جاساندى ينتەللەكت تۋرالى ايتۋ وڭاي. ال ونىڭ ارتىنداعى عىلىمدى ءتۇسىنۋ قيىن!

قازاقستاندا پرەزيدەنت قاسىم-جومارت توقاەۆ ورتا ءبىلىم بەرۋ جۇيەسىنە جاساندى ينتەللەكتىنى ەنگىزۋ تۋرالى جارلىق شىعارعالى بەرى الەۋمەتتىك جەلىدە جي تۋرالى سويلەيتىندەر كۇرت كوبەيدى.

بىراق كوپشىلىگى جي-ءدى ءالى دە “ينسترۋمەنت” دەڭگەيىندە عانا تۇسىندىرەدى.

شىن مانىندە، جاساندى ينتەللەكت – ادامزات ينتەللەكتىسىنىڭ ميللياردتاعان عىلىمي ىزدەنىستەردەن كەيىنگى جاڭا ەۆوليۋتسيالىق كەزەڭى.

ادام بالاسى ءوزىنىڭ ينتەللەكتىلىك مۇمكىندىگىنىڭ شەگىنە جاقىنداعاندا، ومىرگە جاساندى ينتەللەكت كەلدى.

ول:

– ءماتىن جازادى;

– سۋرەت سالادى;

– ۆيدەو جاسايدى;

– تالدايدى;

– سويلەيدى;

– ۇيرەتەدى;

– ءتىپتى ادامنىڭ ويلاۋ لوگيكاسىن مودەلدەي باستادى.

بىراق ەڭ قاۋىپتى ماسەلە باسقا جەردە.

قازاقستاندا جي تۋرالى ەڭ كوپ تالاپ قويىلاتىن ورتا – مۇعالىمدەر.

ال ءبىز مۇعالىمنىڭ شىنايى الەۋمەتتىك جاعدايىن تۇسىندىك پە؟

قازاقستانداعى پەداگوگتەردىڭ باسىم بولىگى – ايەلدەر.

ولاردىڭ موينىندا:

– ساباق;

– قاعاز;

– ەسەپ;

– اتتەستاتسيا;

– ءۇي;

– بالا;

– اس;

– دۇكەن;

– وتباسى;

– پسيحولوگيالىق سالماق.

وسىنداي جاعدايدا جۇرگەن مۇعالىمنەن:

“جي-ءدى تەز مەڭگەر!

كونتەنت جاسا!

تسيفرلان!

يننوۆاتسيا ەنگىز!”

دەپ تالاپ ەتۋ وڭاي.

بىراق مەملەكەت پەن قوعام پەداگوگكە جي-ءدى مەڭگەرۋگە ۋاقىت، ورتا، عىلىمي قولداۋ جانە ينتەللەكتۋالدىق ەكوجۇيە جاساپ بەردى مە؟

ماسەلەنىڭ ءتۇبى وسىندا.

ءبىر كەزدە مۇعالىمدەرگە 1–2 بەتتىك ەسسە جازۋدى مىندەتتەگەندە، جۇيە ىشىندە قارسىلىقتىڭ قانداي بولعانىن ۇمىتقان جوقپىز.

ال قازىر ءبىز ودان الدەقايدا كۇردەلى قۇبىلىس – جاساندى ينتەللەكت داۋىرىنە كىرىپ بارامىز.

تاعى ءبىر ماڭىزدى ماسەلە.

ءبىز “جي پەداگوگتى الماستىرمايدى” دەپ كوپ ايتامىز.

مەن بۇعان جارتىلاي كەلىسەمىن.

سەبەبى مەن جالپى جي-مەن ەمەس، پەداگوگيكالىق جاساندى ينتەللەكتپەن (پەدجي) اينالىسامىن.

بۇل – مۇلدە باسقا دەڭگەي.

پەدجي:

– پەداگوگ ستسەناريىمەن جۇمىس ىستەيدى;

– ونلاين ساباق جۇرگىزە الادى;

– تۇسىندىرەدى;

– سۇيەمەلدەيدى;

– تەكسەرەدى;

– گيپەرمۋلتيمەديا ورتادا وقۋشىنى باعىتتايدى.

ياعني بولاشاقتا پەداگوگتىڭ بىرقاتار فۋنكتسياسىن وزىنە الادى.

ال پەداگوگ:

– پراكتيكاعا;

– تاربيەلەۋگە;

– وفلاين قارىم-قاتىناسقا;

– زەرتتەۋگە;

– تۇلعا قالىپتاستىرۋعا كوبىرەك ۋاقىت بولەدى.

بۇل – پەداگوگتى جويۋ ەمەس.

بۇل – پەداگوگ ەڭبەگىنىڭ جاڭا ارحيتەكتۋراسى.

وكىنىشكە قاراي، قازاقستاندا جوو-لاردىڭ بولاشاعى، تسيفرلىق پەداگوگيكا جانە پەداگوگيكالىق جي تۋرالى اشىق ءارى تەرەڭ عىلىمي پىكىرتالاس ءالى قالىپتاسقان جوق.

كوپ جەردە ۇنسىزدىك.

ورىسشا ايتقاندا: “تيحوە بولوتو”.

ال ۋاقىت كۇتىپ تۇرمايدى.

پىكىر جازىپ وتىرعان:

پەداگوگيكالىق جي اۆتورى، كەڭەس ءداۋىرىنىڭ عالىمى، رەسەي پروفەسسورى ەگىزباي ساقپانوۆ.

Abai.kz