رەسەيدە ديۆەرسيا (قاسكۇنەمدىك) جاسادى دەگەن كۇدىكپەن قازاقستاننىڭ ەكى ازاماتى قاماۋعا الىندى، دەپ حابارلايدى Ulysmedia.kz لەنينگراد وبلىسى سوتتارىنىڭ ءباسپاسوز قىزمەتىنە سىلتەمە جاساپ.

لەنينگراد وبلىسىنداعى لومونوسوۆ اۋداندىق سوتى 2006 جىلى تۋعان ەكى قازاقستاندىققا قاتىستى قاماۋدا ۇستاۋ تۇرىندەگى بۇلتارتپاۋ شاراسىن تاڭدادى. ولار ديۆەرسيا (قاسكۇنەمدىك) جاسادى دەگەن كۇدىككە ىلىنگەن.

قۇقىق قورعاۋ ورگاندارىنىڭ مالىمەتىنشە، كۇدىكتىلەر — تاراز قالاسىنىڭ تۇرعىندارى. قىلمىس جاسالعان ساتتە ولار سانكت-پەتەربۋرگتە تۇرعان. تەرگەۋ نۇسقاسىنا سايكەس، اۋىر ماتەريالدىق جاعداي مەن زاڭدى تابىستىڭ بولماۋىنا بايلانىستى ولار اقشالاي سىياقى ءۇشىن تاپسىرما ورىنداۋعا كەلىسكەن.

«كۋراتورلار» دەپ اتالاتىن ادامداردىڭ نۇسقاۋىمەن قازاقستاندىقتار 40 مىڭ رۋبلگە (شامامەن 260 مىڭ تەڭگە) لەنينگراد وبلىسىنىڭ لومونوسوۆ اۋدانىندا ۇيالى بايلانىس وپەراتورلارىنىڭ بىرىنە تيەسىلى بازالىق ستانتسيانىڭ تاراتۋ قالقانىن ورتەگەن.

كۇدىكتىلەر وقيعا ورنىنان الىس ەمەس جەردە ۇستالعان. قۇقىق قورعاۋ قىزمەتكەرلەرى ولاردى تاكسيمەن قاشۋعا ارەكەتتەنگەن كەزدە توقتاتقان. اتالعان ءىس بويىنشا قوزعالعان باپتىڭ سانكتسياسى 12 جىلدان 20 جىلعا دەيىن باس بوستاندىعىنان ايىرۋ جازاسىن كوزدەيدى.

Abai.kz