارى:

سۋرەت: قر مادەنيەت جانە اقپارات مينيسترلىگىنەن الىندى.

«ايبوز-2025» ۇلتتىق ادەبي سىيلىعىنىڭ جەڭىمپازدارى:

سۋرەت: قر مادەنيەت جانە اقپارات مينيسترلىگىنەن الىندى.

Abai.kz