2026 جىلعى 9 اقپاندا استانا قالاسىندا ۇلتتىق ۆولونتەرلىك جەلى «جاڭا كونستيتۋتسيا جوباسىن تالقىلاۋ جانە قولداۋ» تاقىرىبىندا دوڭگەلەك ۇستەل وتكىزدى. ءىس-شاراعا ەلىمىزدىڭ بارلىق وڭىرلەرىنەن ۆولونتەرلىك ۇيىمداردىڭ وكىلدەرى، وڭىرلىك ۆولونتەرلىك فرونت-وفيستەر مەن باستاماشىل توپتار، سونداي-اق سەرىكتەستەر وفلاين جانە ونلاين فورماتتا قاتىستى.

كەزدەسۋ بارىسىندا ۆولونتەرلىك سەكتوردىڭ جاڭا كونستيتۋتسيانى تالقىلاۋعا قاتىسۋى، ۇكىمەتتىك ەمەس ۇيىمداردىڭ حالىقتى اقپاراتتاندىرۋداعى ءرولى، قوعامدىق ديالوگتى دامىتۋ جانە مەملەكەتتىك ورگاندارمەن ءوزارا ءىس-قيمىل ماسەلەلەرى تالقىلاندى.

قازاقستان رەسپۋبليكاسى پارلامەنتى ءماجىلىسىنىڭ دەپۋتاتى، كونستيتۋتسيالىق رەفورما جونىندەگى كوميسسيا مۇشەسى، «ۇلتتىق ۆولونتەرلىك جەلى» زتب توراعاسى كيم ۆەرا الەكساندروۆنا كونستيتۋتسيا جوباسىن ازىرلەۋگە ازاماتتىق قوعامنىڭ قاتىسۋىنىڭ ماڭىزىن جانە كونستيتۋتسيالىق كوميسسيا جۇمىسىنىڭ اشىقتىعىن اتاپ ءوتتى.

«كونستيتۋتسيا قوعاممەن ديالوگ نەگىزىندە قالىپتاسۋدا، جابىق رەجيمدە ەمەس. جاڭا كونستيتۋتسيا جوباسىمەن التى اي جۇمىس ىستەۋ بارىسىندا ازاماتتاردان، قوعامدىق ۇيىمداردان، ساياسي پارتيالاردان جانە ساراپشىلاردان شامامەن 4 مىڭ ۇسىنىس ءتۇستى. بۇل قوعامنىڭ ەندى ءپاسسيۆتى باقىلاۋشى ەمەس، ساياسي ۇدەرىستەردىڭ تولىققاندى قاتىسۋشىسىنا اينالىپ كەلە جاتقانىن بىلدىرەدى», — دەدى ۆەرا كيم.

ونىڭ ايتۋىنشا، جاڭا كونستيتۋتسيالىق ينستيتۋت — حالىق كەڭەسىن ەنگىزۋ قوعامدىق قاتىسۋدى نىعايتۋداعى ماڭىزدى قادام بولماق. «بۇل مەملەكەت پەن قوعام ستراتەگيالىق دامۋ باعىتتارىن بىرلەسىپ تالقىلايتىن مودەلگە كوشۋ. قوعام تەك تالقىلاۋ قۇقىعىنا عانا ەمەس، زاڭ شىعارۋ ۇدەرىسىنە رەسمي تۇردە باستامالار ەنگىزۋ مۇمكىندىگىنە يە بولادى»، — دەپ اتاپ ءوتتى ول.

كونستيتۋتسيالىق رەفورما جونىندەگى كوميسسيا مۇشەسى، «اسسامبلەيا جاستارى» رقب توراعاسى دجۋمۋرباەۆ تيمۋر گابدۋلوۆيچ جاڭا كونستيتۋتسيانىڭ قازاقستان جاستارى ءۇشىن ەرەكشە ماڭىزىن اتاپ ءوتتى.

«قازاقستان جاستارى ءۇشىن جاڭا كونستيتۋتسيانى قابىلداۋ — اسا ماڭىزدى قادام. ويتكەنى ونىڭ ماڭىزى بۇگىنگى جانە بولاشاق ۇرپاققا تىكەلەي باعىتتالعان. ادامعا باعدارلانۋ — جاستاردىڭ ءادىل ءارى قولجەتىمدى ءوسۋ جانە دامۋ مۇمكىندىكتەرىن اشاتىن جاڭا نەگىزگى زاڭنىڭ باستى لوگيكاسى», — دەدى تيمۋر دجۋمۋرباەۆ.

ول سونداي-اق سىندارلى پاتريوتيزم، ادامي كاپيتالدى دامىتۋ، ءبىلىم مەن يننوۆاتسيا قاعيداتتارىن بەكىتۋ جاستاردىڭ ءوزىن-ءوزى جۇزەگە اسىرۋ مۇمكىندىكتەرىن كەڭەيتىپ، ەل دامۋىنداعى ءرولىن كۇشەيتەتىنىن اتاپ ءوتتى.

ءوز كەزەگىندە «مەديتسينالىق جاستار» رقب توراعاسى، مەديتسينا سالاسىنىڭ ۆولونتەرى ءابدىراش ابىلايحان ابدىكەرىمۇلى كونستيتۋتسيا جوباسىنىڭ الەۋمەتتىك جانە مەديتسينالىق اسپەكتىلەرىنە توقتالدى.

«ۇسىنىلىپ وتىرعان كونستيتۋتسيا جوباسى ادام ءومىرى مەن دەنساۋلىعىن مەملەكەتتىك ساياساتتىڭ وزەگىنە قويادى. وتباسىنى، انا مەن بالانى قورعاۋ، سونداي-اق دەنساۋلىق ساقتاۋ قۇقىعىن بەكىتۋ دەنساۋلىق ساقتاۋ جۇيەسىن دامىتۋ مەن قوعامدىق دەنساۋلىقتى نىعايتۋدىڭ بەرىك قۇقىقتىق نەگىزىن قالىپتاستىرادى», — دەدى ابىلايحان ءابدىراش.

ونىڭ ايتۋىنشا، مەديتسينالىق جاستار بۇل جوبانى ادامعا باعدارلانعان، الەۋمەتتىك جاۋاپتى مەملەكەت قالىپتاستىرۋ جولىنداعى ماڭىزدى قادام رەتىندە باعالايدى.
«جوبانىڭ تيىمدىلىگى ونىڭ ءىس جۇزىندە قالاي جۇزەگە اساتىنىنا تىكەلەي بايلانىستى. ءبىز بۇل نورمالار ناقتى باعدارلامالارمەن، جەتكىلىكتى قارجىلاندىرۋمەن جانە جاس ماماندار ءۇشىن قولايلى ەڭبەك جاعدايلارىمەن قامتاماسىز ەتىلەدى دەپ ۇمىتتەنەمىز», — دەپ قوستى ول.

دوڭگەلەك ۇستەل اشىق تالقىلاۋ جانە ەركىن پىكىر الماسۋ فورماتىندا ءوتتى. شارا قورىتىندىسىندا ۇلتتىق ۆولونتەرلىك جەلى جاڭا كونستيتۋتسيا جوباسىن قولداۋ جونىندەگى ۇندەۋدى جاريالادى (ۇندەۋ ءماتىنى №1 قوسىمشادا).

ۇندەۋ
قازاقستاننىڭ ۇلتتىق ۆولونتەرلىك جەلىسى
جاڭا كونستيتۋتسيا جوباسىن قولداۋ جونىندە

قۇرمەتتى قازاقستاندىقتار!

بۇگىن ەلىمىز ماڭىزدى تاريحي كەزەڭدى باستان وتكەرۋدە – قازاقستاننىڭ الداعى ونداعان جىلدارداعى دامۋىن ايقىندايتىن جاڭا كونستيتۋتسيا جاسالۋدا.
ۆولونتەرلەرمەن جۇمىس بارىسىندا ءبىز ازاماتتاردىڭ ەل دامۋىنا ءوز ۇلەسىن قوسۋعا دەگەن ىنتاسىنىڭ ارتىپ كەلە جاتقانىن بايقايمىز.

ءبىز، قازاقستاننىڭ ۆولونتەرلىك قاۋىمداستىعىنىڭ اتىنان، جاڭا كونستيتۋتسيانى قولدايمىز. ازاماتتىق قوعامدى دامىتۋعا، ۆولونتەرلىكتى ىلگەرىلەتۋگە جانە ازاماتتاردىڭ ەل ومىرىنە قاتىسۋىنا ماڭىزدى اسەر ەتەتىن ەرەجەلەردى اتاپ وتەمىز.

نەگە ءبىز جاڭا كونستيتۋتسيا جوباسىن قولدايمىز

جاڭا كونستيتۋتسيا قوعام مەن مەملەكەت اراسىنداعى ورتاق مىندەتتەردى شەشۋدەگى ىنتىماقتاستىقتىڭ نەگىزىن قالىپتاستىرادى.

ءبىز جاڭا كونستيتۋتسيانىڭ كەلەسى باعىتتارىن قولدايمىز:

• قوعامدىق ديالوگ ينستيتۋتتارى ارقىلى ازاماتتىق قوعامدى دامىتۋ جانە ازاماتتاردىڭ ەلدى باسقارۋعا قاتىسۋىن كەڭەيتەدى
• ءبىلىم بەرۋ، عىلىم جانە ادامي الەۋەتتى دامىتۋعا باسىمدىق بەرۋ، بۇل جەرگىلىكتى قاۋىمداستىقتاردى نىعايتۋعا جانە ازاماتتىق باستامالاردىڭ تيىمدىلىگىن ارتتىرۋعا مۇمكىندىك بەرەدى
• دەربەس دەرەكتەر مەن تسيفرلىق قۇقىقتاردى قورعاۋدى كۇشەيتۋ، بۇل اسىرەسە ۆولونتەرلىك ۇيىمدار ءۇشىن ماڭىزدى
• ۇكىمەتتىك ەمەس ۇيىمدار قىزمەتىنىڭ اشىقتىعىن ارتتىرۋ، بۇل قوعامنىڭ ۆولونتەرلىك قاۋىمداستىققا دەگەن سەنىمىن نىعايتادى

اتالعان باعىتتار ۆولونتەرلىك قوزعالىستىڭ قۇندىلىقتارىمەن ۇندەسەدى جانە ازاماتتىق قوعام ۇيىمدارىنىڭ ءتيىمدى جۇمىس ىستەۋىنە قۇقىقتىق نەگىز قالايدى.

ءبىزدىڭ ۇستانىمىمىز

ءبىز جاڭا كونستيتۋتسيا جوباسى ازاماتتار قوعامدىق مىندەتتەردى شەشۋگە بەلسەندى قاتىساتىن جاۋاپتى قوعامدى قالىپتاستىرۋعا ىقپال ەتەدى دەپ سەنەمىز، ال مەملەكەت بۇل ءۇشىن قاجەتتى جاعدايلاردى جاسايدى.

قازاقستاننىڭ ۆولونتەرلىك قاۋىمداستىعى اتىنان ۇلتتىق ۆولونتەرلىك جەلى جاڭا كونستيتۋتسيانى ىسكە اسىرۋعا، الەۋمەتتىك مىندەتتەردىڭ ءبىر بولىگىن شەشۋگە سىندارلى تۇردە قاتىسۋعا جانە مەملەكەت پەن قوعاممەن ارىپتەستىكتە ەلىمىزدىڭ يگىلىگى ءۇشىن جۇمىس ىستەۋگە دايىن ەكەنىن مالىمدەيدى.

ءاربىر قازاقستاندىقتى ەل بولاشاعىن قالىپتاستىرۋداعى ءوز ءرولىن تۇسىنۋگە جانە جاڭا كونستيتۋتسيا جوباسىن قولداۋعا شاقىرامىز.

قازاقستاننىڭ ۇلتتىق ۆولونتەرلىك جەلىسى
ۆولونتەرلىك قاۋىمداستىق اتىنان

2026 جىل 9 اقپان، استانا

Abai.kz