مينيسترلىكتە قىرعىز رەسپۋبليكاسىنىڭ بەنزين جەتكىزۋ تۋرالى سۇرانىسى قاراستىرىلىپ جاتىر. كورشى ەل قازاقستانعا جانارماي جەتكىزۋگە قاتىستى رەسمي سۇرانىس جولدادى.

بۇل تۋرالى ەنەرگەتيكا ۆيتسە-ءمينيسترى قايىرحان تۇتقىشباەۆ مالىمدەدى. جۋرناليستەر ودان رەسەي مەن قىرعىزستانداعى بەنزين تاپشىلىعى، سونداي-اق اتىراۋ مۇناي وڭدەۋ زاۋىتىنداعى جوندەۋ جۇمىستارى اياسىندا كورشى ەلدەر جانارماي سۇراسا، قازاقستاننىڭ قالاي ارەكەت ەتەتىنىن سۇرادى.

تۇتقىشباەۆ رەسەيدەن ەنەرگەتيكا مينيسترلىگىنە رەسمي سۇرانىس تۇسپەگەنىن ەسكە سالدى. «قىرعىز تاراپىنان رەسمي سۇرانىس ءتۇستى، قازىر ونى قاراستىرىپ جاتىرمىز. بىراق بارلىق شەشىمدەر ۇلتتىق مۇددەلەردى جانە ىشكى تەڭگەرىمدى ەسكەرە وتىرىپ قابىلدانادى. سۇرانىستاردى قاناعاتتاندىرۋ ەل ىشىندەگى باعانىڭ وسۋىنە اكەپ سوقپايدى، مۇنى سىزدەرگە رەسمي تۇردە مالىمدەيمىن»، — دەپ ءتۇسىندىردى شەنەۋنىك.

ونىڭ ايتۋىنشا، قىرعىز رەسپۋبليكاسىنىڭ سۇرانىسى جاقىن ارادا قارالىپ، سودان كەيىن قازاقستاندىق تاراپ جاۋاپ بەرەدى.

Abai.kz