ادامدار ءومىر سۇرۋگە قولايلى، جۇمىس ىستەۋگە جاعداي جاسالعان دامىعان ەلدە تۇرۋدى قالايدى. سول ءۇشىن قۇرلىق اسىپ، باقۋاتتى مەملەكەت ىزدەپ جۇرگەندەر قانشاما. جاقىندا Global Human Prosperity Index رەيتينگى شىقتى. تىزىمدە قازاقستان 9 ساتىعا تومەندەپ، 58 ورىنعا يە بولدى، دەپ حابارلايدى Ulysmedia.kz.

شۆەيتساريا ەڭ جايلى ەل

CEOWORLD Magazine جاريالاعان 2026 جىلعى رەيتينگ بويىنشا، ادام ءال-اۋقاتى دەڭگەيىنەن شۆەيتساريا بىرىنشى ورىنعا شىقتى. ودان كەيىن يسلانديا مەن اۆستراليا ورنالاسقان. جالپى زەرتتەۋدە 193 ەل قامتىلعان. يندەكس ەلدەردىڭ بايلىعىن عانا ەمەس، سول رەسۋرستاردىڭ حالىقتىڭ ناقتى ءومىر ساپاسىنا قالاي اسەر ەتەتىنىن باعالايدى. اتاپ ايتقاندا، ءومىر ءسۇرۋ ۇزاقتىعى، ءبىلىم دەڭگەيى، جان باسىنا شاققانداعى تابىس، ساياسي تۇراقتىلىق جانە ازاماتتارعا بەرىلەتىن مۇمكىندىكتەر ەسكەرىلەدى. وسى كورسەتكىشتەر نەگىزىندە ەلدەر «وتە جوعارى ءال-اۋقات» پەن «ءالسىز ءال-اۋقات» ارالىعىنداعى ساناتتارعا بولىنگەن.

ساراپشىلاردىڭ ايتۋىنشا، بۇل رەيتينگ – جاي عانا ستاتيستيكالىق ءتىزىم ەمەس. ول قاي ەلدەردە ءومىر ساپاسى جوعارى، قاي جەردە ينۆەستيتسيا قاۋىپسىز جانە ۇزاق مەرزىمدى جوسپارلار جۇزەگە اسۋى ىقتيمال ەكەنىن كورسەتەتىن ماڭىزدى قۇرال. رەيتينگتە جوعارى ورىن العان مەملەكەتتەر تەك ەكونوميكالىق تۇرعىدا باي ەمەس، سونىمەن قاتار تالانتتى تارتاتىن، كاپيتالدى ساقتايتىن جانە تۇراقتى دامۋعا جاعداي جاسايتىن ورتا قالىپتاستىرىپ وتىر.

توپ-10 قاي مەملەكەتتەر؟

العاشقى وندىققا ەنگەن ەلدەردىڭ بارلىعى «وتە جوعارى ءال-اۋقات» ساناتىنا كىردى. رەيتينگتە باتىس جانە سولتۇستىك ەۋروپا ەلدەرى، سونداي-اق ازيانىڭ جەتەكشى قارجى جانە تەحنولوگيالىق ورتالىقتارى باسىمدىققا يە.

زەرتتەۋ قورىتىندىسىنا سايكەس، ادام ءال-اۋقاتى دەڭگەيى بويىنشا ۇزدىك ون ەلدىڭ قاتارىندا شۆەيتساريا، يسلانديا، اۆستراليا، گەرمانيا، نيدەرلاند، نورۆەگيا، شۆەتسيا، گونكونگ، دانيا جانە سينگاپۋر بار.

ساراپشىلاردىڭ ايتۋىنشا، بۇل ەلدەر جوعارى تابىس دەڭگەيىمەن قاتار، ءتيىمدى مەملەكەتتىك باسقارۋ جۇيەسىمەن، تۇراقتى الەۋمەتتىك ساياساتىمەن جانە ازاماتتاردىڭ ءومىر ساپاسىن قامتاماسىز ەتەتىن قولايلى ورتامەن ەرەكشەلەنەدى. سونىمەن بىرگە، جۇمىس پەن جەكە ءومىر اراسىنداعى تەپە-تەڭدىك تە ماڭىزدى فاكتور رەتىندە باعالانعان.

ماماندار بۇل رەيتينگتىڭ نەگىزگى قورىتىندىسى رەتىندە جاھاندىق باسەكەنىڭ باعىتى وزگەرگەنىن اتاپ وتەدى. ياعني، مەملەكەتتەر ءۇشىن ەندى تەك ەكونوميكالىق ءوسىم ەمەس، ونىڭ ساپاسى ماڭىزدى. بۇل - حالىقتىڭ ءومىر ءسۇرۋ ۇزاقتىعى، ءبىلىم دەڭگەيى، مۇمكىندىكتەردىڭ قولجەتىمدىلىگى جانە جالپى تۇراقتىلىق ارقىلى ولشەنەتىن كورسەتكىشتەر.

قازاقستان نەشىنشى ورىندا؟

بۇل تىزىمدە قازاقستان 58-ورىنعا تۇراقتادى. ەلدىڭ يندەكس كورسەتكىشى – 79,53 بالل، ال ساناتى – «وتە جوعارى ءال-اۋقات».

بۇل – الدىڭعى ناتيجەمەن سالىستىرعاندا تومەندەۋ. 2024 جىلى قازاقستان 49-ورىندا بولعان ەدى . وسىلايشا، ەكى جىل ىشىندە ەل رەيتينگى شامامەن 9 پوزيتسياعا تومەندەگەن.

ساراپشىلاردىڭ باعالاۋىنشا، قازاقستان ورتالىق ازيا وڭىرىندە ءالى دە جەتەكشى پوزيتسياسىن ساقتاپ وتىر. دەگەنمەن جاھاندىق رەيتينگتەگى ورىننىڭ تومەندەۋى ەلدەگى ءال-اۋقات ءوسىمى مەن ونىڭ حالىق ومىرىنە اسەرى اراسىنداعى تەڭگەرىم ءالى تولىق قالىپتاسپاعانىن كورسەتەدى.

جالپى العاندا، قازاقستان «وتە جوعارى ءال-اۋقات» توبىنا ەنگەنىمەن، ۇزدىك ەلدەر قاتارىنا جاقىنداۋ ءۇشىن الەۋمەتتىك دامۋ، ينستيتۋتسيونالدىق ساپا جانە ءومىر ساپاسىن ارتتىرۋ باعىتىندا قوسىمشا ىلگەرىلەۋ قاجەت.

ال رەيتينگتە كورشىلەرىمىز وزبەكستان 104, قىرىعىزستان 110, قىتاي 72, رەسەي 60 ورىندا تۇر.

Abai.kz