باياعىدا ءبىر تەنتەك اتامىز ايتقان ەكەن: «بارىمىزدە اكەمىزدى ساباۋشى ەدىك، بىراق ارباعا بايلاپ قويىپ ساباعاندى ءبىرىنشى رەت كوردىك»، - دەپ. پارلامەنتتىڭ تومەنگى پالاتاسىنىڭ حالىق قالاۋلىلارى الەمدە جوق «ۇلت سايلاۋشىلارىنىڭ نامىسىن ارباعا بايلاپ قويىپ ساباۋدىڭ» نەبىر اتاسىن ومىرگە اكەلە باستادى.

بۇعان دەيىن ءماجىلىس دەپۋتاتتارىنىڭ اراسىندا «ەل ماقتاعان قىز تويدا جەل شىعارادىنىڭ» كەرىن جاساعان ارداق نازاروۆتان باستالعان كەسپاتىڭ تولقىنىن ءىلىپ اكەتكەن ارىپتەسى داۋلەت مۇقاەۆ بۇل ەستافەتانى«گەشتالت جابۋ» فورماتىندا جالعاستىرىپ، ايەلىن تۋعان كۇنىندە قر پارلامەنتى ءماجىلىسىنىڭ رەسمي حاتىمەن قۇتتىقتايمىن دەپ ەلدىڭ تاباسىنا قالدى.

دەپۋتات بەينەجازبادا ايەلىنىڭ گەشتالتىن جاپقىسى كەلگەنىن ايتىپ، «پارلامەنت تاراماي تۇرعاندا قولدا بار مۇمكىندىكتى پايدالانىپ قالدىم»،–دەيدى. دەپۋتاتتىڭ بۇل قىلىعانا كۇيىنگەن جۇرت: «ارداقتان كەم تۇسكەن جوق»، «ۇيات-اي»، «دەپۋتاتتىق مادەنيەت قايدا كەتكەن؟» «دەپۋتاتتارىمىز بىلگەنىن ىستەدى عوي»، «ءبارى جاپپاي تىلەك ايتۋعا شىققان با؟»، «پارلامەنتتىڭ بەدەلىن ءتۇسىردى»،– دەپ ءوز ويلارىن ورتاعا سالدى.

ونىڭ  بۇل ارەكەتى ارىپتەستەرىمىزدىڭ دە نازارىنا تىس قالعان جوق، جۋرناليستەر گۇلبانۋ انياتقىزى مەن دياس نۇراقىن جازبا ارناپ، مەيماناسى اسقان دەپۋتاتسىماققا وڭدىرماي الەۋمەتتىك جەلىدە سوققى بەردى.

گۇلبانۋ انياتقىزى: «كارتوپ قىمباتتاعاندا دەپۋتات باسىمەن ماسەلەنى كوتەرۋدىڭ ورنىنا ايەلىنە كارتوپتان بۋكەت سىيلاعاندا «اقىلىنىڭ جەتكەنى سول شىعار» دەپ كۇلىپ قويا سالعانبىز. ەندى مىنە، زاڭ شىعارۋشى ورگاننىڭ اتاۋىن ايەلىن قۇتتىقتاۋعا پايدالانىپ، ونىسىن «گەشتالت جاپتىق» دەپ تۇر. ءار دەپۋتات 5 مىڭ تەڭگەگە ساتىپ الىپ، ايەلىن، تۋعان-تۋىسىن، قۇدا-جەكجاتىن پارلامەنتتىڭ اتىنان قۇتتىقتاي بەرسە، جەتىسكەن ەكەنبىز. كەتۋىنە ءبىر جارىم اي قالعاندا قويشى دەپ ەم، بىراق مىنا كونتسەرتىنە شىدامادىم. كلاستاسىما كۇلىپ ەك، مىناۋىڭ ودان قالىسىپ تۇرعان جوق»، – دەپ الەۋمەتتىك جەلىدە قىنجىلا جازسا.

دياس نۇراقىن ۇلتتىڭ قانىن باسىنا شىعارعان بۇل تايتىكتىگىنە شۇيلىكتى:

«ارداق نازاروۆ اناسىن ءماجىلىس مىنبەرىنەن قۇتتىقتاپ ەدى. ەندى داۋلەت مۇقاەۆ دەگەن دەپۋتات ايەلىنىڭ تۋعان كۇنىنە پارلامەنتتىڭ اتىنان ادرەسات جاساتىپتى. گەشتالتىن جاپقىم كەلدى دەيدى. زاڭ شىعارۋشى ورگان گەشتالت جاباتىن جەرگە اينالعان با؟ مىنالارعا توقتام سالماساق، الداعى ۋاقىتتا اۋرۋلارى اسقىنىپ، قۇدا-جەكجاتىن اقوردانىڭ اتىنان قۇتتىقتاپ، توي-تومالاققا پرەزيدەنتتىڭ «العىس حاتىن» اپارۋدان تايىنبايدى»، – دەپ جازدى جۋرناليست دياس نۇراقىن.

اتىڭ شىقپاسا جەر ورتە دەگەندەي،  ارداق نازاروۆتان اسىپ ءتۇسىپ، ءماجىلىستى مازاق قىلعان مۇقاەۆتىڭ بۇل ارەكەتى دەپۋتاتتىق مادەنيەتكە جات ەكەنىن  ءماجىلىس ءوز دەپۋتاتىنا ۇقتىرا الا ما، قانداي شارا قولدانادى وسى جاعى جۇرتقا قىزىق بولا ءتۇستى. ءماجىلىستى بالانىڭ ويىنا اينالدىرىپ، ويلارىنا كەلگەندى ىستەيتىن ارداق پەن داۋلەتتىڭ بۇل تىرلىگى ونسىزدا ماجىلىستەن كوڭىلى قالعان جۇرتتى جەرگە ءبىر تۇكىرتكەنى انىق.

ءابىل-سەرىك الىاكبار

Abai.kz