ءبىز ۇنەمى كىتابىن وقىپ جۇرگەن شىعارمالاردىڭ جاعدايى، تابىسى قالاي ەكەنىن ءبىر ۋاقىت ويلاپ كوردىك پە؟ ءبىز قازىرگى زاماننىڭ ەڭ تابىستى قالامگەرلەرىنىڭ ومىرىنە ءۇڭىلىپ، ولاردىڭ جەتىستىككە قالاي جەتكەنىن جانە قانشا تابىس تاباتىنىن زەرتتەپ، الەمدەگى ەڭ باي جازۋشىلاردىڭ ءتىزىمىن جاسادىق.

ەندەشە، ءبىر شىنى كوفە قۇيىپ الىپ، الەمدەگى ەڭ داۋلەتتى قالامگەرلەردىڭ ومىرىنە بىرگە ساياحات جاسايىق.

سۋرەت: nbcnews.com سايتىنان الىندى.

J.K. Rowling

اتاقتى «ءحارري پوتتەر» سەرياسىنىڭ اۆتورىنىڭ بايلىعى – £820 ميلليون.

الەمگە كەڭىنەن تانىمال J.K. Rowling شىعارمالارى كىتاپ سۇيەر قاۋىمعا عانا ەمەس، كينو مەن ويىن الەمىنىڭ جانكۇيەرلەرىنە دە ەرەكشە اسەر سىيلادى. ونىڭ باي قيالى، قىزىقتى سيۋجەتتەرى مەن سيقىرلى الەمى ميلليونداعان وقىرماندى باۋراپ الدى. ەدينبۋرگ قالاسىندا مۇعالىم بولىپ جۇرگەن كەزىندە ول العاش رەت Harry Potter and the Philosopher’s Stone رومانىن جازدى. بۇل كىتاپ 1997 جىلى جارىق كورىپ، «ءحارري پوتتەر» الەمىنىڭ باستاۋى بولدى. كوپ ۇزاماي بۇل تۋىندى ۇلىبريتانيادا عانا ەمەس، بۇكىل الەمدە ۇلكەن تانىمالدىققا يە بولدى. قازىر «ءحارري پوتتەر» سەرياسى – تاريحتاعى ەڭ كوپ ساتىلعان كىتاپتار توپتاماسى. ءتورت جىلدان كەيىن ونىڭ العاشقى فيلمدىك نۇسقاسى جارىق كورىپ، كىتاپتاعى جەتىستىكتى قايتالادى. وسىلايشا، روۋلينگتىڭ سيقىرلى الەمى فيلمدەرگە، بەينەويىندارعا، ۇستەل ويىندارىنا، ءتىپتى ارنايى ويىن-ساۋىق پاركتەرىنە دەيىن كەڭەيگەن جاھاندىق برەندكە اينالدى.

سۋرەت: aarp.org سايتىنان الىندى.

James Patterson

ونىڭ بايلىعى – £621 ميلليون. Along Came a Spider, 1st to Die, Kiss the Girls سياقتى بەستسەللەرلەردىڭ اۆتورى James Patterson سوڭعى 40 جىلداعى ەڭ كوپ تابىس تاپقان جازۋشىلاردىڭ ءبىرى. ول جازۋشىلىق جولىن 1976 جىلى The Thomas Berryman Number اتتى العاشقى تريللەرىن جاريالاۋدان باستادى. بۇل شىعارما وعان ەدگار اللان پو اتىنداعى «ۇزدىك دەبيۋتتىك رومان» سىيلىعىن الىپ بەردى. كەيىننەن ول بىرىنەن سوڭ ءبىرى جاڭا كىتاپتار شىعارىپ، الەمنىڭ تۇكپىر-تۇكپىرىندەگى وقىرمانداردى باۋراي ءبىلدى. 1996 جىلى جارناما سالاسىنداعى جۇمىسىن تاستاپ، تولىقتاي جازۋشىلىققا بەت بۇردى. ونىڭ قىسقا ءارى ديناميكالىق تاراۋلارعا قۇرىلعان جازۋ ءستيلى بۇگىنگە دەيىن وقىرماندى وزىنە تارتىپ كەلەدى.

سۋرەت: dailyroutines.substack.com سايتىنان الىندى.

Danielle Steel

بايلىعى – £465 ميلليون. ءتىرى جازۋشىلار اراسىنداعى ەڭ كوپ ساتىلىم جاساعان قالامگەر – Danielle Steel. ونىڭ ماحاببات تۋرالى روماندارى بۇگىنگە دەيىن 800 ميلليوننان استام دانامەن ساتىلعان. ءستيلدىڭ ەرەكشەلىگى – ءبىر ۋاقىتتا بىرنەشە جوبامەن جۇمىس ىستەي الاتىن ەڭبەكقورلىعى. سونىڭ ارقاسىندا ول جىل سايىن بىرنەشە كىتاپ جازىپ ۇلگەرگەن. ول جازۋشىلىق جولىن ەرتە باستاپ، 19 جاسىندا نيۋ-يورك ۋنيۆەرسيتەتىندە وقىپ ءجۇرىپ العاشقى رومانىن جازدى. سودان بەرى 210-نان استام كىتاپ، ونىڭ ىشىندە 182 رومان جاريالاپ، الەمدىك ادەبيەتتە ءوز ورنىن قالىپتاستىردى.

سۋرەت: wikipedia.org سايتىنان الىندى.

Paulo Coelho

بايلىعى – £388 ميلليون. الەمگە ايگىلى The Alchemist رومانىنىڭ اۆتورى Paulo Coelho – ءومىر جولى كۇردەلى بولعان جازۋشىلاردىڭ ءبىرى. 17 جاسىندا اتا-اناسى ونى پسيحياتريالىق ەمحاناعا جاتقىزعان، كەيىن زاڭ فاكۋلتەتىن تاستاپ، ءبىراز ۋاقىت جۇمىسسىز كۇي كەشكەن. اقىرىندا برازيليادا تانىمال مۋزىكانتتارعا ءان جازاتىن اۆتور رەتىندە تانىلدى. 1974 جىلى ول بيلىك تاراپىنان قۋدالاۋعا ۇشىراپ، تۇتقىندالىپ، ازاپ كوردى. سوعان قاراماستان، جازۋشى بولۋ ارمانىنان باس تارتپادى. 1982 جىلى العاشقى كىتابىن جارىققا شىعاردى. ال كەيىنگى The Alchemist رومانى الەم بويىنشا 150 ميلليوننان استام دانامەن ساتىلىپ، ونى الەمدىك دەڭگەيدەگى جازۋشىعا اينالدىردى.

سۋرەت: aarp.org سايتىنان الىندى.

Stephen King

بايلىعى – £388 ميلليون. قورقىنىشتى ادەبيەتتىڭ شەبەرى Stephen King It, The Shining, The Stand سياقتى شىعارمالارىمەن تانىمال.1947 جىلى اقش-تا دۇنيەگە كەلگەن كينگ بالا كەزىنەن كينو مەن كوميكستەرگە اۋەس بولىپ، التى جاسىنان باستاپ اڭگىمە جازا باستاعان. ونىڭ العاشقى رومانى Carrie 1974 جىلى جارىق كوردى. سودان بەرى 65-تەن استام كىتاپ جازىپ، 400 ميلليوننان استام دانامەن ساتىلعان.

سۋرەت: cbsnews.com سايتىنان الىندى.

Nora Roberts

بايلىعى – £372 ميلليون. 225-تەن استام ماحاببات رومانىنىڭ اۆتورى Nora Roberts الەم بويىنشا 500 ميلليوننان استام كىتاپ ساتقان. ونىڭ جازۋشىلىق جولى ەرەكشە باستالدى: ءبىر كۇنى بوران كەزىندە بالالارىمەن ۇيدە وتىرىپ، ۋاقىت وتكىزۋ ءۇشىن جازۋعا كىرىسكەن. كەيىن بۇل اۋەستىك كاسىبي جولعا اينالدى. العاشقى كىتابى بىرنەشە رەت باسپادان قايتارىلعانىمەن، 1981 جىلى Irish Thoroughbred رومانى جارىق كوردى. سودان كەيىن ول جۇزدەگەن كىتاپ جازىپ، الەمدىك ادەبيەتتە وزىندىك برەندكە اينالدى. سونىمەن قاتار، ول J.D. Robb, Jill March, Sarah Hardesty سياقتى بۇركەنشىك ەسىمدەرمەن دە شىعارمالار جاريالاعان.

دايىنداعان دۇيسەنالى الىماقىن

Abai.kz