«ەنەرگەتيكالىق جانە كوممۋنالدىق سەكتورلاردى جاڭعىرتۋ» ۇلتتىق جوباسى اياسىندا قازاقستاندا ەلەكتر جەلىلەرىندەگى اپاتتىلىق 13%-عا ازايدى.

ەنەرگەتيكا مينيسترلىگىنىڭ مالىمەتىنشە، 2025 جىلى 17 مىڭ شاقىرىم ەلەكتر بەرۋ جەلىلەرى مەن 420 قوسالقى ستانتسياعا كۇردەلى جوندەۋ جۇرگىزىلگەن. ناتيجەسىندە جەلىلەردىڭ توزۋ دەڭگەيى 66%-عا دەيىن تومەندەگەن.

– جۇرگىزىلگەن جاڭعىرتۋ جۇمىستارىنىڭ ناتيجەسىندە ەلەكتر جەلىلەرىندەگى اپاتتىلىق 13%-عا ازايىپ، 3140 تەحنولوگيالىق بۇزۋشىلىقتىڭ الدىن الۋعا مۇمكىندىك بەرىلدى. بۇل شارالار ەنەرگەتيكالىق ينفراقۇرىلىمنىڭ سەنىمدىلىگىن ارتتىرۋعا باعىتتالعان، – دەلىنگەن مالىمەتتە.

بيىل دا اۋقىمدى جوندەۋ جۇمىستارى جالعاسادى. جالپى 17 مىڭ شاقىرىم ەلەكتر جەلىسىن جاڭارتۋ جوسپارلانعان. ونىڭ ىشىندە اقمولا وبلىسىندا – 2,5 مىڭ كم، پاۆلودار وبلىسىندا – 2,4 مىڭ كم، جامبىل جانە ۇلىتاۋ وبلىستارىندا – 1,8 مىڭ كم-دەن استام جەلى جوندەلەدى.

سونىمەن قاتار 444 قوسالقى ستانتسيانى، 3,4 مىڭ تاراتۋ پۋنكتى مەن ترانسفورماتورلىق قوسالقى ستانتسيالاردى جاڭعىرتۋ كوزدەلگەن.

– جوسپارلانعان شارالاردى ىسكە اسىرۋ ەلەكتر جەلىلەرىنىڭ ورتاشا توزۋ دەڭگەيىن قوسىمشا 65%-عا دەيىن تومەندەتۋگە، ەلەكترمەن جابدىقتاۋ سەنىمدىلىگىن ارتتىرۋعا جانە ەلدىڭ ەنەرگەتيكالىق جۇيەسىنىڭ تۇراقتىلىعىن كۇشەيتۋگە مۇمكىندىك بەرەدى، – دەپ اتاپ وتىلگەن.

Abai.kz