تالعار اۋدانىندا ماتەماتيكا مۇعالىمدەرى اراسىندا وليمپيادانىڭ ىرىكتەۋ كەزەڭى ءوتتى
تالعار قالاسىندا ماتەماتيكا ءپانى مۇعالىمدەرى اراسىندا ءداستۇرلى نۇرباتىر ورىنباي اتىنداعى وبلىستىق وليمپيادانىڭ اۋداندىق ىرىكتەۋ كەزەڭى ءوتتى. ءبىلىم دوداسى احمەت بايتۇرسىنۇلى اتىنداعى №7 جالپى ءبىلىم بەرەتىن مەكتەپ-ليتسەيىندە ۇيىمداستىرىلدى.
وليمپيادا بەلگىلى ۇستاز، قازاقستان رەسپۋبليكاسى ءبىلىم بەرۋ سالاسىنىڭ ۇزدىگى، رايىمبەك اۋدانىنىڭ قۇرمەتتى ازاماتى، ىبىراي التىنسارين توسبەلگىسىنىڭ يەگەرى نۇرباتىر ورىنبايدىڭ ەسىمىن ۇلىقتاۋ ماقساتىندا جىل سايىن وتكىزىلىپ كەلەدى.
ءىس-شارانىڭ باستى ماقساتى – ماتەماتيكا ءپانى مۇعالىمدەرىنىڭ كاسىبي دەڭگەيىن ارتتىرۋ، وزىق ادىستەمەلەردى انىقتاۋ جانە ۇزدىك پەداگوگيكالىق تاجىريبەلەردى كەڭىنەن ناسيحاتتاۋ. سونىمەن قاتار وليمپيادا شىعارماشىل ۇستازداردىڭ تاجىريبە الماسۋىنا مۇمكىندىك بەرەتىن ماڭىزدى ءبىلىم الاڭى بولىپ سانالادى.
وليمپيادانىڭ اشىلۋ سالتاناتىندا ءسوز سويلەگەن تالعار اۋداندىق ءبىلىم ءبولىمىنىڭ باسشىسى ايناگۇل ۇشكەمپىروۆا بۇل ءبىلىم سايىسىنىڭ ۇستازدار قاىمى ءۇشىن ماڭىزدىلىعىنا توقتالدى.
«بۇگىن ءبىز وڭىرىمىزدەگى ءبىلىم مەن عىلىمنىڭ مەرەكەسى – ماتەماتيكا ءپانى مۇعالىمدەرىنە ارنالعان نۇرباتىر ورىنباي اتىنداعى وليمپيادانىڭ اشىلۋىندا باس قوسىپ وتىرمىز. ماتەماتيكا – بارلىق عىلىمداردىڭ پاتشاسى عانا ەمەس، ول لوگيكا مەن دالدىكتىڭ نەگىزى. ال وسى عىلىمدى كەيىنگى ۇرپاقتىڭ ساناسىنا ءسىڭىرىپ جۇرگەن سىزدەردەي ۇستازداردىڭ ەڭبەگى وراسان زور.
بۇل سايىس – جاي عانا ءبىلىم باسەكەسى ەمەس. بۇل – ەسىمى ەلگە تانىمال ۇلاعاتتى ۇستاز نۇرباتىر ورىنبايدىڭ ونەگەلى جولىن ۇلىقتاۋ، ونىڭ كاسىبي مۇراسىن قۇرمەتتەۋ. ونىڭ ءومىر جولى ءاربىر ماتەماتيك ءۇشىن ۇلكەن مەكتەپ»، – دەدى ءبولىم باسشىسى.
ايناگۇل مۇقانقىزى وليمپيادانىڭ باستى ماقساتى ۇستازداردىڭ كاسىبي شەبەرلىگىن شىڭداپ، شىعارماشىل ءارى ىزدەنىمپاز پەداگوگتەردى انىقتاۋ ەكەنىن اتاپ ءوتتى.
«مۇعالىم ءوزى ىزدەنگەندە عانا شاكىرتى العا باسادى. بۇگىنگى كورسەتكەن بىلىمدەرىڭىز بەن تاجىريبەلەرىڭىز ەرتەڭگى شاكىرتتەرىڭىزدىڭ جەتىستىگىنە جول اشادى. بارشاڭىزعا زەرەك وي، تەرەڭ لوگيكا جانە كاسىبي تابىس تىلەيمىن»، – دەدى ول.
ءبىلىم سايىسىنىڭ قورىتىندىسى بويىنشا اۋداندىق كەزەڭنىڭ جەڭىمپازدارى الداعى نۇرباتىر ورىنباي اتىنداعى وبلىستىق وليمپياداعا جولداما الىپ، ءوڭىر نامىسىن قورعايتىن بولادى.
Abai.kz
