الدا قىرعىزستاندا پرەزيدەنت سايلاۋى وتكەلى تۇر. وسى سايلاۋ سالدارىنان ءبىر كەزدەرى جاقىن ارالاسقان ەكى ساياساتكەردىڭ جولى ەكىگە ايىرىلىپ، بۇگىندە ولاردىڭ ءبىرىنىڭ ۇستىنەن سوت ءىسى قارالىپ جاتىر. جالپى، الداعى ساياسي ناۋقان بۇرىنعىلاردان وزگەشە ءوتۋى مۇمكىن. ءتىپتى ونىڭ سوڭى سولتۇستىك پەن وڭتۇستىك اراسىنداعى قايشىلىقتاردىڭ كۇشەيۋىنە الىپ كەلۋ قاۋپى دە جوق ەمەس.

ارينە، قىرعىزستاندا تىنىشتىق پەن تۇراقتىلىقتىڭ ساقتالعانى ءبىز ءۇشىن دە ماڭىزدى. كورشى ەلدەگى كەلىسىم - بۇكىل ورتالىق ازيانىڭ تۇراقتىلىعى. ءبىز ءاردايىم قىرعىزستاننىڭ بەيبىت جانە بەرەكەلى بولعانىن قالايمىز.

دەگەنمەن، ءىرى ساياسي ناۋقان قارساڭىندا كەيبىر ساياسي تەحنولوگتار قوعامدى بىرىكتىرۋ ءۇشىن سىرتقى "جاۋ" بەينەسىن قالىپتاستىرۋعا تىرىساتىن جاعدايلار ءجيى كەزدەسەدى. بۇل جولى "تاڭداۋ" قازاق حالقىنا تۇسكەندەي. سوڭعى ۋاقىتتا قىرعىزستاننىڭ اقپاراتتىق كەڭىستىگىندە قازاقتارعا قاتىستى جاعىمسىز پىكىرلەردىڭ جيىلەي تۇسكەنى بايقالادى، وشپەندىلىك ءورشىپ تۇر دەسە ارتىق ەمەس.

ەگەر مۇنى تەك الەۋمەتتىك جەلىدەگى ساۋاتسىز مارگينالداردىڭ جازبالارى دەسەك، اسا ءمان بەرمەۋگە بولار ەدى. بىراق بۇل تالقىلاۋعا كەيبىر قالامگەرلەر مەن قوعامدىق پىكىر كوشباسشىلارىنىڭ دا ارالاسا باستاۋى الاڭداتادى.

بۇل قۇبىلىستىڭ سەبەپتەرى ءارتۇرلى بولۋى مۇمكىن. دەگەنمەن، ۋاقىتشا سايلاۋ ءۇشىن عاسىرلار بويى اۋىلى ارالاس، قويى قورالاس قوس باۋىرلاس حالىقتىڭ اراسىنا سىزات تۇسىرەتىن ارەكەتتەردىڭ ەشقايسىسى جاقسىلىققا اپارمايتىنى انىق.

ەنەساي اڭعارىندا  8-9 عاسىردا قۇرىلعان قىرعىز يمپەرياسى كوپ ۇزاماي قۇلاپ قالدى. ال قازاق “قازاق” دەپ اتالماي تۇرىپ، قازىرگى جەتىسۋ جەرىندە ءبىزدىڭ ەرامىزعا دەيىن ءۇيسىن يمپەرياسىن قۇرىپ - ءبىزدىڭ جىل ساناۋىمىزدىڭ 4-5 عاسىرىنا دەيىن ۇلى جىبەك جولىنىڭ ساقشىسى قىزمەتىن اتقاردى. ودان 2-عاسىردا قاڭلى يمپەرياسى ءبولىنىپ شىقتى. سول داۋىردە دۇنيەنى دۇركىرەتكەن عۇن يمپەرياسىنىڭ، ودان كەيىنگى ايگىلى تۇرىك قاعاناتىنىڭ حالقى دا وعىز بەن قىپشاقتىڭ ارعى تەگى، قازىرگى قازاق، وزبەك، قىرعىز، ۇيعىر جانە ت/ب تۇركى الەمىنىڭ ءتۇپ تامىرى ەكەنى بارشاعا ءمالىم. شىڭعىسحاننىڭ كەزىندەگى ارقايسىسى جەكە-جەكە حاندىق قۇرعان جالايىر، كەرەي، قوڭىرات، نايمان جانە تاعى باسقا حالىقتار دا ءدال قازىرگىدەي “قازاق” دەپ اتالماسا دا قازىرگى قازاقتىڭ اتالارى ەكەنى تاريحي فاكت.

Abai.kz