ۇلتتىق بانك ينفلياتسيانى 5%-عا دەيىن ءتۇسىرۋدى جوسپارلاپ وتىر. ول ءۇشىن اقشا-كرەديت ساياساتى جالعاسىپ، قاجەت بولسا قوسىمشا شارالار قابىلدانادى.

بۇل تۋرالى ۇلتتىق بانكتە وتكەن بريفينگتە بانك توراعاسى تيمۋر سۇلەيمەنوۆ ايتتى.

ونىڭ ايتۋىنشا، بانكتىڭ باستى ماقساتى — ەلدەگى باعا ءوسىمىن تۇراقتاندىرىپ، ينفلياتسيانى 5%-عا دەيىن جەتكىزۋ.

— بىزدىڭ نەگىزگى مىندەت — باعا تۇراقتىلىعىن قامتاماسىز ەتۋ جانە ينفلياتسيانى 5%-عا جەتكىزۋ. ينفلياتسيانىڭ تۇراقتى ءارى بولجامدى دەڭگەيدە بولۋى ەكونوميكانىڭ دامۋى مەن حالىقتىڭ ءال-اۋقاتىنىڭ ارتۋىنا ىقپال ەتەدى، — دەدى ول.

ونىڭ سوزىنشە، سوڭعى ايلاردا ينفلياتسيا باياۋلاعانىمەن، باعانىڭ وسۋىنە اسەر ەتەتىن تاۋەكەلدەر ءالى دە ساقتالىپ وتىر.

— بۇعان حالىقتىڭ بەلسەندى تۇتىنۋى مەن ينفلياتسيالىق كۇتۋلەردىڭ جوعارى بولۋى سەبەپ بولىپ وتىر، — دەدى سپيكەر.

سۇلەيمەنوۆ بازالىق مولشەرلەمەگە قاتىستى كەلەسى شەشىمدەر الدىن الا بەلگىلەنبەيتىنىن ايتتى.

— ولار ينفلياتسيانىڭ قالاي وزگەرەتىنىنە، ىشكى سۇرانىسقا، جانار-جاعارماي باعاسىنا، بيۋدجەت شىعىستارىنا جانە باسقا دا ەكونوميكالىق كورسەتكىشتەرگە قاراي قابىلدانادى، — دەدى ول.

سونداي-اق ول ۇكىمەتپەن بىرگە ينفلياتسيانى ءبىر تاڭبالى دەڭگەيگە تۇسىرۋگە باعىتتالعان بىرلەسكەن باعدارلاما جۇزەگە اسىپ جاتقانىن ايتتى. قاجەت بولعان جاعدايدا بۇل شارالار قايتا قارالىپ، تولىقتىرىلاتىن بولادى.

Abai.kz