«قىز جىبەك» فيلمىندەگى ايگىلى قىزعىلت قامزول الداعى «قازاق ارۋى» بايقاۋىنىڭ ساحناسىندا قايتا جاڭعىرادى. بايقاۋدىڭ نەگىزىن قالاۋشى بايان ماقساتقىزى جاڭا ماۋسىمدى قازاق كينوسىنىڭ اڭىزى مەرۋەرت وتەكەشوۆا مەن قىز جىبەك بەينەسىنە ارنايتىنىن ايتتى.

پروديۋسەر بۇل تۋرالى «Talk Like» باعدارلاماسىنا بەرگەن سۇحباتىندا مالىمدەدى. ونىڭ ايتۋىنشا، مەرۋەرت وتەكەشوۆا بايقاۋعا ارنايى شاقىرىلىپ، قۇرمەتتى قوناق رەتىندە توردەن ورىن الادى. ال قاتىسۋشى ارۋلاردىڭ بارلىعى «قىز جىبەك» فيلمىندەگى ايگىلى قىزعىلت قامزول ۇلگىسىندەگى كيىممەن ساحناعا شىقپاق.

«مەن ءۇشىن «قىز جىبەك» – قازاقستاندىق فيلمدەردىڭ ىشىندەگى ەڭ ۇزدىگى. ونى ناعىز جاۋھار تۋىندى دەپ ەسەپتەيمىن. سوندىقتان بايقاۋدى مەرۋەرت وتەكەشوۆا مەن قىز جىبەككە – قازاق قىزىنىڭ سۇلۋلىعى مەن تازالىعىنىڭ سيمۆولىنا ارناۋدى شەشتىم. العاشقى «قازاق ارۋى» بايقاۋى دا «گاككۋ» انىمەن باستالعان ەدى. ول كەزدە دە وسى فيلمگە دەگەن قۇرمەتىمىزدى بىلدىردىك، – دەدى بايان ماقساتقىزى.

پروديۋسەردىڭ سوزىنشە، «قازاق ارۋىنىڭ» قالىپتاسقان ەرەجەلەرى مەن نەگىزگى تالاپتارى وزگەرمەيدى. ويتكەنى الەمدەگى كەز كەلگەن سۇلۋلىق بايقاۋىنىڭ ءوز ءتارتىبى، فورماتى مەن ءداستۇرى بار. ال جاڭا بايقاۋدىڭ تولىق تۇجىرىمداماسى ازىرگە بەكىتىلمەگەن. ۇيىمداستىرۋشىلار دايىندىقتى ءىس-شاراعا ەكى اي قالعاندا باستايدى. بايقاۋدى قازان نەمەسە قاراشا ايىندا وتكىزۋ جوسپارلانىپ وتىر.

سۇحبات بارىسىندا بايان ماقساتقىزى «قازاق ارۋى» جەڭىمپازدارىنىڭ كەيىنگى تاعدىرى تۋرالى دا پىكىر ءبىلدىردى. ونىڭ ايتۋىنشا، بايقاۋ ارۋلارعا تانىلۋعا جول اشادى، الايدا سول مۇمكىندىكتى دۇرىس پايدالانۋ ءار جەڭىمپازدىڭ وزىنە بايلانىستى.

«مەن «قازاق ارۋى» جەڭىمپازدارىنىڭ بولاشاعىنا جاۋاپتى ەمەسپىن. ولاردىڭ اراسىندا جاقسى اكتريسا، تانىمال بلوگەر، ديزاينەر اتانعاندار بار. ءبىر كۇننىڭ ىشىندە ەلگە تانىمال بولۋ – ۇلكەن مۇمكىندىك. ال ودان ءارى سول مۇمكىندىكتى قالاي پايدالاناتىنى قىزدىڭ وزىنە بايلانىستى. ەگەر ول جەڭىسكە بەلگىلى ءبىر ماقساتپەن كەلىپ، ءتاجدى ءوز قابىلەتىن دامىتۋ ءۇشىن دۇرىس قولدانا السا، الدىنان تالاي ەسىك اشىلادى. مەن ولارعا جول مەن مۇمكىندىك بەرەمىن، – دەدى پروديۋسەر.

بايان ماقساتقىزى «قىز جىبەك» فيلمىندەگى قىزعىلت قامزولدىڭ وزىنە تابىستالۋىن كەزدەيسوقتىق دەپ سانامايتىنىن جەتكىزدى. ونىڭ ايتۋىنشا، جادىگەرگە قاتىستى قوعامدا تۋعان پىكىرتالاس كەيىن مەرۋەرت ۋتەكەشوۆاعا كومەكتەسۋ تۋرالى شەشىم قابىلداۋىنا سەبەپ بولعان.

«مەن جاراتقاننان كەلگەن بەلگىلەرگە سەنەمىن جانە ولاردى تۇسىنۋگە تىرىسامىن. نەلىكتەن بۇل قامزول باسقا ادامعا ەمەس، ءدال ماعان كەلدى؟ نەگە ول قازاقستاندا سونشالىقتى ۇلكەن اڭگىمە تۋدىردى؟ مەن مۇنىڭ ءبارى جايدان-جاي بولماعانىن ءتۇسىندىم. قامزولدى ەرتە مە، كەش پە مۋزەيگە تاپسىراتىنىمدى بىلەتىنمىن. تەك قاي مۋزەيگە بەرەتىنىم بەلگىسىز ەدى، – دەدى پروديۋسەر.

كەيىن ول جۋرناليست مايا بەكباەۆانىڭ مەرۋەرت وتەكەشوۆامەن سۇحباتىن كورىپ، اكتريسانىڭ جەكە باسپاناسى جوق ەكەنىن بىلگەن. وسىدان سوڭ جۇبايى تۇرسىنعالي الاگوزوۆپەن اقىلداسىپ، وعان تولىق جابدىقتالعان پاتەر سىيلاۋدى ۇيعارعان.

«سۇحباتتى كورگەننەن كەيىن بۇل ماعان بەرىلگەن بەلگى ەكەنىن ءتۇسىندىم. كۇيەۋىمە مەرۋەرت اپايعا پاتەر سىيلاۋىمىز كەرەك ەكەنىن ايتتىم. ول بىردەن كەلىستى. مەن جاي عانا بوس پاتەر بەرگىم كەلمەدى. ۇيگە كىرىپ، بىردەن ءومىر سۇرە الاتىنداي، ەشتەڭەگە الاڭدامايتىنداي جاعداي جاساعىم كەلدى، – دەدى بايان ماقساتقىزى.

پروديۋسەر بۇعان دەيىن مەرۋەرت وتەكەشوۆاعا ءومىر بويى اي سايىن ءبىر ميلليون تەڭگە كولەمىندە قارجىلاي قولداۋ كورسەتەتىنىن مالىمدەگەن. ونىڭ ايتۋىنشا، بۇل كومەك اكتريسانىڭ كۇندەلىكتى تۇرمىستىق قاجەتتىلىكتەرگە الاڭداماي، شىعارماشىلىقپەن اينالىسۋىنا مۇمكىندىك بەرەدى. بايان ماقساتقىزى سۇحبات كەزىندە مەرۋەرت وتەكەشوۆانىڭ سىڭلىسىمەن بىرگە تۇركيادا دەمالىپ جۇرگەنىن دە ايتتى. اكتريسانىڭ سوزىنشە، بۇل – ونىڭ ومىرىندەگى شەتەلگە ارنايى دەمالىسقا العاش رەت شىعۋى.

«ول ماعان سۋرەتتەرىن جىبەرىپ، ءوزىن ەرتەگىگە تاپ بولعانداي سەزىنىپ جۇرگەنىن ايتتى. دەمالىپ، جاڭا كۇشپەن ورالىپ، ستۋدەنتتەرگە ساباق بەرەدى. ونىڭ بۇدان بىلاي قاراپايىم تۇرمىستىق قاجەتتىلىكتەر ءۇشىن الاڭداماي، ءومىر ءسۇرىپ، قۋانعانىن قالادىم، – دەدى پروديۋسەر.

Abai.kz