ەڭبەك جانە حالىقتى الەۋمەتتىك قورعاۋ مينيسترلىگى جىل باسىنان ەلىمىزدەگى جاردەماقى مەن زەينەتاقىعا قاتىستى وزگەرىستەرگە تۇسىنىك بەردى.

2026 جىلعى 1 قاڭتاردان باستاپ مەملەكەتتىك جاردەماقىلار مولشەرىنىڭ وسۋىنە قاتىستى بىرنەشە مىسال:

* 1, 2, 3 بالا تۋعاندا بەرىلەتىن جاردەماقى 149 416 تەڭگەدەن 164 350 تەڭگەگە دەيىن، 4 جانە ودان دا كوپ بالا تۋعاندا – 247 716 تەڭگەدەن 272 475 تەڭگەگە دەيىن ۇلعايادى;

* مولشەرى بالا سانىنا بايلانىستى كوپبالالى وتباسىلارعا بەرىلەتىن جاردەماقى 4 بالاسى بار وتباسىلار ءۇشىن 63 030 تەڭگەدەن 69 330 تەڭگەگە دەيىن، 10 بالاسى بارلارعا – 157 280 تەڭگەدەن 173 000 تەڭگەگە دەيىن ارتادى;

* I توپتاعى مۇگەدەكتىگى بار ادامدارعا ارنالعان جاردەماقى 101 702 تەڭگەدەن 111 872 تەڭگەگە دەيىن، II توپتاعىلارعا – 81 362 تەڭگەدەن 89 498 تەڭگەگە دەيىن، III توپتاعىلارعا – 55 474 تەڭگەدەن 61 021 تەڭگەگە دەيىن ۇلعايادى.

- سونداي-اق مەملەكەتتىك الەۋمەتتىك ساقتاندىرۋ قورىنان (ماسق) تولەنەتىن اسىراۋشىسىنان ايىرىلۋ جانە ەڭبەك ەتۋ قابىلەتىنەن ايىرىلۋ بويىنشا تولەمدەر دە 10%-عا ارتتى. بۇل تولەمدەر مىندەتتى الەۋمەتتىك ساقتاندىرۋ جۇيەسىنە قاتىسۋشىلارعا بيۋدجەتتەن تولەنەتىن مەملەكەتتىك جاردەماقىلارعا قوسىمشا جۇزەگە اسىرىلادى. تولەمدەردىڭ مولشەرى جەكە ەسەپتەلەدى جانە سوڭعى 2 جىلدا ماسق-قا الەۋمەتتىك اۋدارىمدار جۇرگىزىلگەن ورتاشا ايلىق تابىسقا، ەڭبەك ەتۋ قابىلەتىنەن ايىرىلۋ كوەففيتسيەنتتەرىنە، اسىراۋىنداعى ادامدار سانىنا، مىندەتتى الەۋمەتتىك ساقتاندىرۋ جۇيەسىنە قاتىسۋ وتىلىنە جانە تابىستى الماستىرۋعا بايلانىستى بولادى، - دەلىنگەن مينيسترلىك اقپاراتىندا.

زەينەتاقى

- 2026 جىلعى 1 قاڭتاردان باستاپ مەملەكەتتىك جاردەماقىلاردىڭ، بازالىق جانە ىنتىماقتى زەينەتاقىلاردىڭ بارلىق تۇرلەرىنىڭ مولشەرى قر ۇلتتىق بانكى ايقىندايتىن ينفلياتسيانىڭ بولجامدى دەڭگەيىنە سايكەس 10 پايىزعا ءوستى. بۇدان باسقا، مەملەكەت باسشىسىنىڭ تاپسىرماسى بويىنشا 2023 جىلدان باستاپ بەس جىل ىشىندە ەڭ تومەنگى بازالىق زەينەتاقىنى ەڭ تومەنگى كۇنكورىس دەڭگەيىنىڭ 70%-ىنا دەيىن، ال ەڭ جوعارعىسىن 120%-عا دەيىن جىل سايىن كەزەڭ-كەزەڭىمەن ارتتىرۋ جۇزەگە اسىرىلىپ كەلەدى. ماسەلەن، 2026 جىلعى 1 قاڭتاردان باستاپ بازالىق زەينەتاقىنىڭ ەڭ تومەنگى مولشەرى 35 596 تەڭگەنى (ەڭ تومەنگى كۇنكورىس دەڭگەيىنىڭ 70%-ى), ەڭ جوعارى مولشەرى ەڭ تومەنگى كۇنكورىس دەڭگەيىنىڭ 110%-ىنان 118%-ىنا دەيىن ارتىپ، 60 005 تەڭگەنى قۇرايدى، - دەپ اتالىپ وتكەن ۆەدومستۆو مالىمەتىندە.

مىسالى، 2019 جىلى زەينەتكەرلىك دەمالىسقا شىققان 70 جاستاعى زەينەتكەردىڭ بيۋدجەتتەن تولەنەتىن زەينەتاقىسىنىڭ مولشەرى 2025 جىلى 171 588 تەڭگەنى قۇرادى، ونىڭ ىشىندە بازالىق زەينەتاقى تولەمى – 50 851 تەڭگە، ىنتىماقتى زەينەتاقى – 120 737 تەڭگە. 2026 جىلعى 1 قاڭتارداعى ءوسىمدى ەسكەرە وتىرىپ، وسى زەينەتكەر ءۇشىن زەينەتاقىنىڭ جالپى سوماسى 192 816 تەڭگەگە دەيىن ۇلعايادى. ونىڭ ىشىندە بازالىق زەينەتاقى – 60 005 تەڭگەنى، ىنتىماقتى زەينەتاقى – 132 811 تەڭگەنى قۇرايدى. اتالعان سومالارعا بجزق تولەمدەرى كىرمەيتىنىن اتاپ وتكەن ءجون.

ايتا كەتەيىك، پارلامەنت ءماجىلىسى قابىلداعان قۇجاتقا سايكەس، اكەلەردىڭ بالا كۇتىمىنە بايلانىستى دەمالىسى زەينەتاقى تاعايىنداۋ كەزىندە ەڭبەك وتىلىنە ەسەپتەلەدى.

دەرەككوزى: inform.kz

Abai.kz