قاراعاندىدا قالانىڭ ەڭ ءىرى جاسىل ايماقتارىنىڭ بىرىنە اينالاتىن جاڭا ەكوساياباق سالىنا باستادى. ول مايقۇدىق پەن وڭتۇستىك-شىعىس شاعىناۋداندارىنىڭ اراسىندا ورنالاسادى. ەكوسايااققا 200 گەكتار جەر بولىنگەن. جوبانىڭ باستاماسى رەتىندە اعاش ەگۋ جۇمىستارى قولعا الىندى.

«تازا قازاقستان» رەسپۋبليكالىق باعدارلاماسى اياسىندا مىڭ ءتۇپ اعاش – ەمەن، الما، قاراعاي جانە قاراعاش كوشەتتەرى ەگىلىپ،

بولاشاق ساياباقتىڭ ىرگەتاسىنا سيمۆوليكالىق تاس قويىلدى.

اۋقىمدى شاراعا جاستار، ەرىكتىلەر، قوعام بەلسەندىلەرى مەن دەپۋتاتتار قاتىستى.

قاراعاندى وبلىسىنىڭ اكىمى ەرماعانبەت بولەكپاەۆ مۇنداي جوبالاردىڭ قالا تۇرعىندارىنىڭ ءومىر ساپاسىنا تىكەلەي اسەر ەتەتىنىن اتاپ ءوتتى.

— ءبىز قاراعاندىدا جاڭا ەكوساياباق اشىپ جاتىرمىز. بۇل – وتە جاقسى باستاما. اۋماعى كەڭ، ماڭايدا جاڭا شاعىناۋدان مەن سپورتتىق كلاستەر سالىنىپ جاتىر. مەملەكەت باسشىسى قاسىم-جومارت توقاەۆ تابيعاتقا ۇقىپتى قاراۋ ءار تۇرعىننىڭ كۇندەلىكتى مادەنيەتىنىڭ ءبىر بولىگىنە اينالۋى ءتيىس ەكەنىن بىرنەشە رەت ايتقان بولاتىن. بۇگىندە بۇل قاعيدالار ەل بويىنشا مىڭداعان ادامدى بىرىكتىرگەن «تازا قازاقستان» باعدارلاماسى اياسىندا جۇزەگە اسىرىلىپ كەلەدى. ەكوسايااق – ەندى جاي عانا دەمالىس ورنى ەمەس، ەكولوگيا مەن ادامداردىڭ ءومىر ساپاسىنا اسەر ەتەتىن زاماناۋي قالالىق ورتانىڭ ءبىر بولىگى. ءاربىر جاڭا اعاش – تازا اۋا مەن قاراعاندىنىڭ بولاشاعىنا قوسىلعان ۇلەس. جايلى ءارى تازا قالا ءار ادامنىڭ ءوز اۋلاسىنا، كوشەسىنە جانە قورشاعان ورتاعا دەگەن ءىلتيپاتىنان باستالادى، — دەپ اتاپ ءوتتى ەرماعانبەت بولەكپاەۆ. — تۇرعىندار مەن بيزنەستى كوگالداندىرۋ جۇمىستارىنا بەلسەندى قاتىسۋعا شاقىرامىن.

قاراعاندى تۇرعىنى ماگومەد زاۋروۆ بالا كەزىنەن بولاشاق ەكوساياباق اۋماعىنداعى كولدەردىڭ ماڭىندا ۋاقىت وتكىزگەنىن ايتتى.

— مەن ءۇشىن قاراعاندى – قازاقستانداعى ەڭ ۇزدىك قالا. ءبىز وسى جەردە شومىلىپ، بالىق اۋلايتىنبىز. ەندى بۇل جەر بۇرىنعىدان دا كوركەيىپ، ەگىلگەن بارلىق اعاشتار تامىر جايىپ، قالا تۇرعىندارى مەن قوناقتارىن قۋانتسا ەكەن دەيمىن، — دەدى ول.

ەرىكتى جاناراي ساناقبايدىڭ ايتۋىنشا، جاستار ەكولوگيالىق باستامالاردى بەلسەندى قولدايدى.

— مەن جەتى جىلدان بەرى ۆولونتەرلىكپەن اينالىسىپ كەلەمىن. ءبىز ەكولوگيالىق اكتسيالار مەن اعاش ەگۋ شارالارىنا ۇنەمى قاتىسامىز. وسىنداي ساياباقتىڭ اشىلۋى – قالانىڭ بولاشاعى مەن جاستار ءۇشىن تاماشا يدەيا، — دەيدى ول.

ەكوساياباق قۇرىلىسى قاراعاندىنىڭ جاڭا اۋدانىن دامىتۋ جوباسىنىڭ ءبىر بولىگىنە اينالادى. قازىردىڭ وزىندە وڭتۇستىك-شىعىس پەن مايقۇدىقتى بايلانىستىراتىن اينالما جول سالىنىپ جاتىر.

الداعى ۋاقىتتا مۇندا سەرۋەندەۋگە ارنالعان اللەيالار، سپورت الاڭدارى، ۆەلوجولدار جانە بارلىق جاستاعى تۇرعىندارعا ارنالعان دەمالىس ايماقتارى پايدا بولادى.

ساياباق اۋماعىندا كوممەرتسيالىق نىساندار سالۋ جوسپارلانباعان. ونى سەرۋەندەۋگە، وتباسىلىق دەمالىسقا جانە تازا اۋادا سپورتپەن اينالىسۋعا ارنالعان ورىن رەتىندە ساقتاۋ كوزدەلىپ وتىر.

سونىمەن قاتار بۇل اۋماقتا كولەمى 72 گەكتار بولاتىن ءىرى سپورتتىق كلاستەر قۇرۋ جوسپارلانعان.

جوبا اياسىندا امبەباپ ارەنا، مۇز سارايى، جەڭىل اتلەتيكا مانەجى، 12 مىڭ كورەرمەنگە ارنالعان UEFA ساناتىنداعى ستاديون سالىنىپ، فۋتبول اكادەمياسىنىڭ قۇرىلىسى باستالىپ كەتكەن.

Abai.kz