ەلىمىزدە ەڭ كوپ قولدانىلاتىن جانارماي تۇرلەرىنە قاتىستى جارتى جىلعا سوزىلعان باعا ءموراتوريى اياقتالدى.

ەنەرگەتيكا مينيسترلىگى اي-92 جانە ديزەل وتىنىنا بەلگىلەنگەن شەكتى باعالار 2025 جىلدىڭ قازانىنان 2026 جىلدىڭ 31 ناۋرىزىنا دەيىن ساقتالعانىن، ەندى نارىق ەركىن باعا بەلگىلەۋگە كوشكەنىن حابارلادى. 

ساراپشىلار ەندى ايىنا كەمى 1 تەڭگە باعا ءوسىمى بولاتىنىن ايتتى. ال، ەنەرگەتيكا ۆيتسە-ءمينيسترى سانجار جاركەشوۆ جانارماي قورىنا قاتىستى پىكىر ءبىلدىردى.

ۆەدومستۆو وكىلى جانار-جاعارماي باعاسى سۇرانىس پەن ۇسىنىسقا بايلانىستى قالىپتاساتىنىن ەسكە سالدى. ونىڭ ايتۋىنشا، باعا وزگەرىپ جاتقان جوق.

"قازىرگى تاڭدا تاپشىلىق جوق. ەلدە 600 مىڭ تونناعا جۋىق بەنزين جانە 600 مىڭ توننا ديزەل وتىنى بار. قور جەتكىلىكتى. ىشكى نارىقتا تاپشىلىق بولماعاندىقتان، جانار-جاعارماي باعاسىنىڭ ءوسۋى دە بايقالمايدى", – دەدى سانجار جاركەشوۆ تىلشىلەردىڭ ساۋالىنا بەرگەن جاۋابىندا.

رەسپۋبليكادا جانار-جاعارماي باعاسىنا تۇراقتى مونيتورينگ جۇرگىزىلەتىنى ايتىلدى. باسەكەلەستىكتى قورعاۋ جانە دامىتۋ اگەنتتىگى بۇل ماسەلەنى باقىلاۋدا ۇستاپ وتىر. ۆيتسە-مينيستر باعانىڭ نەگىزسىز ءارى كۇرت وسۋىنە جول بەرىلمەيتىنىن جەتكىزدى.

Abai.kz