اقش پرەزيدەنتى ترامپ جەكسەنبى كۇنى (1 ناۋرىز) The New York Times گازەتىنە بەرگەن سۇحباتىندا: «ويىمداعىداي ءۇش جاقسى كانديدانت بار... ولاردىڭ كىم ەكەنىن قازىر ايتپايمىن، الدىمەن ءىستى بىتىرەيىك»، - دەپ حامەنەيدىڭ ورنىنا ءوز تاراپىنان كىمدەردى لايىق كورىپ وتىرعانىن يشارالادى .

ترامپ سۇحباتىندا ۆەنەسۋەلا مودەلىن يرانعا دا قولدانۋعا بولاتىنىن، اتاپ ايتقاندا، تەك جوعارعى كوشباسشىنى قىزمەتىنەن بوساتىپ، ۇكىمەت قۇرىلىمىنىڭ قالعان بولىگىن ساقتاپ قالۋ ارقىلى امەريكا قۇراما شتاتتارىمەن ىنتىماقتاستىققا دايىن باسشىنى قولداۋعا دايىن ەكەنىن جەتكىزگەن.

دەگەنمەن، اقش-تىڭ كوپتەگەن جوعارى لاۋازىمدى شەنەۋنىكتەرى اقش-يزرايل اسكەري ارەكەتتەرى قىسقا مەرزىمدە يرانداعى رەجيمنىڭ وزگەرۋىنە اكەلەتىنىنە كۇمانمەن قارايدى. دەرەككوزدەر بىرنەشە اپتا بۇرىن ۇسىنىلعان تسرۋ باعالاۋى حامەنەي ولتىرىلسە، ونىڭ ورنىنا يسلام رەۆوليۋتسيالىق گۆارديا كورپۋسىنداعى قاتال ۇستانىمداعى ادام نەمەسە ءدال سونداي قاتال ۇستانىمداعى ءدىني قىزمەتكەر كەلۋى مۇمكىن ەكەنىن جانە رەۆوليۋتسيالىق گۆارديا شەنەۋنىكتەرىنىڭ ءوز ەركىمەن بەرىلۋى ەكىتالاي ەكەنىن كورسەتكەن.

اقش-تىڭ جوعارى لاۋازىمدى شەنەۋنىكتەرى سونىمەن بىرگە ۆاشينگتون قولدايتىن يراندىق وپپوزيتسيا وكىلدەرىنىڭ بيلىكتى باسىپ الۋ مۇمكىندىگىنە دە پەسسيميستىك كوزقاراسپەن قارايدى.

اقش-تىڭ بۇرىنعى بارلاۋ قىزمەتكەرى پانيكوۆ: «اقش پەن يزرايل اسكەري شابۋىلداردى توقتاتىپ، يران حالقى كوشەگە نارازىلىققا شىعىپ، رەجيمدى وزگەرتۋى – ساربازداردىڭ حالىق جاعىنا شىعۋىنا بايلانىستى»، - دەيدى. اقش-تىڭ تاياۋ شىعىستاعى شەنەۋنىكتەرى مەن ساراپشىلارى يراننىڭ «تەز بەرىلەتىنى» تۋرالى قيالعا بەرىلمەۋگە شاقىرۋدا. ولار يراننىڭ ساياسي ءتارتىبى ءبىر كوشباسشىعا تاۋەلدىلىكتەن اۋلاق بولۋ ءۇشىن مۇقيات جاسالعانىن، بيلىك ءدىني ينستيتۋتتار، قاۋىپسىزدىك جۇيەسى جانە بيلىك جەلىلەرى اراسىندا بولىنگەنىن اتاپ وتكەن.

سونداي-اق اتلانتيكالىق كەڭەستىڭ تاياۋ شىعىس باعدارلاماسىنىڭ زەرتتەۋشىسى ءسيترينوۆيچتىڭ: «حامەنەيدى بيلىكتەن الۋ رەجيمدى السىرەتۋدىڭ ورنىنا نىعايتۋى مۇمكىن» دەگەن ءسوزى كەلتىرىلگەن. سەبەبى، سوعىس پەن سىرتقى قىسىمعا تاپ بولعان يران رەجيمى سىرتقى جاۋعا قارسى جۇدىرىقتاي جۇمىلۋى مۇمكىن.

22 اقپاندا «The New York Times» گازەتىندە يراننىڭ سوعىسقا دايىندىعى تۋرالى جاريالانعان ماقالادا ءۇش جوعارى لاۋازىمدى يراندىق شەنەۋنىكتىڭ اتالعان باسىلىمعا «يران دەلسيىنە» كەلەتىن ءۇش الەۋەتتى كانديداتتى اتاپ وتكەن. ءبىرىنشىسى - يراننىڭ جوعارعى ۇلتتىق قاۋىپسىزدىك كەڭەسىنىڭ باس حاتشىسى ءالي لاريدجاني; ەكىنشىسى - قازىرگى پارلامەنت سپيكەرى جانە رەۆوليۋتسيالىق گۆارديا اۋە كۇشتەرىنىڭ بۇرىنعى قولباسشىسى موحامماد باگەر گاليباف; ءۇشىنشىسى - 2015 جىلى باراك وبامامەن يادرولىق كەلىسىم بويىنشا كەلىسسوزدەر جۇرگىزگەن بۇرىنعى ورتاشا پرەزيدەنت حاسان رۋحاني.

«New York Times» ساراپشىسى ولاردىڭ ىشىندە لاريدجانيگە ەرەكشە نازار اۋدارعان.

Abai.kz