داۋىس بەرۋ كۇنى جاقىنداعان سايىن پارتيالار وڭىرلەردەگى سايلاۋالدى جۇمىسىن جالعاستىرىپ جاتىر. ناۋقان اياسىندا جەرگىلىكتى ماسەلەگە ويىسىپ، ءار ءوڭىردىڭ وزەكتى تۇيتكىلدەرى الدىڭعى قاتارعا شىعادى.

ءبىر جەردە – جۇمىسپەن قامتۋ، ەندى بىرىندە – ەكولوگيا، ونەركاسىپ، الەۋمەتتىك ينفراقۇرىلىم نەمەسە اۋىلدى دامىتۋ ماسەلەسى كوتەرىلەدى. جەرگىلىكتى جەردەگى كەزدەسۋلەر پارتيا باعدارلاماسىنىڭ ەل تۇرعىندارىنىڭ ناقتى سۇرانىسىنا قانشالىقتى سايكەس كەلەتىنىن باعالاۋدىڭ ماڭىزدى الاڭىنا اينالدى. تومەندە 6 تامىز كۇنى قۇرىلتاي دەپۋتاتتىعىنا كانديداتتاردىڭ قاي وڭىرلەرگە بارىپ، قانداي اۋديتوريامەن كەزدەسكەنىنە شولۋ ۇسىنامىز.

«ادىلەت» پارتياسى وڭىرلەردەگى جۇمىسىن «ادىلەتتى قازاقستان ءۇشىن» ءموبيلدى كەرۋەنى اياسىندا جالعاستىردى. قوستاناي وبلىسىندا كەرۋەننىڭ باعىتى ۇزىنكول، مەڭدىقارا، التىنسارين، اۋليەكول جانە قاراسۋ اۋداندارىن قامتىدى. 700-دەن استام اۋىل تۇرعىنىمەن وتكەن كەزدەسۋدە جولداردىڭ جاعدايى، اۋىزسۋمەن قامتاماسىز ەتۋ، بايلانىس ساپاسى جانە جاستاردى جۇمىسپەن قامتۋ ماسەلەسى تالقىلاندى.

كەلەسى باعىت جامبىل وبلىسى بولدى. مۇندا اۋىل شارۋاشىلىعى سالاسىنداعى ماسەلەلەر كۇنتارتىبىندە تۇردى. پارتيا توراعاسى ايبەك دادەباي باستاعان كەرۋەن جۋالى اۋدانىنداعى شارۋا قوجالىعى مەن ءسۇت وڭدەۋ كووپەراتيۆىنە بارىپ، نۇرلىكەنت اۋىلىنىڭ تۇرعىندارىمەن جەكە كەزدەسۋ وتكىزدى.

جالپىۇلتتىق سوتسيال-دەموكراتيالىق پارتيا كۇندى وتكەن تەلەدەباتتاردى تالداۋعا ارنادى. پارتيانىڭ رەسپۋبليكالىق سايلاۋالدى شتابىندا «جەتىنشى ارنا» ەفيرىندە پارتيا اتىنان پىكىرسايىسقا قاتىسقان قۇرىلتاي دەپۋتاتتىعىنا كانديدات ماقسۇت ناسيبۋلوۆتىڭ ءسوزى تالقىلاندى.

سايلاۋالدى كۇن تارتىبىندەگى نەگىزگى تاقىرىپتاردىڭ ءبىرى ءتورت كۇندىك جۇمىس اپتاسىنا كوشۋ ماسەلەسى بولدى. بۇل باستاما قوعامدا كەڭ پىكىرتالاس تۋعىزدى. جسدپ توراعاسى اسحات راحىمجانوۆ Respublica پارتياسى وكىلدەرىنىڭ سىن-پىكىرىنە جاۋاپ بەرىپ، ءتورت كۇندىك جۇمىس اپتاسى ەنگىزىلگەن نەمەسە ەنگىزۋ مۇمكىندىگى قاراستىرىلىپ جاتقان ەلدەردىڭ تاجىريبەسى ەسكەرىلىپ وتىرعانىن ايتتى.

«بايتاق» پارتياسى بىردەن بىرنەشە وڭىردە كەزدەسۋ وتكىزدى. پەتروپاۆلدا ەرىكتىلەر مەن كانديدات الماز جاكيشەۆ ءۇي-ءۇيدى ارالاۋ فورماتىندا جۇمىس جۇرگىزىپ، پارتيا مالىمەتىنشە، 300-دەن استام تۇرعىنمەن تىلدەستى.

جەتىسۋ وبلىسىنىڭ مۇقىرى اۋىلىندا كانديدات تەمىرلان فايزۋلين اۋىل تۇرعىندارىمەن ەكوتۋريزمدى دامىتۋ ماسەلەسىن تالقىلادى. كانديدات ۆلاديمير مارتەل الماتى اۋىر ماشينا جاساۋ زاۋىتىنىڭ ەڭبەك ۇجىمىمەن كەزدەسىپ، ءوندىرىستى ەكولوگيالىق جاڭعىرتۋ تاقىرىبىن كوتەردى.

ال شىمكەنتتە تۇركىستان كوشەسىنىڭ تۇرعىندارىمەن كەزدەسۋدە جاعىمسىز ءيىس ماسەلەسى ءسوز بولدى. سونىمەن قاتار پارتيا وكىلدەرى الماتىداعى №15 ەمحانادا مەديتسينا قىزمەتكەرلەرىنىڭ ەڭبەك جاعدايىن، ال اقتوبە وبلىسىنداعى بالاباقشادا ەكولوگيالىق تاربيەنى دامىتۋ ماسەلەسىن تالقىلادى.

قازاقستان حالىق پارتياسى بىرنەشە وبلىستا ەڭبەك ۇجىمدارىمەن كەزدەسۋلەر وتكىزدى. كانديداتتار بولات سماعۇلوۆ پەن نۇرجان بياقاەۆ ەڭبەك موبيلدىلىگى ورتالىعىنىڭ ۇجىمىمەن كەزدەسىپ، جۇمىسپەن قامتۋ ماسەلەسىن تالقىلادى.

اتىراۋدا «بانك تسەنتركرەديت» فيليالىنىڭ قىزمەتكەرلەرىمەن، وسكەمەندە اۆتوپارك ۇجىمىمەن كەزدەسۋ ءوتتى. وندا جۇرگىزۋشىلەردىڭ جالاقىسى، كادر تاپشىلىعى جانە ەڭبەك قاۋىپسىزدىگى ماسەلەسى كوتەرىلدى.

قاراعاندىدا كانديداتتار «گوركومترانس» كاسىپورنىنىڭ ۇجىمىمەن، پاۆلودار وبلىسىندا دارىگەرلىك امبۋلاتوريا مەن «Ertis Su» كاسىپورنىنىڭ قىزمەتكەرلەرىمەن كەزدەستى. سونداي-اق پارتيا قاراعاندى يندۋستريالىق ۋنيۆەرسيتەتىندەگى كەزدەسۋدەن كەيىن 40 ادامنىڭ پارتيا قاتارىنا وتكەنىن حابارلادى.

«اۋىل» پارتياسى قاراعاندى وبلىسىنداعى شاحتەر اۋىلدىق وكرۋگىندە سايلاۋالدى جۇمىسىن جالعاستىردى. مۇندا پارتيا وكىلدەرى «شاحتەرسكوە» جشس ۇجىمىمەن جانە اۋىل تۇرعىندارىمەن كەزدەسىپ، اۋىل شارۋاشىلىعى كاسىپورنىنىڭ قىزمەتىمەن تانىستى.

كەزدەسۋلەر بارىسىندا ەليتالىق تۇقىم شارۋاشىلىعىن دامىتۋ، اگرارلىق سەكتوردى مەملەكەتتىك قولداۋ، زاماناۋي اگروتەحنولوگيالاردى ەنگىزۋ، جەر مەن سۋ رەسۋرستارىن ءتيىمدى پايدالانۋ، اۋىل شارۋاشىلىعى ونىمدەرىن وڭدەۋ، جاڭا جۇمىس ورىندارىن اشۋ، اۋىل ينفراقۇرىلىمىن دامىتۋ جانە ازىق-تۇلىك قاۋىپسىزدىگىن قامتاماسىز ەتۋ ماسەلەسى تالقىلاندى.

سونداي-اق پارتيا وكىلدەرى نۇرا اۋدانىنداعى شاحتەر اۋىلىنا بارىپ، تۇرعىندارمەن جانە شارۋاشىلىق ۇجىمىمەن كەزدەستى. ولار ەگىستىك القاپتارىن، سۋارۋ جۇيەلەرىن جانە وندىرىستىك نىسانداردى ارالادى. كەزدەسۋ بارىسىندا اۋىلدىق اۋماقتاردى دامىتۋ، اۋىل شارۋاشىلىعى ونىمدەرىن ساقتاۋ مەن وڭدەۋ، سونداي-اق اۋىل تۇرعىندارىن جۇمىسپەن قامتۋ ماسەلەلەرى كوتەرىلدى.

«اق جول» دەموكراتيالىق پارتياسى توراعا دانيا ەسپاەۆا باستاعان دەلەگاتسيامەن الماتىداعى «ۇركەر-اش» جشس ەڭبەك ۇجىمىمەن جانە لوگيستيكا سالاسىنىڭ وكىلدەرىمەن كەزدەستى. وندا ءوندىرىستى دامىتۋ جانە كاسىپكەرلىكتى قولداۋ ماسەلەلەرى تالقىلاندى.

كانديدات ۆيكتور ميكريۋكوۆ پارتيانىڭ مىندەتتى الەۋمەتتىك مەديتسينالىق ساقتاندىرۋ ء(مامس) جۇيەسىندە ازاماتتاردىڭ جەكە شوتتارىن ەنگىزۋ جونىندەگى ۇسىنىسىن تانىستىردى. تۇركىستان وبلىسىندا پارتيا فيليالىنىڭ وكىلدەرى «اتلانت» شيپاجايىنىڭ ۇجىمىمەن كەزدەستى.

Respublica پارتياسى شىمكەنتتەگى جۇمىسىن اليۋميني پروفيلدەرى مەن كابەل ونىمدەرىن شىعاراتىن Alutech كاسىپورنىنا بارۋدان باستادى. كانديداتتار ءوندىرىس بارىسىمەن تانىسىپ، قىزمەتكەرلەردىڭ سۇراقتارىنا جاۋاپ بەردى.

پارتيا وكىلدەرى شىمكەنت پەن تۇركىستان وبلىسىنداعى بىرقاتار كاسىپورىنداردىڭ ەڭبەك ۇجىمدارىمەن كەزدەستى. «التىن ءدان» كاسىپورنىندا ءوندىرىستى دامىتۋ، كاسىپكەرلىك، دەنساۋلىق ساقتاۋ جانە الەۋمەتتىك سالا ماسەلەسى تالقىلاندى.

لەڭگىر اۋدانىندا پارتيا وكىلدەرى «بالمۇزداق» جشس-نە بارىپ، ەلەكترمەن جابدىقتاۋدىڭ سەنىمدىلىگى، ينجەنەرلىك ينفراقۇرىلىم جانە ءوندىرىستى دامىتۋ ماسەلەلەرىن قاراستىردى. سونداي-اق وتاندىق شيكىزاتتان ءونىم وندىرەتىن «شىمكەنتماي» اق-دا بولىپ، وتاندىق ءوندىرىستى قولداۋ، ەكسپورتتى دامىتۋ، تسيفرلاندىرۋ، جاساندى ينتەللەكت تەحنولوگيالارىن ەنگىزۋ، ستۋدەنتتىك جاتاقحانالار سالۋ جانە الەۋمەتتىك باستامالاردى جۇزەگە اسىرۋ ماسەلەسىن تالقىلادى.

وسىلايشا، سايلاۋالدى ناۋقاننىڭ كەزەكتى كەزەڭى ءىرى قالالار مەن اۋىلدىق ەلدى مەكەندەردى قاتار قامتىعان وڭىرلىك كەزدەسۋ فورماتىندا جالعاسىپ جاتىر. كوتەرىلگەن ماسەلەلەر ءار ءوڭىردىڭ ەرەكشەلىگى مەن كاسىپورىنداردىڭ قىزمەت باعىتىنا قاراي ءارتۇرلى بولعانىمەن، باسىم بولىگى ەكونوميكا، اۋىل شارۋاشىلىعى، كاسىپكەرلىك، ينفراقۇرىلىم، الەۋمەتتىك سالا، دەنساۋلىق ساقتاۋ، ەكولوگيا جانە حالىقتىڭ ءومىر ءسۇرۋ ساپاسىن ارتتىرۋ تاقىرىپتارىنا ارنالدى.

Abai.kz