شەگىرتكە زيانكەستەرىنە قارسى كۇرەس ماۋسىمىنا دايىندىق اياسىندا ۇشقىشسىز ۇشۋ اپپاراتتارى پاركىن ازىرلەۋ جۇمىستارى تولىق اياقتالدى. بيىل اۋىل شارۋاشىلىعى القاپتارىن نۇكتەلىك ادىسپەن حيميالىق وڭدەۋ ءۇشىن 46 اگرودروندى پايدالانۋ جوسپارلانعان. بۇل تۋرالى اشم ءمالىم ەتتى.

بەلگىلى بولعانداي، ءۇيىرلى شەگىرتكە تۇرلەرى دالا، ءشول جانە تاۋلى ايماقتاردا، سونداي-اق وزەن اڭعارلارىندا تارالادى. مۇنداي جەرلەردە جەرۇستى تەحنيكانى قولدانۋ قيىندىق تۋدىرادى. سوندىقتان ۇشقىشسىز ۇشۋ اپپاراتتارىن پايدالانۋ زيانكەستەر وشاقتارىن جەدەل انىقتاۋعا مۇمكىندىك بەرەدى، مونيتورينگ جۇرگىزۋ ۇدەرىسىن ەداۋىر جەدەلدەتەدى جانە زەرتتەلەتىن اۋماقتاردىڭ قامتۋ اياسىن كەڭەيتەدى.

ماۋسىمعا دايىندىق بارىسىندا ماماندار جابدىقتاردىڭ تەحنيكالىق جاي-كۇيىنە كەشەندى تەكسەرۋ جۇرگىزدى. ۇشۋ قاۋىپسىزدىگىنە، بۇركۋ جۇيەلەرىنىڭ تيىمدىلىگىنە جانە باسقارۋ جۇيەلەرىنىڭ تۇراقتىلىعىنا ەرەكشە نازار اۋدارىلدى.

سوڭعى جىلدارى اۋىل شارۋاشىلىعى القاپتارىنا مونيتورينگ جۇرگىزەتىن «فيتوسانيتاريالىق قاۋىپسىزدىك جانە بولجامدار ادىستەمەلىك ورتالىعى» رمك-نىڭ تەحنيكالىق پاركى ايتارلىقتاي كەڭەيدى. ماسەلەن، بىلتىر ورتالىق 2024 جىلدىڭ سوڭىندا ساتىپ الىنعان 7 دروندى پايدالانسا، 2025 جىلدىڭ جەلتوقسانىندا قوسىمشا 50 قۇرىلعى ساتىپ الىندى.

وسىلايشا، قاداعالاۋ بارىسىندا 57 ۇشقىشسىز ۇشۋ اپپاراتىن پايدالانۋ ماۋسىمعا دايىندىق دەڭگەيىن ايتارلىقتاي ارتتىرىپ، فيتوسانيتاريالىق قاۋىپتەرگە ءتيىمدى ءارى جەدەل ارەكەت ەتۋگە جول اشادى.

Abai.kz