الەمدىك دوپ دوداسىندا توپتىق كەزەڭ اياقتالىپ، 1/16 فينال ويىندارى ءوتىپ جاتىر. 48 كوماندانىڭ 16-سى جۇگىن بۋىپ-ءتۇيىپ، ەلدەرىنە قايتىپ تا كەتتى. فيفا-نىڭ التىن كۋبوگى ءۇشىن تالاساتىن تاڭداۋلىلار تۋرالى ايتۋعا الدا ۋاقىت بار، ال بۇگىن الاماننان شىعىپ قالعانىنا قابىرعاسى قايىسقان «شەرلىلەر» جايىن تۇيىندەمەكپىز.

48-ورىن. يراك (0 ۇپاي، دوپ ايىرماسى 1:12)

نورۆەگيامەن بولعان العاشقى كەزدەسۋدىڭ كەي ساتتەرىندە ءتاپ-ءتاۋىر ويىن كورسەتكەنىمەن، يراك قۇراماسى ءبارىبىر ءىرى ەسەپپەن جەڭىلىپ تىندى. فرانتسيا مەن سەنەگال دا ولاردى ويسىراتا ۇتتى. ءسويتىپ، يراك كومانداسى 1930 جىلعى مەكسيكانىڭ، 1982 جىلعى جاڭا زەلانديانىڭ انتيرەكوردىن قايتالادى – ياعني توپتاعى ءۇش ويىندا دا ءىرى ەسەپپەن تىزە بۇكتى.

47-ورىن. تۋنيس (0 ۇپاي، 2:12)

جالپى، كەيىنگى ۋاقىتتا افريكا فۋتبولىنىڭ دەڭگەيى ەداۋىر ءوستى دەگەنىمىزبەن، بۇل ءوسۋدىڭ تۋنيسكە ەش قاتىسى جوق سەكىلدى. بۇل قۇراما الەم چەمپيوناتتارىنىڭ ء(اچ) فينالدىق تۋرنيرىنە ءجيى شىعادى، بىراق ەشقاشان توپ جارعان ەمەس. ايتپەسە «كارفاگەن سۇڭقارلارى» افريكا وكىلىنىڭ ءاچ تاريحىنداعى تۇڭعىش جەڭىسىنە قول جەتكىزگەن كوماندا ەدى عوي (1978 جىل، تۋنيس – مەكسيكا – 3:1). مىنە، بيىل دا ءۇش قارسىلاسىنان دا وڭباي ۇتىلىپ، ەلىنە ەرتە قايتتى.

سۋرەت: championat.com سايتىنان الىندى.

46-ورىن. وزبەكستان (0 ۇپاي، 2:11)

دۇنيەجۇزىلىك دوداعا تۇڭعىش رەت شىققان وزبەك قۇراماسى ءۇش ويىندا دا جەڭىلدى. كولۋمبيامەن كەزدەسۋدىڭ ەكىنشى تايمىندا، كونگو در كومانداسىمەن باسەكەنىڭ ءبىرىنشى بولىگىندە از-ماز جاقسى ويناعانىمەن، ءوز مۇمكىندىگىن اشىپ كورسەتە المادى. كوبىنەسە قورقاسوقتاپ، جىگەرسىز وينادى. اتاقتى فابيو كانناۆارو دا كومەكتەسە العان جوق. «ونىڭ ورنىنا كوماندانى فينالدىق تۋرنيرگە جولدامانى جەڭىپ العان جەرگىلىكتى باپكەر تيمۋر كاپادزە باپتاپ بارعاندا دۇرىس بولار ما ەدى» دەپ وكىنەدى وزبەك جانكۇيەرلەرى.

45-ورىن. گايتي (0 ۇپاي، 2:8)

اراعا 52 جىل سالىپ، الەمدىك دوپ دوداسىنا قايتا ورالعان گايتيلىكتەر توپتاعى قاي قارسىلاسىنان دا قايمىقپاي، باتىل وينادى. راس، ءۇش ماتچتا دا ۇتىلدى، بىراق شوتلانديامەن تەڭ تۇسۋگە مول مۇمكىندىگى بولدى، تەك جولى بولمادى. ماروككونى ءتىپتى ءبىراز ۋاقىت جەڭىپ تۇردى. برازيليادان دا قورقىپ، قاقپا الدىندا جاتىپ العان جوق، شاما-شارقىنشا قارسىلاستى. ەلدەرىنە ەڭسەسىن تىك ۇستاپ اتتاندى.

44-ورىن. يوردانيا (0 ۇپاي، 3:8)

يوردانيا قۇراماسى تۋرالى دا وسىنى ايتۋعا بولادى: توپتاعى ءۇش قارسىلاسىنا دا لايىقتى قارسىلىق كورسەتتى. ءۇش ويىندا دا گول سوقتى. الامان بايگەگە العاش قاتىسىپ وتىرعان كوماندا ءۇشىن مۇنىڭ ءوزى از جەتىستىك بولماسا كەرەك.

43-ورىن. پاناما (0 ۇپاي، 0:4)

بىردە-ءبىر گول سوعا المادى دەمەسەڭىز، ءۇش ويىندا دا سوڭعى مينۋتتارعا دەيىن ايقاسىپ، ۇپايدان كۇدەر ۇزگەن جوق. گانادان ءبىرشاما باسىم ويناسا دا، اقىرعى ساتتە گول جىبەرىپ الدى. حورۆاتتار مەن اعىلشىندارعا دا پانامانى ۇتۋ ءۇشىن اجەپتاۋىر تەر توگۋىنە تۋرا كەلدى.

سۋرەت: championat.com سايتىنان الىندى.

42-ورىن. كيۋراساو (1 ۇپاي، 1:9)

الەم چەمپيوناتىنا قاتىسقان تاريحتاعى ەڭ كىشكەنتاي ەل (اۋماعى جونىنەن دە، حالىق سانى جاعىنان دا). ءاچ تاريحىنداعى ەڭ قارت باپكەر ديك ادۆوكاتتىڭ جەتەكشىلىگىمەن تۇڭعىش گولىن سوقتى (گەرمانيانىڭ قاقپاسىنا!), العاشقى ۇپايىن ەنشىلەدى. ارالدىقتاردان بۇدان ارتىق ەرلىك كۇتۋ ءجون بولا قويماس.

41-ورىن. قاتار (1 ۇپاي، 2:10)

ويىنى جونىنەن تۋرنيردەگى ەڭ ناشار كوماندالاردىڭ ءبىرى بولدى. باستاپقى ماتچتا شۆەيتساريالىقتاردىڭ بۇلاردى اسا مەنسىنبەي ويناۋىنىڭ ارقاسىندا عانا ۇپايعا يە بولدى. ءبىر چەمپيوناتتا ءوز قاقپاسىنا ەكى رەت اۆتوگول سوعىپ الىپ، 1966 جىلعى بولگاريانىڭ، 2018 جىلعى رەسەيدىڭ «رەكوردىن» قايتالادى. مىناداي ويىنىمەن «كوزى ءتىرى» جاپونيا مەن يراننان، اۆستراليا مەن وڭتۇستىك كورەيادان وزىپ، قالايشا ەكى رەت ازيا چەمپيونى اتانىپ جۇرگەنىنە تاڭ قالماسقا لاج جوق.

40-ورىن. جاڭا زەلانديا (1 ۇپاي، 4:10)

وكەانيا ايماعىنىڭ جالعىز وكىلى ءبىرىنشى ماتچتا يراندى ۇتىپ كەتە جازدادى – بىراق تەڭ ءتۇستى. ەگيپەتتى دە ءبىراز ۋاقىت جەڭىپ تۇردى – بىراق ۇتىلدى. ودان ارىعا شەبەرلىگى جەتپەدى – وزىنە دە جەڭىس اۋاداي قاجەت بەلگيا جاڭا زەلانديانى ورنىنا قويدى.

39-ورىن. چەحيا (1 ۇپاي، 2:6)

ىرىكتەۋ سىنىندا دانيا مەن يرلانديانى پەنالتي ارقىلى جەڭىپ، سولتۇستىك امەريكا جەرىنە زور ۇمىتپەن كەلگەن چەحتار سۇرەڭسىز ويىنىمەن كۇللى جانكۇيەر قاۋىمنىڭ كوڭىلىن قالدىردى. اسا كۇشتى توپقا تۇسپەسە دە، بىردە-ءبىر ويىندا جەڭىسكە جەتە الماي، پۇشايمان بولدى.

38-ورىن. ساۋد ارابياسى (2 ۇپاي، 1:5)

كەيىنگى جىلدارى ساۋد كلۋبتارى الەمنىڭ اتاقتى فۋتبولشىلارىن قىمبات باعاعا ساتىپ الىپ، ۇلتتىق چەمپيوناتتارىن، ەل فۋتبولىن قىزىقتى دا باسەكەگە قابىلەتتى ەتۋگە بارىن سالىپ جاتىر. الايدا اراب تۇبەگىندە دوپ تەۋىپ، دوربالاپ اقشا سانايتىن كارىم بەنزەما، كريشتيانۋ رونالدۋ، مارتسەلو بروزوۆيچتەر ساۋد ارابياسى قۇراماسىن كۇشەيتۋگە ەش كومەكتەسە المايدى عوي. ۇلتتىق قۇرامانىڭ دەڭگەيى ءالى سول تومەن كۇيىندە. بيىل تاعى دا سوڭعى ورىندا قالدى.

37-ورىن. ۋرۋگۆاي (2 ۇپاي، 3:4)

الەمنىڭ تۇڭعىش چەمپيونى توپتان شىعا المايدى دەپ ەشكىم دە ويلاماعان ەدى. الايدا العاشقى ويىننان باستاپ-اق كومانداداعى كوڭىل-كۇيدىڭ، ۇجىمدىق اتموسفەرانىڭ، مورالدىق احۋالدىڭ ونشا ەمەس ەكەنى اڭعارىلىپ قالدى. باس باپكەر مارسەلو بەلسانىڭ تۇيىق تا تاكاپپار بولمىسى، مامىلەگە كەلمەس توڭمويىن مىنەزى، فۋتبولشىلارمەن ءتىل تابىسا الماۋى دا ناتيجەگە اسەر ەتكەنى انىق. ويىن جاعىنان دا ۋرۋگۆاي توپتاعى قارسىلاستارىنان ارتىلىپ كوزگە تۇسە العان جوق.

36-ورىن. شوتلانديا (3 ۇپاي، 1:4)

بۇل كوماندانىڭ چەمپيوناتقا نەگە سەنىپ، نەمەنەگە ءۇمىت ارتىپ كەلگەنى تۇسىنىكسىز. شوتلاندىقتاردان گورى قايتا ولار ءاۋپىرىم-تاڭىرىممەن ارەڭ جەڭگەن گايتي جىگەرلى قيمىل، ءجىتى ويىن كورسەتتى. ۇتىلسا دا، العا ۇمتىلۋمەن بولدى (بريتاندىقتاردان ۇتىلماۋعا ءتيىس ەدى). ارينە، شوتلانديا ەشقاشان تەڭبىل دوپتى قالاۋىنشا بيلەتەتىن تەحنيكالىق جاراعى مىقتى ۇجىم سانالعان ەمەس. بىراق بۇرىن تىم قۇرىعاندا مۇقالماس مىنەز، قايتپاس قايسارلىق كورسەتۋشى ەدى. ول دا جوق. توعىزىنشى چەمپيوناتىنا قاتىستى دا قايتتى. ەشقاشان توپتان شىعىپ كورگەن ەمەس-ءتى. قايتىپ شىقسىن، مىناداي ويىنمەن...

سۋرەت: sports.kz سايتىنان الىندى.

35-ورىن. تۇركيا (3 ۇپاي، 3:5)

تۇرىكتەردىڭ توپتان شىعا الماۋى ەشكىم كۇتپەگەن ناتيجە ەدى. ەكى جىل بۇرىن عانا ەۋروپا چەمپيوناتىنىڭ شيرەك فينالىنا جەتكەن جىگىتتەردىڭ دوپ تەبۋدەن جاڭىلىپ قالماعانى انىق. باستاپقى ەكى ويىندا اۆستراليا مەن پاراگۆايدىڭ قاقپاسىنا 62 سوققى جاساپ، سونىڭ بىردە-ءبىرىن گولعا اينالدىرا الماۋى اقىلعا سىيمايدى. ساتسىزدىك دەۋگە دە بولار. دەگەنمەن جانكۇيەر جازعاننىڭ وكىنىشىن ونىمەن جۋىپ-شايۋ دا قيىن.

34-ورىن. وڭتۇستىك كورەيا (3 ۇپاي، 2:3)

چەمپيوناتتى جىگەرلى جەڭىسپەن باستاعان (چەحيانى ۇتتى، 2:1) كورەيلەردىڭ دە توپتان شىعا الماۋى سەنساتسيا بولدى. ولاردىڭ مەكسيكادان ۇتىلۋىنا تۇسىنىستىكپەن قاراۋعا بولار (قانشا دەگەنمەن دودا قوجايىندارىنىڭ ءبىرى عوي), ال شەشۋشى ماتچتا وڭتۇستىك افريكا فۋتبولشىلارىنا ەسە جىبەرۋى قالاي؟

33-ورىن. يران (3 ۇپاي، 3:3)

ءۇش ويىندا دا قارسىلاستارىمەن تەڭ ءتۇستى. ەشكىمدى جەڭە المادى، بىراق جەڭىلگەن دە جوق. ساياسي سەبەپتەرگە بايلانىستى چەمپيوناتتاعى كەدەرگىلەرگە ەڭ كوپ ۇشىراعان كوماندا بولدى. امەريكالىق ۇيىمداستىرۋشىلار يراننىڭ توپتان شىعا الماعانىنا قۋانعاندارىن جاسىرمادى. دەگەنمەن سوڭعى تۋردا الجير مەن اۆستريانىڭ ءبىرى جەڭىسكە جەتكەندە، يراندىقتاردىڭ كەلەسى كەزەڭگە ءوتۋى دە مۇمكىن ەدى.

ساكەن سىبانباي

Abai.kz