Financial Times رەسەي كوشباسشىسىمەن بايلانىستا بولعان ەكى دەرەككوزگە سىلتەمە جاساپ: «رەسەي اسكەري قولباسشىلىعى پرەزيدەنت ۆلاديمير ءپۋتيندى بۇكىل دونباسستى (ۋكراينانىڭ دونەتسك وبلىسى) كۇزگە قاراي باسىپ الۋدى اياقتايتىنىنا سەندىردى»، دەپ جازعانىن ازاتتىق راديوسىنىڭ ورىس قىزمەتى العا تارتادى.

باسىلىم سۇحباتتاستارىنىڭ ايتۋىنشا، دونباسستى باسىپ الۋ مۇمكىندىگىنەن كەيىن پۋتين «كەز كەلگەن وق اتۋدىڭ ساياسي باعاسىن كوتەرۋدى» جوسپارلاپ وتىر. ۋكراينا قورعانىس مينيسترلىگىنىڭ باس بارلاۋ باسقارماسى باستىعىنىڭ ورىنباسارى ۆاديم سكيبيتسكي دونباسستاعى تابىس كرەملگە زاپوروجە جانە حەرسون وبلىستارىن رەسەيگە بەرۋگە مۇمكىندىك بەرەدى دەپ ەسەپتەيدى، بۇل وڭىرلەردىڭ باسىم بولىگى ۋكراينانىڭ باقىلاۋىندا بولعانىمەن رەسمي تۇردە ماسكەۋ بۇل اۋماقتاردى وزدەرىنىكى دەپ ەسەپتەپتەۋدەن تاڭباي كەلەدى.

كرەملدىڭ ءباسپاسوز حاتشىسى دميتري پەسكوۆ 13 مامىردا ماسكەۋ ۋكراينادان ءوز اسكەرلەرىن «رەسەي وڭىرلەرىنەن» شىعارۋدى تالاپ ەتىپ وتىرعانىن جالپاق جۇرتقا مالىمدەدى. بۇعان دەيىن ماسكەۋ تاراپى سوڭعى ەكى وڭىردە (زاپوروجە جانە حەرسوندا) مايداننىڭ قالىپتاسقان جەلىسى بويىنشا وق اتۋدى توقتاتۋعا دايىن ەكەنىن مالىمدەگەن بولاتىن. بۇل كرەملدىڭ وسى پوزيتسيا وزگەردى مە، ول تۋراسىندا پەسكوۆ جاق اشپادى.

ءپۋتيننىڭ دونباسستى باسىپ الۋعا دەگەن تالپىنىسى سوعىستىڭ العاشقى كەزەڭدەرىندە مايداننىڭ قازىرگى جەلىسىندەگى ۇرىس قيمىلدارىن توقتاتۋعا دايىن ەكەنىن جەكە بىلدىرگەنىنە قاراماستان كۇشەيە تۇسۋدە. "مەن ونىڭ مايداننىڭ قازىرگى جەلىسىنە توقتاۋىن ۇنەمى تالاپ ەتەمىن. بىراق ول ۇنەمى: «جوق، مەن ىمىراعا كەلە المايمىن»، - دەيدى ولاردىڭ ءبىرى.

سوعىستى توقتاتۋ جونىندەگى بەيرەسمي كەلىسسوزدەرگە قاتىسقان ەكى دەرەككوز ءپۋتيننىڭ «شىنايى امبيتسيالارى» بۇرىنعىسىنشا ۋكراينانىڭ كوپ بولىگىنە، سونىڭ ىشىندە دنەپر، كيەۆ جانە ودەسساعا باقىلاۋ ورناتۋ بولىپ تابىلادى دەپ ەسەپتەيدى. "ەستەرىڭىزدە بولسىن، جوسپار ءاردايىم كيەۆتى الۋ بولاتىن. مىندەت قويىلدى جانە ورىندالۋى ءتيىس، - دەدى گازەت سۇحباتتاسى. – جاندايشاپتارى پۋتينگە ۋكرايندىقتار قيىندىقتاردى باستان وتكەرىپ، اسكەري الەۋەتى قۇلدىراپ، ادامدارى تاۋسىلىپ قالدى دەپ ايتادى". پۋتين ۋكراينانىڭ رەسەيلىك تىلعا سوققىسى كۇشەيگەنىنە جانە سوڭعى ايلاردا رەسەيلىك اسكەرلەردىڭ مايداندا ىلگەرىلەۋى باياۋلاپ كەتكەنىنە قاراماستان، رەسەي جەڭىپ جاتىر دەگەن توڭمويىن پىكىردە.

ال، ەندى كەلىسسوزدەرگە كەلەتىن بولساق، ەكى تاراپتىڭ دا ۇستانىمدارىمەن تانىس باسىلىم دەرەككوزدەرىنىڭ ايتۋىنشا، ماسكەۋدە دە، كيەۆتە دە تاياۋ شىعىستاعى سوعىس اياقتالعاننان كەيىن دە اقش-تىڭ دەلدالدىعى ارقىلى بەيبىت كەلىسسوزدەردى قايتا باستاۋدىڭ پەرسپەكتيۆاسى از دەپ ەسەپتەيدى. Financial Times-پەن سويلەسكەن دەرەككوزدەردىڭ ايتۋىنشا، قازىر تاراپتاردىڭ ەشقايسىسى كەلىسسوزدەردى جالعاستىرۋدىڭ ءمان-ءمانىسىن كورىپ وتىرعان جوق. باسىلىمنىڭ مالىمەتى بويىنشا، ۋكراينا كەلىسسوزدەر رەسەيمەن سوڭعى راۋندتان كەيىن اقپاندا تۇيىققا تىرەلدى دەپ سانايدى جانە ۋاشينگتوننىڭ پۋتينگە قىسىم كورسەتە الماعانىنا كوڭىلدەرى ەش تولمايدى.

رەسەي بيلىگى بىلتىر انكوريدجتە پۋتينمەن كەزدەسۋى بارىسىندا اقش پرەزيدەنتىنەن كەلىسىم الىنعانىن ايتىپ، بۇكىل دونباسستى بەيبىت رەتتەۋدىڭ نەگىزگى شارتى رەتىندە قاراستىرۋ تالابىن رەسمي تۇردە ۇنەمى العا تارتىپ وتىر. اقش پرەزيدەنتى دونالد ترامپ 12 مامىردا جۋرناليستەردىڭ ساۋالدارىنا جاۋاپ بەرە وتىرىپ، پۋتينمەن رەسەي «بۇكىل دونباسستى» الادى دەگەن كەلىسىمدەردىڭ مۇلدەم بولماعانىن اشىق تۇردە مالىمدەدى. ول سونداي-اق سوعىستىڭ اياقتالۋى جاقىنداپ كەلەدى دەگەن پىكىر ءبىلدىردى. 9 مامىردا ءپۋتيننىڭ اۋزىنان دا ءدال وسىنداي قۇلاققا جىلى ەستىلەر ءسوز شىقتى.

وتكەن جىلدان باستاپ ۋكراينا، اقش دەلدال رەتىندە ارەكەت ەتە باستاعاننان كەيىن، مايدان سىزىعى بويىنشا ۇرىس قيمىلدارىن توقتاتۋدى ۇسىنادى - بۇل جاعدايدا ۋكراينالىق دونباسستىڭ باسىم بولىگى، بىراق بۇكىل ءوڭىرى ەمەس، رف-نىڭ باقىلاۋىندا قالادى. ۋكراينا مۇنى زاڭدى تۇردە مويىنداۋعا نيەتتى ەمەس ەكەنىن ۇنەمى الەم جۇرتىنىڭ ەسىنە سالىپ كەلەدى.

Abai.kz