اقش پرەزيدەنتى ترامپ ءساۋىردىڭ 29-كۇنى الەۋمەتتىك جەلى ارقىلى گەرمانياداعى اسكەرلەرىن قىسقارتاتىنىن جازعان ەدى. مايدىڭ ءبىرى كۇنى پەنتاگون گەرمانيادان 5 مىڭ اسكەرىن 6-12 اي ارالىعىندا الىپ كەتەتىنىن رەسمي مالىمدەدى. سوڭعى دەرەك بويىنشا گەرمانيادا 36 مىڭ اقش اسكەرى بار.

2 مامىردا گەرمانيانىڭ قورعانىس ءمينيسترى پيستوريۋس ترامپتىڭ شەشىمىنە بايلانىستى باق-قا بەرگەن سۇحباتىندا اقش-تىڭ گەرمانيادان شامامەن 5000 اسكەرىن شىعارۋ جوسپارىن الدىن الا بىلگەندەرىن جەتكىزىپ، ەۋروپا ەلدەرىنىڭ ءوز قاۋىپسىزدىگى ءۇشىن ۇلكەن جاۋاپكەرشىلىكتى ءوز موينىنا الۋى كەرەك ەكەنىن اتاپ ءوتتى. ول گەرمانيا بۇل تۇرعىدا دۇرىس جولدا ەكەنىن، اسكەري كۇشتەرىن كەڭەيتۋ جانە ينفراقۇرىلىمدى دامىتۋدى ىلگەرىلەتۋ سياقتى شارالار ارقىلى قورعانىس مۇمكىندىكتەرىن ارتتىرىپ جاتقانىن مالىمدەدى.

امەريكا قۇراما شتاتتارى ناتو وداقتاستارىنىڭ كوپشىلىگىنە حابارلاماي يرانعا قارسى سوعىس اشقاننان كەيىن ەۋروپالىق ليدەرلەر مەن ترامپ اكىمشىلىگى اراسىنداعى كەلىسپەۋشىلىك كۇشەيە ءتۇستى. گەرمانيا مەن امەريكا قۇراما شتاتتارىنىڭ كوشباسشىلارى جاقىندا يرانداعى جاعدايعا قاتىستى كەلىسپەۋشىلىكتەرىن اشىق ءبىلدىردى. گەرمانيا باسشىسى «ترامپتىڭ ەشقانداي سوعىس ستراتەگياسى جوق» دەپ مالىمدەدى. ترامپ وعان وت الىپ، قوپاعا ءتۇستى.

ترامپ اكىمشىلىگىنىڭ جاريا مالىمدەمەسى اقش-تىڭ ءوز ىشىندە دە داۋ تۋدىردى. اقش كونگرەسىنىڭ قارۋلى كۇشتەر كوميتەتتەرىنىڭ ەكى توراعاسى باسقاشا ويلارىن ءبىلدىردى.

Reuters اگەنتتىگىنىڭ حابارلاۋىنشا، سەنات پەن وكىلدەر پالاتاسىنىڭ قارۋلى كۇشتەر كوميتەتتەرىن باسقاراتىن سەناتور رودجەر ۋيكەر مەن وكىل مايك رودجەرس بىرلەسكەن مالىمدەمەسىندە: «ءبىز اقش بريگاداسىن گەرمانيادان شىعارۋ تۋرالى شەشىمگە قاتتى الاڭدايمىز» دەلىنگەن. ۋيكەر مەن رودجەرس ەۋروپاداعى اقش اسكەري كۇشتەرىنە قاتىستى كەز كەلگەن ماڭىزدى وزگەرىستەر كونگرەسس پەن اقش وداقتاستارىنىڭ قاداعالاۋى ارقىلى جۇزەگە اسۋى قاجەت ەكەنىن اتاپ وتكەن. سونداي-اق سوعىس ءمينيسترىن الداعى كۇندەرى بۇل ماسەلەگە بايلانىستى كونگرەستىڭ باقىلاۋ ورگاندارىمەن بايلانىسقا شىعۋىن تالاپ ەتكەن.

ەكەۋى سونداي-اق ەۋروپاداعى اقش اسكەرلەرى مەرزىمىنەن بۇرىن قىسقارتۋ "ناتو-نى السىرەتىپ، رەسەي پرەزيدەنتى پۋتينگە قاتە سيگنال جىبەرۋى مۇمكىن" ەكەنىن باسا ايتقان. ولار اقش اسكەرلەرى ەۋروپادان كەتپەۋى، كەرىسىنشە شىعىس ەۋروپاعا كوشىرىلۋى كەرەك دەپ سانايدى.

Abai.kz