قر ۆيتسە-پرەزيدەنتى ەرلان قارين ماڭعىستاۋ وبلىسىندا وقۋ-جاتتىعۋ كەزىندە اسكەري قىزمەتشىلەردىڭ قازا تابۋىنا قاتىستى جازبا جاريالادى.

«ماڭعىستاۋ وبلىسىندا وقۋ-جاتتىعۋ كەزىندە اسكەري قىزمەتشىلەردىڭ قازا تابۋى جالپىۇلتتىق قاسىرەتكە اينالدى. مەملەكەت باسشىسى وسى وقيعاعا قاتىستى بارلىق نەگىزگى ماسەلەنى، ياعني زارداپ شەككەندەرگە كومەك كورسەتۋ، مۇنداي جاعدايلاردىڭ قايتالانۋىنا جول بەرمەس ءۇشىن وقيعانىڭ ءمان-جايىن جان-جاقتى ءارى وبەكتيۆتى تەرگەۋ جونىندەگى جۇيەلى شارالاردى جەدەل تۇردە جەكە باقىلاۋىنا الدى. پرەزيدەنت قاسىم-جومارت توقاەۆ جالپىۇلتتىق ازا تۇتۋ كۇنىن جاريالاپ، قايتىس بولعان اسكەري قىزمەتشىلەردىڭ وتباسىلارىنا كوڭىل ايتۋ جەدەلحاتتارىن جولداپ، ولاردىڭ تۋعان-تۋىستارى مەن جاقىندارىنا جەكە ءوز اتىنان كوڭىل ايتتى. مەملەكەت باسشىسىنىڭ جارلىعىمەن وقۋ-جاتتىعۋ كەزىندە قازا تاپقان 14 اسكەري قىزمەتشى «ايبىن» وردەنىمەن ماراپاتتالدى. پرەزيدەنتتىڭ تاپسىرماسىمەن ۇكىمەتتىك كوميسسيا قۇرىلىپ، وقيعا ورنىنا شۇعىل جىبەرىلدى. مەملەكەت باسشىسى قايتىس بولعان اسكەري قىزمەتشىلەردىڭ وتباسىلارى مەن زارداپ شەككەن جاۋىنگەرلەرگە قاجەتتى بارلىق كومەك پەن قولداۋدى كورسەتۋدى تاپسىردى»، - دەپ جازدى ۆيتسە-پرەزيدەنت.

قۇقىق قورعاۋ ورگاندارى قايعىلى وقيعانىڭ بارلىق ءمان-جايى مەن سەبەپتەرىن انىقتاۋ ءۇشىن سوتقا دەيىنگى تەرگەپ-تەكسەرۋدى باستاعانىن ايتقان ەرلشان تىنىمبايۇلى العاشقى كەزەكتەگى تەرگەۋ جانە پروتسەسسۋالدىق ءىس-ارەكەتتەر جۇرگىزىلگەنىن، قورعانىس مينيسترلىگىنىڭ بىرقاتار لاۋازىمدى تۇلعاسى كۇدىكتى رەتىندە ۇستالعانىن جانە قازىرگى ۋاقىتتا تەرگەۋ امالدارى جالعاسىپ جاتىر جانە باس پروكۋراتۋرا مەن ىشكى ىستەر مينيسترلىگىنىڭ ەرەكشە باقىلاۋىندا. قازاقستان حالىق كەڭەسىنىڭ مۇشەلەرى، قۇرىلتاي دەپۋتاتتارى، ساياسي پارتيالاردىڭ وكىلدەرى، كاسىپكەرلەر، مەتسەناتتار جانە باسقا دا ازاماتتار قازا تاپقان اسكەري قىزمەتشىلەردىڭ وتباسىنا قولداۋ كورسەتۋگە دايىن ەكەنىن ءبىلدىردى.

«قىسقا مەرزىم ىشىندە قاراجات جيناۋ ءىسىنىڭ جەدەل ءارى اشىق جۇرگىزىلۋىن قامتاماسىز ەتەتىن ارنايى قور قۇرىلدى. سونداي-اق قازاقستان حالىق كەڭەسىنىڭ مۇشەسى بەكمۇرات ءجۇسىپوۆ باسقاراتىن قوعامدىق كوميسسيا جاساقتالدى.

كوميسسيانىڭ نەگىزگى مىندەتى – جينالعان قايىرىمدىلىق قاراجاتىن ءادىل ءارى اشىق ءبولۋدى قامتاماسىز ەتۋ. جۇرتشىلىقتىڭ الداعى ۋاقىتتا دا قابىلدانعان بارلىق شارالار تۋرالى ۋاقتىلى ءارى اشىق اقپارات الىپ وتىرۋى قامتاماسىز ەتىلەتىن بولادى. ەڭ باستىسى مەملەكەت تەك جەدەل ارەكەت ەتىپ قانا قويماي، وقيعالاردىڭ تۇپكى سەبەپتەرىن جويۋعا باعىتتالعان جۇيەلى ءارى كەشەندى شەشىمدەردى قابىلداۋدا.

پرەزيدەنت قورعانىس مينيسترلىگىنىڭ جاڭا باسشىسىن تاعايىنداپ، ۆەدومستۆونىڭ جۇمىسىن كەشەندى تەكسەرۋ جونىندە كوميسسيا قۇردى. قارجى جانە اسكەري بولىمدەردىڭ ماتەريالدىق-تەحنيكالىق قامتاماسىز ەتىلۋ جاعدايىنا جۇرگىزىلگەن ءاۋديتتىڭ العاشقى قورىتىندىسى جەتى كۇن ىشىندە باياندالۋعا ءتيىس.

بۇدان بولەك، مەملەكەت باسشىسى ون كۇن ىشىندە ارميانى رەفورمالاۋدىڭ ارنايى جوسپارىن ازىرلەۋدى تاپسىردى. پرەزيدەنت اتاپ وتكەندەي، رەفورمانىڭ باستى مىندەتى – اسكەري قىزمەتشىلەردىڭ قاۋىپسىزدىگى مەن ءومىرى نەگىزگى باسىمدىققا اينالاتىن جاڭا ۇلگىدەگى ارميا قۇرۋ.

وسىلايشا، از عانا ۋاقىتتىڭ ىشىندە مەملەكەت باسشىسى كادرلىق تاعايىنداۋدان باستاپ اسكەردى تۇبەگەيلى رەفورمالاۋعا دەيىنگى بارلىق نەگىزگى شەشىمدەردى قابىلدادى»، - دەپ جازدى ۆيتسە-پرەزيدەنت.

Abai.kz