قىزىلوردانىڭ سۋىعى استانانىڭ بورانىنان وزگەشە. اسىرەسە، جەلى وڭمەنىڭنەن ءوتىپ كەتەدى. سەمكامىزدى اياقتاپ، استاناعا كەلىپ، ەندى عانا ەسىمىزدى جيناپ جاتقان جاي بار.

الەم-جاھانعا كوز سالسام، دۇنيە ەكىگە بولىنگەندەي كورىنەدى. بۇگىنگىدەي تۋربۋلەنتتى كەزەڭدە، «ايۆازوۆسكيدىڭ توعىزىنشى ۆالىنداي» الاساپىران ۋاقىتتا، ەل ءىشى گۋ-گۋ، دۋ-دۋعا ءتۇسىپتى.

مەنىڭ ۇققانىم — باستى ماسەلە ءتىل جايىندا. انا ءتىلى تۋرالى.

كوزى اشىق قاۋىم قازاق ءتىلىنىڭ ەرتەڭىنە الاڭداۋلى. تورگى بولمەدەگى توردەن ورىن تيمەگەن ءتىلىمىز تومەنگە جىلجىعان. بۇل بۇگىن باستالعان جوق. ازىرگە ەمى جوق دەرتتىڭ بىزگە كەلگەنىنە ءۇش ءجۇز جىلدان اسىپ كەتتى. ءتىپتى سوڭعى قىرىق جىلدا قىزۋىمىز قىرىققا تايادى…

باياعىدا ماسكەۋدە مەنىمەن قاتار گەننادي دياچكوۆ دەگەن جىگىت وقىدى. كينودراماتۋرگيادا. وتە ءبىلىمدى ەدى، اتى-ءجونى ورىس بولعانىمەن، ۇلتى — يۋكاگير.

سول زاماندا جەر بەتىندە بار-جوعى ەكى مىڭداي عانا يۋكاگير حالقى بارىن، ولاردىڭ سوناۋ سولتۇستىكتەگى ياكۋتيا مەن چۋكوتكانى مەكەندەگەن كونە جۇرت ەكەنىن گەنادان ەستىگەم. ورىس اسكەرى كەلگەنگە دەيىن ءوز تاريحى مەن مادەنيەتىن، ءتىلى مەن ادەت-عۇرپىن ساقتاعان ازعانتاي ەل ەكەن.

ول مەنىڭ قازاقشا سويلەگەنىمدى، مەن ونىڭ ءوز تىلىندە سويلەگەنىن قىزىقتايتىنبىز.

كەزىندە مگۋ-دىڭ ماتەماتيكا فاكۋلتەتىن بىتىرگەن جىگىتتىڭ نەگە كينودراماتۋرگياعا اۋىسقانىن سۇراعاندا:

— جاقسى ءبىر ستسەناري جازسام دەيمىن… ءبىزدىڭ ەل جايلى، مەنىڭ كىشكەنتاي وتانىم تۋرالى كينو تۇسىرىلسە… — دەۋشى ەدى.

تاعدىردىڭ الشىسى باسقاشا ءتۇستى… كۋرستاسىمىز ءبىز جازعى دەمالىسقا كەتكەندە قايتىس بولدى.

بۇگىندە قازاقشا كىتاپ وقۋ، ولەڭ جاتتاۋ بىلاي تۇرسىن، قازاقشا سويلەۋ مەن ويلاۋ دا دەفيتسيتتىڭ ءبىر تۇرىنە اينالدى.

كەزىندە اۋىل جاستارى قالاعا ۇدەرە كوشكەندە «مامبەت»، «اۋىلباي»، «كولحوز» دەگەن كەلەمەج سوزدەر سول كەزدەگى جاستارعا ۇلكەن كومپلەكس بولعانى راس.

بۇگىنگى ۋربانيزاتسيا ەلىمىزدىڭ ەكونوميكاسىنا، الەۋمەتتىك جاعدايىنا، مادەنيەتى مەن رۋحانياتىنا دا وزگەرىستەر اكەلگەنىن ەشكىم جوققا شىعارا المايدى.

مىنە، وسى كەزدە ءتىل ماسەلەسىنىڭ قايتا كوتەرىلۋى — زاڭدىلىق.

بۇل قوعامنىڭ جاي بەلسەندىلىگى ەمەس، بۇل — ۇلتتىق سانا-سەزىمنىڭ ءوسۋى دەگەن دۇرىس بولار.

بۇل كەزەڭ — ەرتەڭگە دەگەن ءۇمىت پەن ارمانىمىزدىڭ الاڭداۋى.

بىلە بىلگەن ادامعا ءتىل ماسەلەسى — بولاشاعىمىزعا سالىنعان ينۆەستيتسيا.

ءتىلى ءبىردىڭ — ءدىلى ءبىر.

ول — ءبىزدىڭ تاۋەلسىز مەملەكەتىمىز.

ال تاۋەلسىزدىكتىڭ قاسىندا باسقا دۇنيەنىڭ ءبارى ەكىنشى، ءۇشىنشى ماسەلە عانا…

P.S. سوڭعى دەرەكتەر بويىنشا، جەر بەتىندە يۋكاگير تىلىندە سويلەيتىن ون بەس شاقتى ادام عانا قالعان ەكەن… ەسىمە باياعى دوسىم گەننادي دياچكوۆ ءتۇستى. ونىڭ ارمانى ىسكە اسپاي قالعانى وكىنىشتى…

تالعات تەمەنوۆ,

كينورەجيسسەر، قازاقستاننىڭ حالىق ءارتيسى.

Abai.kz