ايەلىم ءبىر كۇنى، جۇمىستان قايتارىندا انەت بابا كوشەسىندەگى (استانا قالاسى) كىتاپ دۇكەنىنەن، قىزىقتى ءارى تارتىمدى كىتاپ الىپ كەلدى. وقىپ كورىپ ەدىك شىنىندادا ادامعا بەرەر قۇلشىنىسى وتە جوعارى كىتاپ ەكەن. سوندىقتان وسى كىتاپتى سىزدەر وقىپ شىقسىن دەپ، قالىن وقىرمانعا ۇسىنىپ وتىرمىز.

قازىرگى زاماندا ادام بالاسى تەك قانا ءبىلىم مەن تاجىريبەگە عانا ەمەس، ىشكى سەزىمگە، ياعني تۇيسىككە دە سۇيەنۋدى ۇيرەنە باستادى. عىلىم مەن پسيحولوگيا دامىعان سايىن ادامنىڭ ويلاۋ جۇيەسى بۇرىنعىدان الدەقايدا كۇردەلى ءارى تەرەڭ قۇبىلىس ەكەنى ايقىندالا ءتۇستى. وسى تاقىرىپتى كەڭىنەن قوزعاپ، ميلليونداعان وقىرماننىڭ نازارىن اۋدارعان كىتاپتاردىڭ ءبىرى – كانادالىق جازۋشى، موتيۆاتسيالىق سپيكەر John Kehoe جازعان Mind Power Into the 21st Century اتتى ەڭبەك. قازاق تىلىندە بۇل كىتاپ كوبىنە «تۇيسىگىڭمەن ويلاي ءبىل» دەگەن اتاۋمەن تانىلىپ ءجۇر.

بۇل ەڭبەك ادامنىڭ ىشكى مۇمكىندىگى شەكسىز ەكەنىن، دۇرىس ويلاۋ ارقىلى ءومىردى تۇبەگەيلى وزگەرتۋگە بولاتىنىن دالەلدەۋگە ارنالعان. اۆتوردىڭ نەگىزگى يدەياسى – ادامنىڭ ساناسى مەن تۇيسىگى دۇرىس باعىتتا جۇمىس ىستەسە، ول ءوز تاعدىرىن ءوزى قالىپتاستىرا الادى دەگەن تۇجىرىم.

كىتاپتىڭ باستى تاقىرىبى – ادامنىڭ ويلاۋ قۋاتى. دجون كەحو ادام ساناسىن ەكى دەڭگەيگە ءبولىپ قاراستىرادى: سانالى ويلاۋ جانە بەيسانالىق، ياعني تۇيسىك ارقىلى قابىلداۋ. اۆتوردىڭ پىكىرىنشە، ادام كوبىنە تەك لوگيكا مەن اقىلعا سۇيەنىپ ارەكەت ەتەدى. الايدا ومىردەگى ماڭىزدى شەشىمدەردىڭ كوپشىلىگى ءدال وسى تۇيسىكتىڭ ارقاسىندا قابىلدانادى.

تۇيسىك – ادامنىڭ ىشكى باعدارشامى. ول كەيدە بايقامايتىن، الايدا ماڭىزدى سيگنالداردى بەرەدى. مىسالى، كەيبىر ادامدار ءبىر اداممەن العاش كەزدەسكەندە-اق ونىڭ مىنەزىن سەزىپ قويادى نەمەسە كەيبىر شەشىمنىڭ دۇرىس نە بۇرىس ەكەنىن ىشتەي اڭعارادى. كەحو مۇنداي قۇبىلىستى كەزدەيسوقتىق دەپ ەسەپتەمەيدى. ونىڭ ايتۋىنشا، بۇل – ادامنىڭ بەيساناسىنىڭ جۇمىسى.

كىتاپتا اۆتور ادام ميى ۇزدىكسىز اقپارات قابىلداپ، ونى وڭدەپ وتىراتىنىن ايتادى. بىراق ونىڭ ءبارى سانالى دەڭگەيدە بايقالمايدى. تۇيسىك سول جاسىرىن اقپاراتتاردىڭ ناتيجەسى رەتىندە پايدا بولادى. سوندىقتان تۇيسىككە سەنۋ – ءوزىڭنىڭ ىشكى اقىلىڭا سەنۋ دەگەن ءسوز.

دجون كەحونىڭ كىتابىندا ەرەكشە نازار اۋدارىلعان تاعى ءبىر جاعداي – ويدىڭ ماتەريالدىق اسەرى. اۆتوردىڭ پىكىرىنشە، ادام قانداي ويدى ءجيى قايتالاسا، ونىڭ ءومىرى سول باعىتتا وزگەرە باستايدى. ياعني وي – تەك پسيحولوگيالىق قۇبىلىس دەمەسەكتە، ول ادامنىڭ ءىس-ارەكەتىنە، شەشىمىنە، ءتىپتى تاعدىرىنا ىقپال ەتەدى.

مىسالى، ەگەر ادام ۇنەمى «مەنىڭ قولىمنان كەلمەيدى» دەپ ويلاسا، ونىڭ ارەكەتى دە سول سەنىمگە سايكەس بولادى. ول جاڭا مۇمكىندىكتەردەن قاشقاقتاپ، تاۋەكەلگە بارمايدى. ال كەرىسىنشە، «مەنىڭ قولىمنان كەلەدى» دەگەن سەنىم قالىپتاسسا، ادام بەلسەندى ارەكەت ەتىپ، ماقساتقا جەتۋدىڭ جولدارىن ىزدەي باستايدى.

كەحو بۇل قۇبىلىستى «وي باعدارلاماسى» دەپ تۇسىندىرەدى. ياعني ادامنىڭ ساناسىندا بەلگىلى سەنىمدەر مەن كوزقاراستار جۇيەسى قالىپتاسادى. سول جۇيە ادامنىڭ ءومىرىن باعىتتاپ وتىرادى. سوندىقتان كىتاپ اۆتورى وقىرماندى ەڭ الدىمەن ءوز ويلاۋ جۇيەسىن وزگەرتۋگە شاقىرادى.

كىتاپ تەك تەوريالىق ويلاردان عانا تۇرمايدى. اۆتور تۇيسىكتى دامىتۋعا ارنالعان ناقتى تاسىلدەردى دە ۇسىنادى. ونىڭ ايتۋىنشا، تۇيسىك – تۋا بىتكەن قابىلەت قانا ەمەس، ونى جاتتىقتىرۋعا دا بولادى.

الدىمەن، ادام ءوز ويىنا باقىلاۋ جاساۋدى ۇيرەنۋى كەرەك. كوپ جاعدايدا ادامدار ويدىڭ قالاي پايدا بولاتىنىن اڭعارمايدى. ال سانانى باقىلاۋ ارقىلى ادام جاعىمسىز ويلاردى كەمىتۋ، پايدالى ويلاردى كوبەيتە الادى.

سول سياقتى، قيالدى دۇرىس پايدالانۋ ماڭىزدى. كەحو قيالدى بولاشاقتىڭ «رەپەتيتسياسى» دەپ اتايدى. ەگەر ادام ءوزىنىڭ جەتىستىككە جەتكەن ءساتىن ەلەستەتسە، مي سول جاعدايدى شىنايى ومىردەگى تاجىريبە رەتىندە قابىلداي باستايدى. وسى سەنىمدى كۇشەيتەدى.

تاعى ءبىر ايتارىمىز، مەديتاتسيا مەن تىنىش ويلانۋ دا تۇيسىكتى دامىتۋعا كومەكتەسەدى. اۆتوردىڭ ايتۋىنشا، ادام ساناسى تىنىش كۇيگە تۇسكەندە، بەيسانالىق دەڭگەيدەگى اقپاراتتار ايقىنىراق سەزىلەدى.

كىتاپتىڭ ماڭىزدى ءبولىمى – تابىسقا جەتۋ پسيحولوگياسى. دجون كەحو تابىس تەك بىلىمگە نەمەسە ساتتىلىككە بايلانىستى ەمەس دەپ ەسەپتەيدى. ونىڭ ويىنشا، تابىستىڭ نەگىزگى فاكتورى – ادامنىڭ ويلاۋ جۇيەسى.

كوپتەگەن تابىستى ادامداردىڭ ءومىربايانىن زەرتتەي وتىرىپ، اۆتور ولاردىڭ ورتاق قاسيەتىن انىقتايدى. ولار قيىندىقتارعا قاراماستان ءوز ماقساتىنان باس تارتپاعان. سونىمەن قاتار ولار ءوز مۇمكىندىكتەرىنە سەنگەن.

كەحو وقىرمانعا مىناداي قاراپايىم قاعيدالاردى ۇسىنادى:

• ماقساتتى ناقتى انىقتاۋ
• ونى كۇن سايىن ويشا ەلەستەتۋ
• جاعىمدى ويلاۋ داعدىسىن قالىپتاستىرۋ
• ارەكەتتەن قورىقپاۋ

بۇل قاعيدالار قاراپايىم كورىنگەنىمەن، ولاردىڭ ارتىندا تەرەڭ پسيحولوگيالىق مەحانيزم جاتىر.

«تۇيسىگىڭمەن ويلاي ءبىل» كىتابى العاش جارىق كورگەننەن كەيىن الەمنىڭ كوپتەگەن ەلدەرىندە كەڭ تاراعان ەكەن. ول قازىرگى كۇندەرى جەكە دامۋ، پسيحولوگيا جانە موتيۆاتسيا سالاسىنداعى ەڭ تانىمال ەڭبەكتەردىڭ بىرىنە اينالدى.

بۇل كىتاپتىڭ تانىمال بولۋىنىڭ ناقتى سەبەبى – ونىڭ ءتىلى قاراپايىم ءارى تۇسىنىكتى. اۆتور كۇردەلى عىلىمي تەرميندەردەن گورى ومىرلىك مىسالداردى كوبىرەك قولدانادى. سول ارقىلى وقىرمانعا ويدىڭ قۋاتىن سەزىندىرۋگە تىرىسادى.

سونىمەن قاتار كىتاپ ادامداردى ءوز ومىرىنە جاۋاپكەرشىلىكپەن قاراۋعا شاقىرادى. كوپ جاعدايدا ادامدار قيىندىقتاردى سىرتقى جاعدايلاردان كورەدى: ەكونوميكا، ساياسات، قوعام. ال كەحو ادامنىڭ ىشكى دۇنيەسى وزگەرمەيىنشە، سىرتقى جاعدايدىڭ دا وزگەرۋى قيىن ەكەنىن ايتادى.

كىتاپتىڭ نەگىزگى ماقساتى – عىلىمي تراكتات جازۋ دەمەسەكتە، ادامدارعا موتيۆاتسيا بەرۋ. وسى تۇرعىدان العاندا، ەڭبەك ءوز مىندەتىن تولىق اتقارادى دەۋگە بولادى. ول وقىرماندى ءوز ومىرىنە جاڭاشا قاراۋعا يتەرمەلەيدى.

«تۇيسىگىڭمەن ويلاي ءبىل» – ادام ساناسىنىڭ مۇمكىندىگىن كورسەتەتىن ەرەكشە ەڭبەك. دجون كەحو بۇل كىتاپ ارقىلى ءار ادام ءوز تاعدىرىن وزگەرتە الاتىنىن جەتكىزگىسى كەلەدى. ونىڭ ويىنشا، ادامنىڭ ەڭ ۇلكەن كۇشى – ونىڭ ويىندا.

بۇگىنگى اقپاراتتىق عاسىردا ادامداردىڭ ءومىرى جىلدام وزگەرىپ جاتىر. مۇنداي كەزەڭدە ىشكى سەنىم مەن تۇيسىككە سۇيەنۋ بۇرىنعىدان دا ماڭىزدى بولا ءتۇستى. سەبەبى، سىرتقى الەم قانشالىقتى كۇردەلى بولسا دا، ادامنىڭ ىشكى الەمى وعان باعىت سىلتەيتىن نەگىزگى كۇش بولىپ قالا بەرەدى.

سوندىقتان، بۇل كىتاپتىڭ نەگىزگى ساباعى – ادام ءوز ويىن جيناقتاي بىلسە، ءوز ءومىرىن دە باسقارا الادى. ال تۇيسىك – سول جولداعى ەڭ سەنىمدى سەرىك.

بەيسەنعازى ۇلىقبەك،

قازاقستان جۋرناليستەر وداعىنىڭ مۇشەسى

Abai.kz