رەسەيدە جۇرگەن يراننىڭ سىرتقى ىستەر ءمينيسترى اراكچي سانكت-پەتەربۋرگتە بۇرىنعى كەلىسسوزدەر «ءبىرشاما ىلگەرىلەۋشىلىككە قول جەتكىزگەنىمەن»، امەريكا قۇراما شتاتتارىنىڭ «شامادان تىس تالاپ قويۋىنا» بايلانىستى كەلىسىمگە كەلە الماعانىن مالىمدەدى. اراكچي اقپان ايىنىڭ سوڭىندا سوعىس باستالعاننان بەرى الەم جۇرتىنىڭ «يراننىڭ شىنايى قۋاتىنا كۋا بولعانىن» اتاپ ءوتىپ، «يران بيلىگى ءالى دە تۇراقتى، قۋاتتى جانە ءتوزىمدى» دەدى.

ءوز كەزەگىندە كرەمل يراندى قولدايتىنىن تاعى دا قايتالادى. پۋتين رەسەيدىڭ «بەيبىتشىلىكتى ىلگەرىلەتۋگە  بارلىق كۇش-جىگەرىن سالاتىنىن» جانە يرانمەن ستراتەگيالىق قارىم-قاتىناستاردى جالعاستى دامىتا بەرەتىنىن قاداپ ايتتى. يران حالقىنىڭ ەلدىگىن ساقتاۋدا كورسەتكەن "ەرىك-جىگەرى مەن قايسارلىعىنا" ماقتاۋ ايتتى.

ورمۋز بۇعازى بويىنشا داۋ ۋشىعىپ بارادى.

يران پارلامەنتى ورمۋز بۇعازىن اسكەري باقىلاۋعا الۋ تۋرالى زاڭ جوباسىن دايىنداۋدا. بۇل جوسپار بويىنشا يزرايلدىك كەمەلەرگە عانا وتۋگە تىيىم سالىنادى، ال باسقا كەمەلەرگە جول اشىق، تەك يران ۆاليۋتاسىمەن ءوتۋ اقىسىن تولەسە بولعانى.

اقش مەملەكەتتىك حاتشىسى ماركو رۋبيو «اقش يراننىڭ حالىقارالىق سۋ جولدارىن پايدالانۋداعى ۇستەمدىگىنە جانە اقى تولەۋ جۇيەسىن قۇرۋىنا توزە المايدى» دەپ مالىمدەدى. بۇۇ حالىقارالىق تەڭىز ۇيىمىنىڭ باسشىسى ارسەنيو دومينگەس مۇنداي شارالاردىڭ «حالىقارالىق قۇقىقتا ەشقانداي نەگىزى جوق» ەكەنىن اتاپ ءوتتى.

بۇۇ قاۋىپسىزدىك كەڭەسى دۇيسەنبى كۇنى كەشكە قاراي نيۋ-يوركتە تەڭىز قاۋىپسىزدىگىن تالقىلادى.

قاقتىعىسقا دەيىن الەمدەگى مۇناي مەن سۇيىتىلعان تابيعي گازدىڭ شامامەن 20%-ى تاسىمالدانعان ورمۋز بۇعازى قازىرگى ۋاقىتتا ەكى تاراپتىڭ دا قورشاۋىندا قالدى، بۇل الەمدىك ەكونوميكاعا قاتتى اسەر ەتۋدە.

ليۆان مايدانىندا يزرايل كۇشتەرى مەن يراندى جاقتايتىن حەزبوللا سودىرلارى ءبىر-بىرىنە شابۋىل جاساۋدى جالعاستىرۋدا.

يزرايل پرەمەر-ءمينيسترى نەتانياحۋ حەزبوللانىڭ «122 ءتيپتى زىمىراندارى مەن دروندارى – ەكى ۇلكەن قاۋىپ» ەكەنىن مالىمدەدى.

جەكسەنبى كۇنى ءيزرايلدىڭ ليۆاننىڭ وڭتۇستىگىندەگى اۋە شابۋىلدارى 14 ادامنىڭ، ونىڭ ىشىندە ەكى بالانىڭ ءومىرىن قيدى، بۇل اتىستى توقتاتۋ باستالعان بەرگى ەڭ قاندى كۇن بولدى. ليۆان تارابى 17 ساۋىردە اتىستى توقتاتۋ باستالعالى بەرى ءيزرايلدىڭ اسكەري وپەراتسيالارىندا كەمىندە 36 ادامنىڭ قازا تاپقانىن مالىمدەدى. 2 ناۋرىزدا قاقتىعىس ۋشىققالى بەرى 2500-دەن استام ليۆاندىق سارباز، 16 يزرايلدىك سارباز قازا تاپتى.

حەزبوللا جەتەكشىسى نايم كاسسەم يزرايلمەن تىكەلەي كەلىسسوزدەردەن باس تارتاتىنىن قايتالاپ، مۇنداي قادام ليۆاندى «جاڭا تۇراقسىزدىق تسيكلىنە ۇرىندىرادى» دەپ مالىمدەدى.

Abai.kz