قازاقستان رەسپۋبليكاسى پرەزيدەنتىنىڭ
                                               قۇقىقتىق ماسەلەلەر جونىندەگى كومەكشىسى
                                               ە.ن. جيەنباەۆ مىرزاعا! 

                                               مەملەكەتتىك قۇقىق ءبولىمىنىڭ
                                               مەڭگەرۋشىسى ا.ت. جارىلعانوۆ مىرزاعا!

قۇرمەتتى ەرجان نۇرلانۇلى!

قۇرمەتتى ايدار تولەتايۇلى!

جاقىندا «شەتەلدىكتەر مەن ازاماتتىعى جوق ادامدارعا قازاقستان رەسپۋبليكاسىندا تۇراقتى تۇرۋعا رۇقسات بەرۋ» جانە «قانداس مارتەبەسىن بەرۋ نەمەسە ۇزارتۋ» مەملەكەتتىك كورسەتىلەتىن قىزمەتتەرى بويىنشا پيلوتتىق جوبا تۋرالى سىزدەردىڭ اتتارىڭىزعا جەكە-جەكە «ۇكىمەت قانداستاردى زاڭ ەمەس، قۇجات ارقىلى باسقاراتىن بولدى!» دەگەن اتپەن ارناي حات جازىپ (جت-2026-01496722, جت-2026-01496721), مەنى ءسوزسىز جەكە قابىلداۋلارىڭىزدى جانە پرەزيدەنت اكىمشىلىگى مەملەكەتتىك قۇقىق ءبولىمى  زاڭگەرلەرىمەن ارنايى كەزدەسۋ ۇيىمداستىرىپ بەرۋلەرىڭىزدى سۇراعام!

ەكەۋىڭ دە پىسقىرىپ قاراعان جوقسىزدار!

ءوتىنىشىمدى «پيلوتتىق جوبانى» جاساعان ءۇش مينيسترلىككە لاقتىرا-لاقتىرا سالدىڭىزدار!

ەڭبەك جانە حالىقتى الەۋمەتتىك قورعاۋ مينيسترلىگى: «ءسىز ءىىم باسشىلىعىنىڭ قابىلداۋىندا تۇرعان ازاماتتاردىڭ تىزىمىنە ەنگىزىلگەنىڭىزدى حابارلايمىز...», - دەپ جاۋاپ بەردى;

ىشكى ىستەر مينيسترلىگى دە: «ءسىزدىڭ ءوتىنىشىڭىزدى قاراپ جەكە جانە زاڭدى تۇلعالاردى قابىلداۋ كەستەسىنە سايكەس 2026 جىلدىڭ 26 مامىرىندا وتەتىن مينيستر ا.م. ەرتاەۆتىڭ قابىلداۋىنا جازىلعانىڭىزدى حابارلايدى...», - دەگەن جاۋاپ قايتاردى;

ال، سىرتقى ىستەر مينيسترلىگى: «ءسىزدىڭ حاتىڭىزدا كورسەتىلگەن قازاقستان رەسپۋبليكاسىندا تۇراقتى تۇرۋعا، ونىڭ ىشىندە قانداس مارتەبەسىن الۋعا ۇمىتكەرلەر ءۇشىن 5 كەزەڭنەن تۇراتىن تسيفرلىق باعالاۋ: قازتەست تسيفرلىق جۇيەسى ارقىلى ونلاين فورماتتا تەستىلەۋ تاپسىرۋ، ساۋالناما تولتىرۋ ارقىلى شەكتىك بالل جيناۋ جانە اڭگىمەلەسۋدەن ءوتۋ، سونىمەن قاتار سوتتالماعانى تۋرالى انىقتاما مەن شىعۋ پاراعىن ۇسىنۋ ماسەلەلەرى جوعارىدا اتالعان كوشى-قون سالاسىنداعى قۇزىرلى مەملەكەتتىك ورگاندار تاراپىنان قاراستىرىلۋى قاجەت دەپ سانايمىز...», - دەپتى.

اتالعان مينيسترلىكتەر مەن ۇكىمەت باسشىسى ولجاس بەكتەنوۆتىڭ اتىنا تىكە جازعان حاتتارىما دا وسىنداي جاۋاپتار الدىم...

قۇرمەتتى ەرجان نۇرلانۇلى!

قۇرمەتتى ايدار تولەتايۇلى! 

اشىعىن ايتايىن، اتالعان «پيلوتتىق جوباعا» قاتىستى تۋىنداعان كەلەڭسىزدىڭتىڭ ءبارى ءسىز ەكەۋىڭىزگە بارىپ تىرەلۋدە. بارلىق ماسەلەگە سىزدەر جاۋاپ بەرۋلەرىڭىز كەرەك!

جاقىندا پرەزيدەنتتىڭ اتىنا ارنايى «اشىق حات» جازىپ، قولدانىستاعى «حالىقتىڭ كوشى-قونى تۋرالى» زاڭنىڭ 20-بابىنىڭ 5) تارماعىننىڭ اتاجۇرتىنا ورالعان ەتنيكالىق قازاقتارعا قويىلعان وڭىرلىك شەكەتۋ ەكەنىن ايتىپ، اتالعان 20-باپتىڭ 5) تارماعى «ازاماتتىق جانە ساياسي قۇقىقتار تۋرالى حالىقارالىق پاكتىنىڭ» (نيۋ-يورك، 1966 ج. 16 جەلتوقسان) 12-بابىنىڭ 1 تارماعى مەن قازاقستان رەسپۋبليكاسى كونستيتۋتسياسىنىڭ 21-بابىننىڭ 1 تارماعىنا مۇلدە قايشى ەكەنىن، بار بالەنىڭ 2023 جىلى 19 ساۋىردە قابىلدانعان وسى نورمادان باستالعانىن ايتتىم.

سونداي-اق، «پيلوتتىق جوباداعى» «قانداس» مارتەبەسىن بەرۋ ءتارتىبى «حالىقتىڭ كوشى-قونى تۋرالى» زاڭىنىڭ 25-بابىنىڭ 3) تارماعىنا مۇلدە ساي ەمەس ەكەنىن; «قازتەست» تەستىلەۋ جۇيەسى ارقىلى قازاق تىلىنەن ەمتيحان تاپسىرۋ دەگەن تالاپتىڭ «قازاقستان رەسپۋبليكاسىنىڭ ازاماتتىعى تۋرالى» زاڭىنىڭ 17-بابىنا قايشى ەكەنىن باياندادىم...       

قۇرمەتتى ەرجان نۇرلانۇلى!

قۇرمەتتى ايدار تولەتايۇلى!

كونستيتۋتسيانىڭ 69-بابىندا: «3. ۇكىمەتتىڭ قاۋلىلارى جانە پرەمەر-ءمينيستردىڭ وكىمدەرى كونستيتۋتسياعا، زاڭ اكتىلەرىنە، رەسپۋبليكا پرەزيدەنتىنىڭ جارلىقتارى مەن وكىمدەرىنە قايشى كەلمەۋگە ءتيىس», - دەگەن نورما تۇر!

سوندا، ايتىڭىزدارشى، «قازاقستان رەسپۋبليكاسى پرەزيدەنتىنىڭ قۇقىقتىق ماسەلەلەر جونىندەگى كومەكشىسى» جانە «مەملەكەتتىك قۇقىق ءبولىمىنىڭ مەڭگەرۋشىسى» دەگەن لاۋازىم يەسى بولعان سىزدەر وسىنداي كەلەڭسىزدىككە جول بەرىپ قويىپ، قايدا قاراپ وتىرسىزدار؟! بۇل – ءبىر!

ەكىنشى, مەملەكەت باسشىسىنىڭ «مەملەكەتتىك اپپاراتتىڭ باستى مىندەتى – ازاماتتاردى تولعاندىراتىن وزەكتى ماسەلەلەردى شەشۋ. ول ءۇشىن، ەڭ الدىمەن، ازاماتتارمەن ۇدايى بايلانىستا بولۋ كەرەك. ونسىز بولمايدى. سوندىقتان حالىقتان كەلىپ تۇسەتىن وتىنىشتەرگە ايرىقشا نازار اۋدارۋ قاجەت...», - دەگەن تاپسىرماسى بار.

قاسىم-جومارت كەمەلۇلى بۇل ءسوزدى 2025 جىلعى 28 قاڭتاردا وتكەن ۇكىمەتتىڭ كەڭەيتىلگەن وتىرىسىندا ايتتى.

مەن پرەزيدەنتتىڭ بۇل ءسوزىن سارى مايداي ساقتاپ ءجۇرمىن!

ال، سەن ەكەۋىڭ اقوردادا وتىرىپ، قاسەكەڭنىڭ بۇل ءسوزىن ۇمىتىپ كەتتىڭدەر نەمەسە، قۇلاقتارىڭا ىلگەن جوقسىڭدار! مەن ەكەۋىڭە حات جازىپ، قابىلداۋلارىڭدى سۇرادىم.

سەندەر «پيلوتتىق جوباعا» بايلانىستى مەن كوتەرگەن ماسەلەنى شەشۋ تۇرماق، مەنى جەكە-جەكە قابىلداپ، سويلەسۋگە دە جاراعان جوقسىزدار!

دەمەك، سىزدەر ءۇشىن پرەزيدەنتتىڭ مۇنداي تاپسىرماسىنىڭ قۇنى – كوك تيىن دەگەن ءسوز!

قۇرمەتتى ەرجان نۇرلانۇلى!

قۇرمەتتى ايدار تولەتايۇلى!

قاسىم-جومارت توقاەۆ جاي ادام ەمەس، الەمدىك دەڭگەيدەگى ديپلومات! بۇگىندە ول – بۇكىل دۇنيەجۇزى مويىنداعان تۇلعا!

مەن قاسىم-جومارت كەمەلۇلىن الەمنىڭ ءۇش سۋپەر دەرجاۆاسىنىڭ ۇشەۋىنىڭ دە پرەزيدەنتىنەن ارتىق دەپ باعالايمىن!

قۇدايعا تاۋبە، قازاقستاندا دا قاسەكەڭدى قولدايتىن ازاماتتاردىڭ سانى از ەمەس، جەتەرلىك!

بىراق، ءبىلىپ قويىڭدار، سونىڭ ىشىندە قاسىم-جومارت اعانى ەرەكشە قودايتىن ەكى-اق ادام بار.

ونىڭ بىرەۋى – «قاڭتار» كوتەرىلىسىنەن كەيىن پرەزيدەنتتىڭ قاسىنا تابىلىپ، قاسىم-جومارت كەمەلۇلىنىڭ ادىلەتتى قازاقستان يدەياسىن جانە زاڭ مەن ءتارتىپ قاعيداتىن جۇزنگە اسىرۋعا بارىن سالىپ قولداپ كەلە جاتقان كورنەكتى مەملەكەت جانە قوعام قايراتكەرى، قازاقستان رەسپۋبليكاسى پارلامەنتى ءماجىلىسىنىڭ دەپۋتاتى ەرمۇرات باپي;

ەكىنشىسى – جيرما جىلدان بەرى ەكى پرەزيدەنتتىڭ دە كوشى-قون ساياساتىمەن تىنباي اينالىسىپ كەلە جاتقان مەن – اۋىت مۇقيبەك!

ەرمۇرات سەيىتقازىۇلى ادىلەتتى قازاقستان يدەياسىن جانە زاڭ مەن ءتارتىپ قاعيداتى ءۇشىن بارىنە ماقۇل. ءتىپتى، «ەلىمىزدىڭ ۇلتتىق قورعانىس قاۋىپسىزدىگى مەن تاۋەلسىزدىكتىڭ تۇراقتىلىعى، مەملەكەتتىك مۇددەمىز جولىندا «ادام قۇقىعى» ۇعىمىن ەكىنشى كەزەككە ءتۇسىرۋ قاجەتتىلىگى وتكىرلەنگەن كەزدە ءبىز پارلامەنتتى دەموكراتيالىق مىلجىڭعا باتىرىپ قويىپ، وتىرا الامىز با؟», - دەگەنگە دەيىن باردى ەرەكەڭ.

قاتەلەسسەم، ەراعام كەشىرىپ قويسىن، بۇل – «داۋلاسىپ قايتەمىز، ءبارىن قولداپ وتىرا بەرەيىك!»، -دەگەن ءسوز دەپ ءتۇسىندىم مەن!

ال، مەنىڭ قولداۋ ءتاسىلىم ەراعانىكىنەن ءسال باسقاشالاۋ.

مەن، زاڭ شىعارۋشى ورگان مەن اتقارۋشى بيلىكتىڭ جانە سىزدەر سەكىلدى اسا جاۋاپتى لاۋازىمدى تۇلعالار تاراپىنان پرەزيدەنتتىڭ بەدەلىنە نۇقسان كەلتىرەتىن وسىنداي قاتەلىكتەردى تىنباي كوتەرىپ، ونىڭ وڭ شەشىلۋىنە ىقپال ەتۋمەن كەلەمىن...

قىسقاسى، ەرمۇرات باپيدى بۇكىل الاش جۇرتى بىلەدى، قۇرمەتتەيدى. مەنى بۇكىل دۇنيەجۇزىندەگى ۇلى كوشكە مۇددەلى قاۋىم تانيدى، باسىنا كۇن تۋعاندا ءبىرىنشى ماعان جۇگىنەدى.

ءبىر سوزبەن ايتقاندا، ەراعاڭ ەكەۋمىز دە – اسا تانىمال تۇلعالارمىز!

ال، سىزدەردى سونشالىقتى ەشكىم تانىپ جاتقان جوق!

«پيلوتتىق جوباداعى» مەن اتاپ كورسەتكەن كەلەڭسىزدىكتەرگە سىزدەردىڭ جول بەرىپ وتىرعاندارىڭىزدى قارپايىم جۇرت بىلمەيدى.

مۇنىڭ ءبارىن جاساپ وتىرعان قاسىم-جومارت توقاەۆ دەپ ويلايدى.

«سەندەردىڭ شاڭ جۋىتباي ماقتاپ كەلە جاتقان توقاەۆتارىڭنىڭ ءتۇرى وسى ما؟!»، - دەپ، جۇرت ونى ءبىزدىڭ بەتىمىزگە شىجعىرىپ تۇرىپ باسادى، باسىپ تا جاتىر...

سەندەر مىنا بىلىكسىزدىكتەرىڭمەن، ارەكەتسىزدىكتەرىڭمەن قاسىم-جومارت اعانىڭ ساعىن سىندىرىپ، تۋعان حالقىنىڭ الدىندا بەدەلىن تۇسىرگەلى وتىرسىڭدار! بىراق، سەندەردىڭ تۇكتەرىڭىز دە كەتپەيدى!

ەگەر، لاۋازىمدارىڭىڭنان بوساتىلىپ جاتساڭدار، رۋسلان جەلدىباي قۇساپ، ءبىر-اق كۇندە ۇمىتىلاسىڭدار، جۇرت كوڭىلىنەن تەز وشەسىڭدەر. بەتتەرىڭ بۇلك ەتپەستەن، ەرتەڭ تاعى ءبىر ورىنعا بارىپ، قونجيىپ-قونجيىپ وتىرا كەتەسىڭدەر. سىزدەرگە راحات! سوڭىندا، بارلىق زارداپتى تارتاتىن – حالىق. بارلىق كۇنا مەن سىن قاسىم-جومارت اعاعا ارتىلادى. بارلىق ۇيات پەن تاباعا قالاتىن – قاسەكەڭدى قولداپ جۇرگەن ەرمۇرت باپي اعا ەكەۋمىز.

ونى قويىپ، ەرتەڭ قاسىم-جومارت كەمەلۇلى، قۇداي بۇيىرىپ، بىرىككەن ۇلتتار ۇيىمىنىڭ توراعاسى بولىپ بارسا، مىنا ماسەلە الدىنان شىقپاي ما؟!

سىن ساعاتتا بىرەۋ شىعىپ، «پيلوتتىق جوباداعى» كەلەڭسىزدىكتەردى العا تارتىپ، «بۇۇ جوعارى وكىلدەرىنىڭ قاقتىعىستارعا ارااعايىندىق جاساعانىن كورە بەرمەيمىز. بۇل ويلاناتىن ماسەلە. دەمەك بۇۇ-نىڭ ءرولى تومەندەپ كەتتى دەگەن ءسوز. مەن وعان قاتتى الاڭدايمىن...»,-دەۋشى ەدىڭ، ءوز ەلىڭدى نەگە دۇرىستاپ المايسىڭ دەسە، ماسقارا بولامايمىز با؟!

سەندەر ماسەلەنىڭ وسى جاعىن ويلادىڭدار ما؟!

ءاي، قايدام!!

ويلاساڭدار، مەنى بىردەن قابىلداپ، «پيلوتتىق جوباداعى» كەلەڭسىزدىكتەردى جويۋعا الدەقاشان كىرىسىپ كەتەر ەدىڭدەر عوي...

قۇرمەتتى ەرجان نۇرلانۇلى!

قۇرمەتتى ايدار تولەتايۇلى!

ەندى وسى ماسەلەگە بايلانىستى، سىزدەرگە سول ەكى ءوتىنىشىمدى قايتالايمىن:

ءبىرىنشى، مەنى ءسوزسىز جەكە قابىلداۋىڭىزدى;

ەكىنشى، ماعان پرەزيدەنت اكىمشىلىگى مەملەكەتتىك قۇقىق ءبولىمىنىڭ  زاڭگەرلەرىمەن ارنايى كەزدەسۋ ۇيىمداستىرىپ بەرۋلەرىڭىزدى سۇرايمىن!

مىنا ماسەلەنى تەز شەشۋىمىز كەرەك. ايتپەسە، قاسىم-جومارت اعانى ۇيات كەلەدى. 

ەسكەرتۋ: «“پيلوتتىق جوبا” نە دەيدى، كونۆەنتسيا مەن كونستيتۋتسيا نە دەيدى؟!» اتتى «قالا مەن دالا» گازەتىندە جانە «ABAI.KZ» سايتىندا جاريالانعان «اشىق حات» پەن «پيلوتتىق جوبانىڭ» كەسىرىنەن ازاماتتىق الا الماي قالعان ەكى ءجۇز سەكسەننەن استام وتباسىنىڭ ءتىزىمى جانە گازەتتىڭ فوتوسى قوسا تىركەلدى.

قۇرمەتپەن،

اۋىت مۇقيبەك،

«ەرەن ەڭبەگى ءۇشىن» مەدالىنىڭ، «قۇرمەت» وردەنىنىڭ يەگەرى

Abai.kz