قازاقستاندا حالىقتىڭ ناقتى اقشالاي تابىسى سوڭعى ءبىر جىلدا العاش رەت وڭ ءوسىم كورسەتتى. بۇل تۋرالى ۇلتتىق ەكونوميكا مينيسترلىگى ۇلتتىق ستاتيستيكا بيۋروسىنىڭ 2026 جىلدىڭ ءبىرىنشى توقسانى بويىنشا دەرەكتەرىنە سۇيەنە وتىرىپ حابارلادى.

ۆەدومستۆونىڭ مالىمەتىنشە، 2026 جىلدىڭ العاشقى ءۇش ايىندا حالىقتىڭ ناقتى اقشالاي تابىسى وتكەن جىلدىڭ سايكەس كەزەڭىمەن سالىستىرعاندا 0,1 پايىزعا ارتقان. ال جان باسىنا شاققانداعى ورتاشا نومينالدى اقشالاي تابىس ايىنا 252 619 تەڭگەنى قۇراپ، ءبىر جىل ىشىندە 11,8 پايىزعا ءوستى.

مينيسترلىك مۇنداي ناتيجەگە ينفلياتسيانىڭ بىرتىندەپ باياۋلاۋى ىقپال ەتكەنىن اتاپ ءوتتى. بيىل ماۋسىم ايىندا جىلدىق ينفلياتسيا دەڭگەيى 10,3 پايىزعا دەيىن تومەندەگەن.

حالىق تابىسىنىڭ نەگىزگى بولىگىن جالدامالى جۇمىستان تۇسەتىن كىرىس قۇرايدى. ءبىرىنشى توقساننىڭ قورىتىندىسى بويىنشا ورتاشا ايلىق نومينالدى جالاقى 9,1 پايىزعا ءوستى. جالاقىنىڭ ەڭ جوعارى ءوسىمى اۋىل شارۋاشىلىعى (20,3%), قارجى جانە ساقتاندىرۋ قىزمەتى (18,1%), وڭدەۋ ونەركاسىبى (14%) جانە كولىك پەن قويمالاۋ (12,9%) سالالارىندا تىركەلدى.

ۇلتتىق ەكونوميكا مينيسترلىگىنىڭ مالىمەتىنشە، مۇناي ەمەس سەكتورداعى ەڭبەكاقىنىڭ ءوسۋى ءوندىرىستى دامىتۋعا، ەڭبەك ونىمدىلىگىن ارتتىرۋعا جانە جاڭا جۇمىس ورىندارىن قۇرۋعا مۇمكىندىك بەرەدى.

ۆەدومستۆو حالىقتىڭ ناقتى تابىسىن ارتتىرۋ ۇكىمەتتىڭ نەگىزگى باسىمدىقتارىنىڭ ءبىرى بولىپ قالا بەرەتىنىن اتاپ ءوتتى. بۇل باعىتتا ەڭ تومەنگى جالاقىنى كەزەڭ-كەزەڭىمەن كوتەرۋ، ەڭبەك ونىمدىلىگىن ارتتىرۋ، كاسىپكەرلىكتى قولداۋ جانە جوعارى قوسىلعان قۇنى بار وندىرىستەردى دامىتۋ بويىنشا كەشەندى شارالار جۇزەگە اسىرىلىپ جاتىر.

Abai.kz