سەناتورلار «تۇركى مەملەكەتتەرى ۇيىمىنىڭ ازاماتتىق قورعاۋ تەتىگىن قۇرۋ تۋرالى كەلىسىمدى راتيفيكاتسيالاۋ تۋرالى» زاڭدى ماقۇلدادى. قۇجاتتا تۇركى مەملەكەتتەرى ۇيىمىنا كىرەتىن ەلدەر اراسىندا توتەنشە جاعدايلار مەن تابيعي اپاتتارعا بىرلەسىپ دەن قويۋدىڭ ورتاق جۇيەسىن قالىپتاستىرۋ قاراستىرىلعان.

تۇركى مەملەكەتتەرى ۇيىمىنىڭ ازاماتتىق قورعاۋ تەتىگىن قۇرۋ تۋرالى كەلىسىمگە (بۇدان ءارى – تمۇاقت) 2024 جىلعى 6 قاراشادا بىشكەك قالاسىندا قول قويىلعان. قۇجاتتىڭ نەگىزگى ماقساتى – مۇشە جانە بايقاۋشى مەملەكەتتەردىڭ، سونداي-اق وزگە ەلدەردىڭ اۋماعىندا تۋىنداۋى مۇمكىن تابيعي اپاتتار مەن توتەنشە جاعدايلارعا بىرلەسىپ دەن قويۋدىڭ ورتاق مەحانيزمىن قالىپتاستىرۋ. بۇل باستاما اپات كەزەڭىندە تۇركى ەلدەرى اراسىنداعى ىنتىماقتاستىقتى كۇشەيتۋدى كوزدەيتىن، حالىقارالىق قۇقىقتىق مارتەبەسى بار ۇيىم قۇرۋدى قاراستىرادى.

تەتىكتىڭ باستى مىندەتتەرىنە جەدەل ارەكەت ەتۋ، ادام ءومىرىن ساقتاپ قالۋ جانە مۇلكىن قورعاۋ، مەديتسينالىق ءارى گۋمانيتارلىق كومەك ۇيىمداستىرۋ كىرەدى. سونىمەن قاتار كاسىبي دايارلىقتىڭ بىرىڭعاي ستاندارتتارىن قالىپتاستىرۋ جانە ورتاق وقۋ-جاتتىعۋلار وتكىزۋ دە كوزدەلگەن. تمۇاقت جۇمىسى زارداپ شەككەن مەملەكەت سۇرانىس بىلدىرگەن جاعدايدا عانا، ەرىكتى تۇردە جۇزەگە اسادى. ال ءۇشىنشى ەلدەرگە كومەك كورسەتۋ ماسەلەسى تاراپتاردىڭ ورتاق كەلىسىمىمەن شەشىلەدى.

ۇيىمنىڭ باسقارۋ قۇرىلىمىندا جوعارى ورگان رەتىندە مينيسترلەر كەڭەسى جۇمىس ىستەيدى. سونداي-اق شتاب-پاتەرى تۇركيا رەسپۋبليكاسىنىڭ ىستانبۇل قالاسىندا ورنالاساتىن حاتشىلىق قۇرىلادى. باس حاتشىنى مينيسترلەر كەڭەسى روتاتسيالىق تارتىپپەن ءۇش جىل مەرزىمگە تاعايىندايدى. ءار مەملەكەت ءوزارا ىقپالداسۋ ءۇشىن جاۋاپتى ورگان بەلگىلەيدى. قازاقستان تاراپىنان بۇل مىندەت توتەنشە جاعدايلار مينيسترلىگىنە جۇكتەلگەن.

قارجىلىق تۇرعىدان العاندا، تمۇاقت-نىڭ مىندەتتى جىل سايىنعى جارنالاردان قالىپتاساتىن جەكە بيۋدجەتى بولادى. حالىقارالىق بيۋدجەت تۋرالى بولەك كەلىسىم كۇشىنە ەنگەنگە دەيىن ءار تاراپ سيمۆولدىق تۇردە جىلىنا 50 مىڭ دوللار تولەيدى. بۇل رەتتە تولەمدەردىڭ جالپى كولەمىنەن ارتىق شىعىنداردى كەلىسىم ىسكە قوسىلعان العاشقى ەكى جىل ىشىندە تۇركيا رەسپۋبليكاسى ءوز موينىنا الادى، - دەپ ءتۇسىندىردى زاڭ جوباسىن سەناتور اندرەي لۋكين.

اتالعان زاڭدى قابىلداۋ حالىق پەن اۋماقتاردىڭ قاۋىپسىزدىگىن قامتاماسىز ەتۋ تۇرعىسىنان ستراتەگيالىق مانگە يە. ول توتەنشە جاعدايدا تۇركى مەملەكەتتەرى ۇيىمىنا مۇشە ەلدەردىڭ رەسۋرستارىن جەدەل جۇمىلدىرۋعا مۇمكىندىك بەرەدى. سونىمەن بىرگە قۇتقارۋ تەحنولوگيالارى سالاسىنداعى وڭىرلىك تۇراقتىلىقتى نىعايتىپ، ەكسپورتتىق الەۋەتتى ارتتىرۋعا جول اشادى.

Abai.kz