انار رزاەۆتىڭ «قوناق ءۇي بولمەسى»، ارسلان قويشيەۆتىڭ «تۇقىمقۇرت»، سۇلتان راەۆتىڭ «توپان»، حايريددين سۇلتاننىڭ «باقىت جاعالاۋى» كىتاپتارى 2025 جىلى قازاقستان رەسپۋبليكاسى مادەنيەت جانە اقپارات مينيسترلىگى مەن قازاقستان جازۋشىلار وداعىنىڭ بىرلەسۋىمەن «مادەنيەت جانە ونەر سالاسىنداعى باسەكەلەستىكتى جوعارىلاتۋ، قازاقستاندىق مادەني مۇرانى ساقتاۋ، زەردەلەۋ مەن ناسيحاتتاۋ جانە ارحيۆ ءىسىنىڭ ىسكە اسىرىلۋ تيىمدىلىگىن ارتتىرۋ» باعدارلاماسى اياسىنداعى «ادەبيەتتىڭ الەۋمەتتىك ماڭىزدى تۇرلەرىن ساتىپ الۋ، باسىپ شىعارۋ جانە تاراتۋ» كىشى باعدارلاماسى نەگىزىندە وقىرمان قاۋىمعا جول تارتقان بولاتىن.

تۇساۋكەسەر بارىسىندا قازاقستان جازۋشىلار وداعى باسقارماسىنىڭ توراعاسى مەرەكە قۇلكەنوۆ بۇل كىتاپتار ءتىلى، ءدىلى، مادەنيەتى، سالت-ءداستۇرى مەن ادەت-عۇرىپتارى ۇقساس تۇركى حالىقتارىن بۇرىنعىدان دا جاقىنداستىرۋعا قىزمەت ەتەتىندىگىن اتاپ ءوتتى.

بۇعان قوسا، تۇساۋكەسەردە يسلام وركەنيەتى ورتالىعىنىڭ ديرەكتورى فيرداۋس ابدىحالىقوۆ، قىرعىز رەسپۋبليكاسى مەملەكەتتىك حاتشىسى، قىرعىزستاننىڭ حالىق جازۋشىسى ارسلان قويشيەۆ، حالىقارالىق TÜRKSOY ۇيىمىنىڭ باس حاتشىسى، قىرعىزستاننىڭ حالىق جازۋشىسى سۇلتان راەۆ، ازەربايجان جازۋشىلار بىرلىگىنىڭ توراعاسى، ازەربايجاننىڭ حالىق جازۋشىسى انار رزاەۆ، وزبەكستان جازۋشىلار وداعىنىڭ توراعاسى، وزبەكستاننىڭ حالىق اقىنى سيروجيددين سايد، تاتارستان جازۋشىلار وداعىنىڭ توراعاسى ركايل زايدۋللين، وزبەكستاننىڭ حالىق جازۋشىسى حايريددين سۇلتان ءسوز سويلەپ، ادەبي بايلانىستاردىڭ نىعايىپ كەلە جاتقانى تۋرالى ايتتى.

ايتا كەتەيىك، «تۇركى الەمىنىڭ ادەبيەتى» سەرياسى – قازاقستان رەسپۋبليكاسىندا تۇركى تىلدەس حالىقتاردىڭ ادەبي مۇراسىن ناسيحاتتاۋعا، ءوزارا مادەني بايلانىستى نىعايتۋعا جانە كوركەم اۋدارما سالاسىن دامىتۋعا باعىتتالعان ماڭىزدى مادەني باستاما. جوبانىڭ باستى ماقساتى – تۇركى ەلدەرى ادەبيەتىنىڭ ەڭ ۇزدىك شىعارمالارىن قازاق تىلىنە اۋدارىپ، شىعارۋ.