ۋلتيماتۋمدارعا جاۋاپ بەرۋدى ادەتتە جىبەرىپ المايتىن لۋكاشەنكو ۆلاديمير زەلەنسكيدىڭ تالابىنا جاۋاپ رەتىندە ءۇشىنشى تاۋلىك قاتارىنان ءۇنسىز وتىر.

الايدا رەسمي كيەۆ بۇل ماسەلەنى كۇن تارتىبىنەن الىپ تاستاعان جوق. ۋكراينالىق باق-قا بەرگەن كەزەكتى سۇحباتىندا زەلەنسكي بەلارۋس اۋماعىنداعى رەسەيلىك رەترانسلياتورلاردى دەمونتاجداۋ تالابىن تاعى دا ەسكە سالدى. ۋكراينا تاراپىنىڭ مالىمەتىنشە، ولار رەسەيلىك درونداردى باعىتتاۋ ءۇشىن پايدالانىلادى.

"لۋكاشەنكو شيەلەنىستى تومەندەتۋدى ءسوز جۇزىندە ەمەس، ءىس جۇزىندە كورسەتۋى كەرەك. جاي عانا "كەشىرىم سۇرايمىن" دەۋ جەتكىلىكسىز. كەشىرىمىن وزىندە قالدىرسىن. ونىڭ مۇنداي سوزدەرى سوعىستىڭ العاشقى كۇنىنەن باستاپ-اق اسەرىن جوعالتتى", — دەدى ۋكراينا پرەزيدەنتى.

ازىرگە ۋكراين تاراپىنىڭ تالاپتارىنا جاۋاپ رەتىندە بەلارۋس ەفيرىنە شتاتتىق ناسيحاتشىلار مەن قورعانىس ءمينيسترى ۆيكتور حرەنين شىعارىلدى. ول بەلارۋستىڭ اسكەري ستراتەگياسى قاقتىعىسقا ارالاسپاۋ جانە ەل ازاماتتارىنىڭ قاۋىپسىزدىگىن قامتاماسىز ەتۋ ەكەنىن مالىمدەدى.

وسى جاعدايدا لۋكاشەنكونىڭ ءوزى ءۇنسىز قالۋى ايتارلىقتاي ءماندى كورىنەدى. بىرنەشە اي بۇرىن عانا ول ۋكراينا مايدانىنىڭ جاقىن ارادا كۇيرەۋى تۋرالى ايتىپ، ارميا مەن رەزەرۆتەردىڭ جاۋىنگەرلىك دايىندىعىن تەكسەرىپ، زىمىران ۇشىرۋلاردى كورسەتىپ، ۇنەمى قاتاڭ مالىمدەمەلەر جاساپ جۇرگەن ەدى. ال قازىر حالىق اراسىندا ايتىلاتىن سوزبەن ايتقاندا، "ەشتەڭە بولماعانداي كەيىپ تانىتىپ وتىر".

مۇنىڭ سەبەبى تۇسىنىكتى. ۇزاق ۋاقىتتان بەرى العاش رەت لۋكاشەنكو وزىنە ۇيرەنشىكتى "ۇجىمدىق باتىسپەن" ەمەس، سوزدەرىن ناقتى ارەكەتتەرمەن دالەلدەۋگە قابىلەتتى سوعىسۋشى تاراپپەن سىرتتاي ديالوگ جۇرگىزىپ وتىر.

سونىمەن بىرگە ول ءوز ەليتاسىنىڭ الدىندا ءالسىز كورىنىپ، بەدەلىنەن ايىرىلۋعا دا جول بەرە المايدى.

مۇنداي جاعدايدا لۋكاشەنكو ءوزى ءۇشىن ءتيىمدى شەشىمنىڭ جوق ەكەنىن جاقسى تۇسىنەدى.

لوگيكاعا سۇيەنسەك، رەترانسلياتورلار مەن جانارماي جەتكىزۋ ماسەلەسىنەن كەيىن كيەۆ بەلارۋس كاسىپورىندارىنىڭ رەسەيدىڭ اسكەري ماشيناسىن قامتاماسىز ەتۋى تۋرالى ماسەلەنى دە مىندەتتى تۇردە كوتەرەدى.

بەلارۋستىڭ اسكەري-ونەركاسىپتىك كەشەنى بىرنەشە جىلدان بەرى رەسەيدىڭ قورعانىس ءوندىرىسى تىزبەگىنە كىرىكتىرىلگەن. "ينتەگرال" كاسىپورنى رەسەي زىمىراندارىندا قولدانىلاتىن ميكروەلەكترونيكا شىعارادى. بەلارۋس زاۋىتتارى رەسەيگە وپتيكا، بايلانىس قۇرالدارىنىڭ ەلەمەنتتەرىن، راديولوكاتسيالىق جۇيەلەرگە ارنالعان بولشەكتەردى جانە قارۋ-جاراقتى جوندەۋگە قاجەتتى كومپونەنتتەردى جەتكىزەدى. "پەلەنگ", "اگات", "2566-شى راديوەلەكتروندىق قارۋ-جاراقتى جوندەۋ زاۋىتى" جانە باسقا دا بىرقاتار ۇيىمدار رەسەي اسكەري-ونەركاسىپتىك كەشەنىمەن ىنتىماقتاستىعى ءۇشىن ۋكراينا، ەۋرووداق جانە اقش سانكتسيالىق تىزىمدەرىنە بىرنەشە رەت ەنگىزىلگەن.

بۇدان بولەك، ۋكراينا رەسەي اگرەسسياسىنا قارسى شىققانى جانە ۋكراينانى قولداعانى ءۇشىن سوتتالعان بەلارۋستىك ساياسي تۇتقىندار ماسەلەسىن قايتا كوتەرۋى مۇمكىن. ولاردىڭ قاتارىندا "بەلارۋسكي گايۋن" ءىسىنىڭ فيگۋرانتتارى، "تەمىرجول پارتيزاندارى", سونداي-اق ۋكراينا جاعىندا سوعىسقان جانە رەسەي تۇرمەلەرىنە قامالعان نەمەسە تۇتقىنعا تۇسكەن بەلارۋستەر بار.

كيەۆ ءىس جۇزىندە مىناداي بەلگى بەرىپ وتىر: مالىمدەمەلەر ۋاقىتى اياقتالدى، ەندى تەك ناقتى ارەكەتتەر باعالاناتىن بولادى.

ماسەلە مىنادا: لۋكاشەنكو ءوز بيلىگىن ساقتاپ قالۋ ءۇشىن كرەمل ساتقىندىق دەپ قابىلدايتىن قادامدارعا بارا الا ما؟ ەگەر بارا الماسا، ۋكراينانىڭ سوڭعى مالىمدەمەلەرىنە قاراعاندا، كيەۆ ءوز بەتىنشە ارەكەت ەتۋ قۇقىعىن وزىندە قالدىرادى.

قۋانىش ەدىلحانتەگى

Abai.kz