قازاقستاننىڭ جاس فيزيكتەرى بەدەلدى حالىقارالىق جارىستا ەلىمىزدىڭ تاريحىنداعى رەكوردتىق كورسەتكىشكە قول جەتكىزدى. 2026 جىلعى 4-12 شىلدە ارالىعىندا كولۋمبيانىڭ بۋكارامانگا قالاسىندا وتكەن 56-شى حالىقارالىق فيزيكا وليمپياداسىندا (IPhO) ۇلتتىق قۇرامانىڭ بارلىق بەس مۇشەسى دە التىن مەدالعا لايىق دەپ تانىلدى.

بيىلعى باسەكەگە الەمنىڭ 85 مەملەكەتىنەن 381 وقۋشى جينالىپ، كۇردەلى تەوريالىق ەسەپتەر مەن تاجىريبەلىك تاپسىرمالار ارقىلى ءبىلىم دەڭگەيلەرىن ساراپقا سالدى. قازاقستاندىق وقۋشىلار وتە جوعارى دايارلىق تانىتىپ، بارلىعى التىن مەدال يەلەندى. بۇل – ەلىمىزدىڭ اتالعان وليمپياداعا قاتىسۋ تاريحىنداعى تەڭدەسسىز ناتيجە.

التىن مەدال يەگەرلەرى:

ەگەنبەرگەنوۆا نۇرگۇل – استاناداعى NURORDA مەكتەپ-ليتسەيىنىڭ 11-سىنىپ وقۋشىسى;

ازاتبەكوۆ اميربەك – استاناداعى NIS (جاراتىلىستانۋ-ماتەماتيكا باعىتى) 12-سىنىپ وقۋشىسى;

قازىمبەك يلياس – استاناداعى Spectrum International School مەكتەبىنىڭ 12-سىنىپ وقۋشىسى;

چەرەمنوۆ رومان – الماتىداعى «ميراس» حالىقارالىق مەكتەبىنىڭ 12-سىنىپ وقۋشىسى;

قۇرمان دامير – استاناداعى NIS (جاراتىلىستانۋ-ماتەماتيكا باعىتى) 11-سىنىپ وقۋشىسى.

بۇل ايتۋلى تابىسقا قول جەتكىزۋ ءۇشىن كوماندا ءۇش جىل بويى تىنىمسىز دايىندالدى. وقۋشىلاردى مەكتەپ ۇستازدارى مەن تالىمگەرلەردەن بولەك، ارنايى جاتتىقتىرۋشىلار توبى دايارلادى. دايىندىققا ءال-فارابي اتىنداعى قازۇۋ-دىڭ اعا وقىتۋشىسى، PhD گۇليا نۇرباقوۆا جەتەكشىلىك ەتسە، وليمپيادا كەزىندە كوماندانى SDU ۋنيۆەرسيتەتىنىڭ اعا وقىتۋشىسى، PhD سامات ماقسۇتوۆ پەن حالىقارالىق وليمپيادالاردىڭ جۇلدەگەرى اليشەر ەركەباەۆ باستاپ باردى.

ايتا كەتسەك، حالىقارالىق فيزيكا وليمپياداسى 1967 جىلدان بەرى ۇيىمداستىرىلىپ كەلەدى، ال قازاقستان بۇل دوداعا 1997 جىلدان باستاپ قاتىسادى. ەگەر 2025 جىلى ۇلتتىق قۇراما قورجىنىندا ەكى كۇمىس جانە ءۇش قولا مەدال بولسا، بيىل بارلىق قاتىسۋشىنىڭ التىن مەدال يەلەنۋى – ۇلتتىق ءبىلىم سالاسىنداعى بۇرىن-سوڭدى بولماعان جەتىستىك.

قازاقستاننىڭ جاس دارىنداردى، ولاردىڭ ۇستازدارى مەن اتا-انالارىن وسى تاريحي جەڭىسپەن قۇتتىقتايمىز! بۇل – جاس فيزيكتەردىڭ قاجىرلى ەڭبەگى، مۇعالىمدەردىڭ كاسىبي شەبەرلىگى جانە ەلىمىزدەگى وليمپيادالىق قوزعالىستىڭ جوعارى دامىعانىنىڭ ايقىن دالەلى.

Abai.kz