سارا نازارباەۆا پرەزيدەنت ءىس باسقارماسى جانىنداعى ۇلتتىق گوسپيتالدەن ەم-دومىن تولىق اياقتاپ شىقتى. بۇرىن «سوۆمينكا» دەپ اتالعان بۇل مەديتسينالىق مەكەمە ونىڭ اۋرۋحانادان ۇيىنە اۋىستىرىلعانىن حابارلادى، بىراق دەنساۋلىعى، دياگنوزى جانە ەمدەۋ ادىستەرى تۋرالى مالىمەتتەر دارىگەرلىك قۇپيا بولىپ قالا بەرەدى.

«پاتسيەنت ەمدەۋ كۋرسىن تولىق اياقتاپ، بيىل قاڭتاردا امبۋلاتوريالىق باقىلاۋعا شىعارىلدى. دەنساۋلىعى، دياگنوزى جانە ەمدەۋ ادىستەرى تۋرالى باسقا اقپارات دارىگەرلىك قۇپيا سانالىپ، جاريا ەتۋگە جاتپايدى»، – دەلىنگەن گوسپيتال حابارلاماسىندا.

سارا نازارباەۆانىڭ اۋرۋحاناعا جاتقانى تۋرالى العاشقى اقپارات 2025 جىلدىڭ 5 مامىرىندا تاراعان. الەۋمەتتىك جەلىلەردە ونىڭ اۋىر جاعدايدا جاتقانى نەمەسە قايتىس بولعانى جونىندە قاۋەسەت تاراعانىمەن، كەيىن وتباسى بۇل اقپاراتتى جوققا شىعاردى. 2025 جىلدىڭ قازانىندا ەكس-ەلباسىنىڭ ءباسپاسوز حاتشىسى ايدوس ۇكىباي ونىڭ ءساۋىر ايىنان بەرى ۇلتتىق گوسپيتالدە دارىگەر باقىلاۋىندا ەمدەلىپ جاتقانىن رەسمي تۇردە راستادى. وسىلايشا، ول شامامەن 9 اي بويى مەديتسينالىق قاداعالاۋدا بولدى.

سارا نازارباەۆا 1941 جىلى 12 اقپاندا قاراعاندى وبلىسىندا دۇنيەگە كەلگەن. 1962 جىلى نۇرسۇلتان نازارباەۆپەن شاڭىراق كوتەرگەننەن كەيىن وتباسىندا ءۇش قىز دۇنيەگە كەلدى. العاشىندا ول قىزدارىنىڭ تاربيەسىنە كوڭىل بولسە، كەيىن قوعامدىق قىزمەتكە بەلسەندى ارالاسا باستادى.

سوڭعى وقيعالاردان حابارلانعانداي، الماتىعا داريعا نازارباەۆا ۇشىپ كەلگەندە بلوگەر الىشەر ەلىكباەۆ ونى اۋەجايدان بايقاپ قالعان. ونىڭ الماتىعا اناسىنىڭ كوڭىلىن سۇراي كەلگەنى نەمەسە باسقا شارۋامەن كەلگەنى جايىندا ازىرگە ماردىمدى اقپارات تاراعان جوق.

Abai.kz