سۋديالاردى ىرىكتەۋ تولىققاندى بالدىق باعالاۋ جۇيەسىنە كوشەدى. بۇل تۋرالى جوعارى سوت كەڭەسىنىڭ مۇشەسى جانات وسپانوۆا ايتتى.

— جوعارى سوت كەڭەسى سۋديالاردى ىرىكتەۋ جۇيەسىن ودان ءارى جەتىلدىرۋ جۇمىستارىن جالعاستىرىپ كەلەدى. قازىرگى ۋاقىتتا باستى نازار كانديداتتاردى باعالاۋ ولشەمدەرىن جەتىلدىرۋگە اۋدارىلعان. نەگىزگى ماقسات — باعالاۋ جۇيەسىن بۇرىنعىدان دا وبەكتيۆتى، اشىق ءارى ولشەنەتىن ەتۋ. وسىعان بايلانىستى كونكۋرستىڭ قولدانىستاعى ءۇش كەزەڭدى مودەلى ساقتالا وتىرىپ، تولىققاندى بالدىق باعالاۋ جۇيەسىنە كوشۋ جوسپارلانعان. بۇل ناتيجەلەردى اۆتوماتتى تۇردە ەسەپتەۋگە، سۋبەكتيۆتى فاكتوردىڭ ىقپالىن بارىنشا ازايتۋعا جانە كونكۋرستىق راسىمدەردى ودان ءارى تسيفرلاندىرۋعا مۇمكىندىك بەرەدى، — دەدى ول ورتالىق كوممۋنيكاتسيالار قىزمەتىندەگى بريفينگتە.

ونىڭ ايتۋىنشا، باعالاۋ كەزىندە سوت تورەلىگىن جۇزەگە اسىرۋ ساپاسىنا، كاسىبي بەدەلگە، ءبىلىم بەرۋ جانە عىلىمي جەتىستىكتەرگە، جوعارى جۇكتەمە جاعدايىنداعى جۇمىس تاجىريبەسىنە، مەملەكەتتىك ءتىلدى مەڭگەرۋ دەڭگەيىنە جانە كانديداتتىڭ سوت جۇيەسىن دامىتۋعا قوسقان ۇلەسىنە باسىمدىق بەرىلەدى.

— بۇل جۇمىستا سوتتارمەن ءوزارا ءىس-قيمىل جونىندەگى كەڭەستەردىڭ ءرولى ەرەكشە. وسى ورايدا ءبىر ماڭىزدى ماسەلەگە نازار اۋدارعىم كەلەدى. سۋديالاردى ىرىكتەۋ پروتسەسى قوعامنان وقشاۋ جۇرگىزىلمەيدى. سوتتارمەن ءوزارا ءىس-قيمىل جونىندەگى كەڭەستەر ارقىلى زاڭ قوعامداستىعىنىڭ، بۇقارالىق اقپارات قۇرالدارىنىڭ جانە جۇرتشىلىقتىڭ وكىلدەرى كانديداتتاردىڭ مورالدىق-ادامگەرشىلىك قاسيەتتەرىن باعالاۋعا قاتىسادى. دەمەك، بۇل ينستيتۋت سۋديالار كورپۋسىن قالىپتاستىرۋعا قوعامنىڭ ناقتى قاتىسۋىن قامتاماسىز ەتەتىن ماڭىزدى تەتىك. سوندىقتان بۇگىنگى مىندەت — كەڭەستەردىڭ وكىلەتتىكتەرىن كەڭەيتۋ ەمەس، ولاردىڭ قىزمەتىن بۇرىنعىدان دا اشىق، تۇسىنىكتى جانە وبەكتيۆتى ەتۋ، — دەدى جوعارى سوت كەڭەسىنىڭ مۇشەسى.

جانات وسپانوۆا وسى ماقساتتا كانديداتتار تۋرالى مالىمەتتەردى جيناۋ مەن تەكسەرۋدىڭ بىرىڭعاي ءتارتىبىن بەلگىلەۋ، بىرىڭعاي باعالاۋ ولشەمدەرىن ەنگىزۋ، قورىتىندىلاردىڭ بىرىزدەندىرىلگەن نىسانىن بەكىتۋ، كانديداتتاردىڭ پروتسەستىك قۇقىقتارىن ناقتىلاۋ جانە راسىمدەردىڭ اشىقتىعىن كۇشەيتۋ كوزدەلىپ وتىرعانىن ايتادى. بۇل وزگەرىستەر جوعارى سوت كەڭەسىنە كادرلىق شەشىمدەردى نەعۇرلىم دالەلدى ءارى وبەكتيۆتى قورىتىندىلار نەگىزىندە قابىلداۋعا مۇمكىندىك بەرمەك.

Abai.kz