پرەمەر-مينيستر ولجاس بەكتەنوۆ ۇكىمەت وتىرىسىندا مەملەكەت باسشىسى بەلگىلەگەن مىندەتتەردى ورىنداۋ جانە جاڭا كونستيتۋتسيانىڭ نورمالارىن ىسكە اسىرۋ ماسەلەسىنە توقتالدى.

ۇكىمەت باسشىسى پرەزيدەنت قاسىم-جومارت توقاەۆ پارلامەنت پالاتالارىنىڭ بىرلەسكەن وتىرىسىندا بارلىق رەفورمالاردىڭ تۇپكى ماقساتى حالىقتىڭ ءال-اۋقاتىن ارتتىرۋ ەكەنىن اتاپ وتكەنىن ەسكە سالدى.

بيىل ينفلياتسيانى 10%-دان تومەن دەڭگەيدە ۇستاپ تۇرۋ – ورنىقتى ەكونوميكالىق ءوسىمنىڭ باستى شارتتارىنىڭ ءبىرى. وسىعان بايلانىستى مەملەكەتتىك ورگاندارعا ۇلتتىق بانكپەن بىرلەسىپ ماكروەكونوميكالىق تۇراقتاندىرۋ جونىندەگى ءىس-قيمىل باعدارلاماسىن جانە ينفلياتسيانى باقىلاۋ شارالارىن قاتاڭ ورىنداۋ تاپسىرىلدى, - دەدى ولجاس بەكتەنوۆ.

سونىمەن قاتار پرەمەر-مينيستر وتاندىق ءوندىرىستى قولداۋ، نارىقتى تاۋارلارمەن قامتاماسىز ەتۋ، ساقتاۋ ينفراقۇرىلىمى مەن لوگيستيكانى دامىتۋ، تەڭگەرىمدى تاريفتىك ساياسات جۇرگىزۋ جۇمىستارىن جالعاستىرۋدىڭ ماڭىزىن اتاپ ءوتتى.

بەكتەنوۆ جىل سوڭىنا دەيىن 12 مىڭ شاقىرىمعا جۋىق ينجەنەرلىك جەلىنى جاڭعىرتۋ، تۇرعىن ءۇي قۇرىلىسىنىڭ قارقىنىن تومەندەتپەۋ، وڭدەۋشى ونەركاسىپتە 200-گە جۋىق جاڭا جوبانى ىسكە قوسۋ، فارماتسەۆتيكا سالاسىن دامىتۋ جانە اگروونەركاسىپ كەشەنىن قولداۋ بويىنشا ناقتى تاپسىرمالار بەردى.

سونداي-اق, پرەمەر-مينيستر ەلدى مەكەندەردى گازداندىرۋ دەڭگەيىن 80%-عا جەتكىزۋ، كولىك جانە لوگيستيكا ينفراقۇرىلىمىن دامىتۋ، جاڭا اۋەجاي سالۋ، اۆياوتىن ينفراقۇرىلىمىن جاڭعىرتۋ جانە ەنەرگەتيكالىق جوبالاردى بەلگىلەنگەن مەرزىمدە اياقتاۋ قاجەتتىگىن ايتتى.

ۇكىمەت باسشىسى جاساندى ينتەللەكت پەن تسيفرلاندىرۋ باعىتىنداعى جۇمىستارعا دا ەرەكشە توقتالدى.

«دەرەكتەردى وڭدەۋ ورتالىقتارىنىڭ القابى» جوباسىن ىسكە اسىرۋ، شەتەلدىك ينۆەستيتسيا تارتۋ جانە Qazaq AI Research University بازاسىندا جاساندى ينتەللەكت سالاسىنا ماماندار دايارلاۋ باسىم باعىتتاردىڭ ءبىرى بولادى, - دەدى ۇكىمەت باسشىسى.

سونىمەن بىرگە شاعىن جانە ورتا بيزنەستى قولداۋ، جوعارى تەحنولوگيالىق وندىرىستەردى دامىتۋ، ينۆەستيتسيالىق جوبالاردى سۇيەمەلدەۋ، «تازا قازاقستان» باستاماسىن كەڭەيتۋ جانە «زاڭ مەن ءتارتىپ» قاعيداتىن جۇزەگە اسىرۋ بويىنشا مەملەكەتتىك ورگاندارعا ناقتى مىندەتتەر جۇكتەلدى.

پرەمەر-مينيستر الەۋمەتتىك سالاداعى رەفورمالار دا جاڭا كونستيتۋتسيا تالاپتارىنا ساي جالعاساتىنىن ايتىپ، الەۋمەتتىك كومەك شىن مانىندە مۇقتاج ازاماتتارعا كورسەتىلۋى ءتيىس ەكەنىن اتاپ ءوتتى.

جاڭا كونستيتۋتسيانىڭ نورمالارىن ناقتى جۇزەگە اسىراتىن ەڭ جاۋاپتى كەزەڭ باستالىپ وتىر. ولاردى ءتيىمدى ىسكە اسىرۋ، قۇقىق ۇستەمدىگىن نىعايتۋ جانە ازاماتتاردىڭ كونستيتۋتسيالىق قۇقىقتارى مەن بوستاندىقتارىن قامتاماسىز ەتۋ بارلىق مەملەكەتتىك ورگانداردىڭ ۇيلەسىمدى جۇمىسىنا بايلانىستى، – دەدى ولجاس بەكتەنوۆ.

ول جاڭا كونستيتۋتسيا كۇشىنە ەنگەنىن تاريحي كەزەڭ دەپ باعالاپ، بۇل قۇجات قازاقستاننىڭ الداعى ونجىلدىقتارداعى دامۋ باعىتىن ايقىندايتىنىن ايتتى.

پرەمەر-ءمينيستردىڭ سوزىنشە، جاڭا اتا زاڭ مەملەكەتتىڭ بارلىق ينستيتۋتتارىن جاڭعىرتۋعا، قۇقىق ۇستەمدىگىن نىعايتۋعا، ازاماتتاردىڭ ءال-اۋقاتىن ارتتىرۋعا جانە ادىلەتتى، كۇشتى، قاۋىپسىز، تازا ءارى وزىق قازاقستاندى قۇرۋعا بەرىك نەگىز قالايدى.

بەكتەنوۆ سونداي-اق ادىلەت مينيسترلىگىنە قولدانىستاعى زاڭنامانى جاڭا كونستيتۋتسياعا سايكەستەندىرۋ جۇمىستارىن ۇيلەستىرۋدى جالعاستىرۋدى تاپسىردى. ال وقۋ-اعارتۋ مينيسترلىگى مەن عىلىم جانە جوعارى ءبىلىم مينيسترلىگىنە ءبىلىم بەرۋ ۇيىمدارىندا كونستيتۋتسيالىق-قۇقىقتىق مادەنيەتتى، قۇقىقتىق ساۋاتتىلىقتى جانە ازاماتتىق جاۋاپكەرشىلىكتى قالىپتاستىرۋعا باعىتتالعان جۇيەلى جۇمىستى كۇشەيتۋدى مىندەتتەدى.

Abai.kz