الماتى قالاسىنىڭ المالى اۋداندىق سوتىندا سانجار بوقاەۆ پەن باسقا دا ايىپتالۋشىلارعا قاتىستى قىلمىستىق ءىس بويىنشا سوت وتىرىسى جالعاسىپ جاتىر. اقشا قاراجاتىن جىمقىرۋعا قاتىستى ەپيزودتى قاراۋ بارىسىندا «قازترانسگاز» اق كاسىپوداق ۇيىمىنىڭ قىزمەتىنە جانە شارتتار جاساسۋ تارتىبىنە قاتىستى ءمان-جايلار زەرتتەلدى.

كەزەكتى سوت وتىرىسىندا جابىرلەنۋشى رەتىندە تانىلعان مۇحتار ءامىرحانوۆ 2017-2018 جىلدارى «قازترانسگاز» اق زاڭ دەپارتامەنتىندە زاڭگەر بولىپ جۇمىس ىستەگەنىن ايتتى. سول ۋاقىتتا ول كاسىپوداق مۇشەسى بولىپ، قوعامدىق نەگىزدە ۇيىمعا قۇقىقتىق قولداۋ كورسەتىپ، كاسىپوداق كوميتەتىنىڭ حاتشىسى مىندەتىن قاتار اتقارعان.

ونىڭ ايتۋىنشا، ول كاسىپوداق كوميتەتىنىڭ وتىرىستارىنا تىكەلەي قاتىسىپ، كۇن ءتارتىبىن قالىپتاستىرعان، تالقىلانعان ماسەلەلەر مەن قابىلدانعان شەشىمدەردى تىركەپ وتىرعان.

سوت تالقىلاۋى بارىسىندا سانجار بوقاەۆتىڭ كاسىپوداق قىزمەتىندەگى رولىنە جانە شارتتاردى جاساسۋدىڭ ءمان-جايلارىنا ەرەكشە نازار اۋدارىلدى.

بۇل رەتتە، ءامىرحانوۆ ءوز ايعاقتارىندا سانجار بوقاەۆتىڭ «قازترانسگاز» اق كاسىپوداق كوميتەتىنىڭ جيىندارىنا باس كومپانيانىڭ وكىلى رەتىندە قاتىسقانىن، سونداي-اق 2018 جىلى «باتىس قىتاي – باتىس ەۋروپا» باعىتى بويىنشا گاز موتورلى وتىنمەن جۇرەتىن اۆتوكولىكتەردىڭ حالىقارالىق اۆتوكەرۋەنىن ۇيىمداستىرۋ جانە وتكىزۋ جونىندەگى شارتتاردى جاساسۋعا باستاماشى بولعانىن ايتتى. سونىمەن قاتار، جاۋاپ الۋ بارىسىندا ءامىرحانوۆ بوقاەۆتىڭ مەردىگەر رەتىندە «BM Trust» جانە «We Can» جشس-لارىن ۇسىنعان بولۋى مۇمكىن ەكەنىن راستادى.

ءامىرحانوۆتىڭ تۇسىندىرۋىنشە، شارت جاساسۋ تۋرالى شەشىمدەردى كاسىپوداق كوميتەتىنىڭ مۇشەلەرى داۋىس بەرۋ ارقىلى قابىلداپ، ولار حاتتامالارمەن راسىمدەگەن. الايدا حاتتامالار وتىرىستار وتكەننەن كەيىن دە قول قويىلىپ بەكىتىلۋى مۇمكىن بولعان.

ونىڭ تۇسىندىرۋىنشە، شارتتاردى كەلىسۋدىڭ مىندەتتى جازباشا رەگلامەنتى بولماعان، سونداي-اق ولاردى قاراۋدىڭ ناقتى بەلگىلەنگەن مەرزىمدەرى دە كوزدەلمەگەن. قۇجاتتاردى زاڭ، ەكونوميكا جانە بۋحگالتەريا قىزمەتتەرىنىڭ قوسىمشا تەكسەرۋىنەن وتكىزۋدى مىندەتتەيتىن تالاپ بولماعان.

ەسكە سالا كەتسەك، سانجار بوقاەۆقا قىلمىستىق كودەكتىڭ بەس بابى بويىنشا ايىپ تاعىلىپ وتىر: اسا ءىرى مولشەردەگى الاياقتىق (190-باپ), قىلمىستىق جولمەن الىنعان اقشا قاراجاتىن زاڭداستىرۋ (218-باپ), ۇرلىق (188-باپ), اعاشتاردى زاڭسىز كەسۋ (340-باپ) جانە كورىنەۋ جالعان اقپارات تاراتۋ (274-باپ).

اتالعان ءىس بويىنشا وزگە دە ايىپتالۋشىلاردىڭ قاتارىندا الاياقتىق جاسادى جانە قىلمىستىق جولمەن الىنعان كىرىستەردى زاڭداستىردى دەپ ايىپتالعان ونىڭ جيەنى ماديار قالمەنوۆ، سونداي-اق ۇرلىق جاسادى، اعاشتاردى زاڭسىز كەستى جانە كورىنەۋ جالعان اقپارات تاراتتى دەپ ايىپتالعان موبيلوگراف ۇلان نۇسىپقوجا بار.

Abai.kz