13 ناۋرىز كۇنى الماتى قالاسىندا رەسپۋبليكالىق رەفەرەندۋم وتكىزۋ كەزەڭىندەگى جۇمىستى ۇيىمداستىرۋعا ارنالعان تاۋەلسىز بايقاۋشىلاردىڭ اقپاراتتىق شتابىنىڭ ەكىنشى بريفينگى ءوتتى.

سۋرەت: قوعامدىق كوممۋنيكاتسيالار ورتالىعىنىڭ تەلەگرام ارناسىنان الىندى.

بريفينگ بارىسىندا شتاب جۇمىسىنىڭ بەلسەندى كەزەڭگە وتكەنى جاريالاندى. اقپاراتتىق الاڭ 14 ناۋرىزدان باستاپ جۇمىس ىستەيدى جانە رەفەرەندۋم وتەتىن كۇن بويى، سونداي-اق داۋىس بەرۋ قورىتىندىلارى تولىق شىعارىلعانعا دەيىن قىزمەتىن جالعاستىرادى.

شتابتىڭ نەگىزگى مىندەتى – داۋىس بەرۋ بارىسى تۋرالى ازاماتتار مەن بۇقارالىق اقپارات قۇرالدارىن جەدەل اقپاراتپەن قامتاماسىز ەتۋ، سونداي-اق بولىپ جاتقان ۇدەرىستەر جونىندە وبەكتيۆتى اقپاراتتىق كورىنىس قالىپتاستىرۋ. سونىمەن قاتار كەلىپ تۇسەتىن اقپاراتتى تەكسەرۋگە جانە جالعان حابارلامالار مەن فەيك اقپاراتتاردىڭ تارالۋىنا جول بەرمەۋگە ەرەكشە نازار اۋدارىلادى.

سۋرەت: قوعامدىق كوممۋنيكاتسيالار ورتالىعىنىڭ تەلەگرام ارناسىنان الىندى.

شتاب جۇمىسىنىڭ ترانسلياتسيالارى مەن اقپاراتتىق قوسىلىمدار Independ.kz YouTube ارناسىندا كورسەتىلەدى. شتاب جۇمىسىنا قاتىستى انونستار، جاڭالىقتار جانە جەدەل اقپارات الماتى قالاسىنىڭ قوعامدىق كوممۋنيكاتسيالار ورتالىعىنىڭ الەۋمەتتىك جەلىلەردەگى رەسمي پاراقشالارىندا جاريالانىپ وتىرادى.

سۋرەت: قوعامدىق كوممۋنيكاتسيالار ورتالىعىنىڭ تەلەگرام ارناسىنان الىندى.

بريفينگ بارىسىندا تاۋەلسىز بايقاۋشىلار كواليتسياسىنىڭ قۇرامى تۋرالى دا اقپارات بەرىلدى. كواليتسيا قۇرامىنا الماتى قالاسىندا 2,5 مىڭنان استام تاۋەلسىز بايقاۋشىنى بىرىكتىرەتىن 6 ۇكىمەتتىك ەمەس ۇيىم كىردى.

كواليتسيا وكىلدەرى ەلىمىزدىڭ باسقا وڭىرلەرىندە دە جۇمىس ىستەيدى. رەفەرەندۋم كۇنى استانا، الماتى جانە شىمكەنت قالالارىنان، سونداي-اق قازاقستاننىڭ وننان استام وڭىرىنەن تىكەلەي قوسىلىمدار جوسپارلانعان. بۇل ەلىمىزدەگى جاعداي بويىنشا جەدەل ءارى تۇتاس اقپاراتتىق كورىنىس قالىپتاستىرۋعا مۇمكىندىك بەرەدى.

سۋرەت: قوعامدىق كوممۋنيكاتسيالار ورتالىعىنىڭ تەلەگرام ارناسىنان الىندى.

بريفينگكە قاتىسۋشىلار رەفەرەندۋم كەزەڭىندە اقپاراتقا جاۋاپكەرشىلىكپەن قاراۋدىڭ ماڭىزدىلىعىن اتاپ ءوتىپ، ازاماتتاردى زاڭ مەن ءتارتىپتى ساقتاۋعا، ارانداتۋشىلىقتارعا ەرمەۋگە جانە اقپاراتتى تەك سەنىمدى دەرەككوزدەردەن الۋعا شاقىردى.

سۋرەت: قوعامدىق كوممۋنيكاتسيالار ورتالىعىنىڭ تەلەگرام ارناسىنان الىندى.

سونداي-اق ازاماتتاردىڭ داۋىس بەرۋگە قاتىسۋى دەموكراتيالىق ۇدەرىستەردىڭ ماڭىزدى بولىگى ەكەنى جانە ءاربىر قازاقستاندىق ءوز ازاماتتىق ۇستانىمىن بىلدىرۋگە مۇمكىندىك الاتىنى اتاپ ءوتىلدى.

Abai.kz