الماتى اكىمى دارحان ساتىبالدىنىڭ توراعالىعىمەن قالاداعى وقۋشى ورىندارىنىڭ تاپشىلىعىن جويۋ جانە ءبىلىم بەرۋ ينفراقۇرىلىمىن دامىتۋ جونىندەگى كەشەندى جوسپاردىڭ ىسكە اسىرىلۋىنا ارنالعان جۇمىس كەڭەسى ءوتتى.

2025–2026 وقۋ جىلىنىڭ قورىتىندىسى بويىنشا الماتىداعى 360 مەكتەپتە 357 225 وقۋشى ءبىلىم الدى. قازىرگى تاڭدا قالادا 29 735 وقۋشى ورنىنا قاجەتتىلىك بار. اسىرەسە، اۋەزوۆ، الاتاۋ جانە بوستاندىق اۋداندارىندا تاپشىلىق كوپتەپ بايقالادى. جۇكتەمەنىڭ ارتۋىنا مەكتەپ جاسىنداعى بالالار سانىنىڭ كوبەيۋى جانە ىشكى كوشى-قون اسەر ەتكەن. تەك بىلتىرعى وقۋ جىلىنىڭ وزىندە الماتى مەكتەپتەرىنە ەلىمىزدىڭ باسقا وڭىرلەرىنەن 17 847 وقۋشى اۋىسىپ كەلگەن. ولاردىڭ جارتىسىنا جۋىعى الماتى وبلىسىنان.

كەڭەس بارىسىندا قولدانىستاعى تاپشىلىقتى كەزەڭ-كەزەڭىمەن ازايتۋعا مۇمكىندىك بەرەتىن كەشەندى شارالار قارالدى. جاڭا وقۋ جىلى باستالعانعا دەيىن قالادا سەگىز جاڭا مەكتەپ اشىلادى. ونىڭ جەتەۋى «كەلەشەك مەكتەپتەرى» ۇلتتىق جوباسى اياسىندا، بىرەۋى جەرگىلىكتى بيۋدجەت قاراجاتى ەسەبىنەن سالىنعان مەكتەپ. سونىمەن قاتار قولدانىستاعى ءۇش مەكتەپكە قوسىمشا عيماراتتاردىڭ قۇرىلىسى اياقتالادى. سونىڭ ناتيجەسىندە 12 200 جاڭا وقۋشى ورنى اشىلادى.

كەڭەستە مەكتەپكە دەيىنگى ءبىلىم بەرۋ سالاسىن دامىتۋ جايى دا قارالدى. قازىرگى تاڭدا الماتىدا 1 098 بالاباقشا جۇمىس ىستەيدى، ولارعا 88 مىڭنان استام بالا بارادى. جىل باسىنان بەرى شامامەن 3 مىڭ ورىندىق 33 جاڭا بالاباقشا اشىلدى. جىل سوڭىنا دەيىن تاعى 23 بالاباقشا اشۋ جوسپارلانعان. بۇل مەكتەپكە دەيىنگى بىلىممەن قامتۋ دەڭگەيىن 96,6%-عا جەتكىزىپ، كەزەكتە تۇرعان بالالار سانىن ەكى مىڭعا دەيىن قىسقارتۋعا مۇمكىندىك بەرەدى.

كەڭەس سوڭىندا الماتى اكىمى جاڭا ءبىلىم بەرۋ نىساندارىن ۋاقىتىلى پايدالانۋعا بەرۋدى، بارلىق جوبانىڭ جۇزەگە اسىرىلۋىن كۇشەيتۋدى جانە شاھارداعى حالىق سانى قارقىندى ءوسىپ جاتقان اۋدانداردا وقۋشى ورىندارىنىڭ تاپشىلىعىن كەزەڭ-كەزەڭىمەن جويۋ ءۇشىن قوسىمشا شارالار قابىلداۋدى تاپسىردى.

Abai.kz