قازاقستان ەاەو ەلدەرى اراسىندا ونەركاسىپ ءوسىمى بويىنشا كوشباسشىلاردىڭ قاتارىنا ەندى. ەۋرازيالىق ەكونوميكالىق كوميسسياسى جاريالاعان كورسەتكىشتەرگە سايكەس، 2025 جىلدىڭ قاڭتار-جەلتوقسان ايلارىندا ەلىمىزدەگى ونەركاسىپ ءوندىرىسىنىڭ كولەمى 2024 جىلدىڭ وسى كەزەڭىمەن سالىستىرعاندا 7,5%-عا ارتقان.

ەەك دەرەگىنشە، 2025 جىلى ەاەو ەلدەرىندەگى ونەركاسىپ ءوندىرىسىنىڭ جالپى كولەمى وتكەن جىلدىڭ دەڭگەيىمەن سالىستىرعاندا 101,6%-دى قۇراعان. بۇل رەتتە قازاقستان وداققا مۇشە مەملەكەتتەر اراسىنداعى ەڭ جوعارى ءوسىم كورسەتكەن ەلدەردىڭ ءبىرى بولدى. كوش باسىندا ونەركاسىپ ءوندىرىسى 10,6%-عا وسكەن قىرعىزستان تۇر.

جىل قورىتىندىسى بويىنشا ارمەنيادا ونەركاسىپ ءوندىرىسى 4,7%-عا، رەسەيدە 1,3%-عا وسكەن. ال ەاەو ەلدەرى ىشىندە ءوندىرىس كولەمى تومەندەگەن جالعىز مەملەكەت – بەلارۋس. وندا كورسەتكىش 1,8%-عا ازايعان.

سونداي-اق كوميسسيا 2025 جىلدىڭ جەلتوقسان ايىنداعى مالىمەتتەردى دە جاريالادى. قازاقستاندا ونەركاسىپ ءوندىرىسى 2024 جىلدىڭ جەلتوقسانىمەن سالىستىرعاندا 8,1%-عا وسكەن. ال 2025 جىلدىڭ قاراشاسىمەن سالىستىرعاندا ءوسىم 10,4%-دى قۇراعان.

جالپى ەاەو بويىنشا جەلتوقساندا ونەركاسىپ ءوندىرىسى ءبىر جىل ىشىندە 3,9%-عا ارتقان. ەڭ جوعارى ءوسىم ارمەنيادا تىركەلىپ، كورسەتكىش بىردەن 38,6%-عا جەتكەن. قىرعىزستاندا ءوسىم 10,4%، قازاقستاندا 8,1%، رەسەيدە 3,7% بولعان. ال بەلارۋستا، كەرىسىنشە، ءوندىرىس كولەمى 2,9%-عا تومەندەگەن.

ەسەپتە 2024 جىلى ەاەو ەلدەرىندەگى ونەركاسىپ ءوندىرىسى 2023 جىلمەن سالىستىرعاندا جالپى 5%-عا وسكەنى دە ايتىلعان. سول جىلى قازاقستاندا دا وڭ ديناميكا بايقالىپ، ءوسىم 2,8%-دى قۇراعان.

ەەك جاريالاعان ستاتيستيكالىق مالىمەتتەردىڭ الدىن الا ەكەنى جانە كەيىن ناقتىلانۋى مۇمكىن ەكەنى اتاپ ءوتىلدى. سونداي-اق كوميسسيا رەسەيدىڭ 2024-2025 جىلدارعا ارنالعان ونەركاسىپ ءوندىرىسى ستاتيستيكاسىن ناقتىلاۋىنا بايلانىستى ەاەو بويىنشا دەرەكتەردىڭ قايتا ەسەپتەلگەنىن حابارلادى.

Abai.kz