ارمەنيا رەسپۋبليكاسى ۇجىمدىق قاۋىپسىزدىك تۋرالى شارت ۇيىمىنىڭ (ۇقشۇ) قۇرامىنداعى مۇشەلىگىن زاڭدى تۇردە ساقتاپ وتىر.

دەسە دە، ەل ۇيىمنىڭ ءىس-شارالارىنا قاتىسۋدان باس تارتىپ، قاتارىنان ءۇشىنشى جىل قاتارداعى مۇشەلىك جارناسىن تولەمەي كەلەدى. بۇل تۋرالى 21 قازاندا ۇقشۇ باس حاتشىسى تالاتبەك ماسادىقوۆ مالىمدەدى.

ۇيىم باسشىلىعىنىڭ ايتۋىنشا، قازىرگى تاڭدا ەرەۆان ۇيىم شەڭبەرىندەگى شەشىمدەردى قابىلداۋ مەن بىرلەسكەن جوبالاردى جۇزەگە اسىرۋ پروتسەستەرىنەن ءىس جۇزىندە تىس قالىپ وتىر. ايتسە دە، رەسمي دەڭگەيدە ەلدىڭ ۇيىم قۇرامىنان شىعۋى تۋرالى تۇپكىلىكتى قۇجاتتىق شەشىم ءالى قابىلدانعان جوق.

تالاتبەك ماسادىقوۆ بۇل ماسەلەنىڭ بولاشاعى تىكەلەي ەرەۆاننىڭ ساياسي ۇستانىمىنا بايلانىستى ەكەنىن اتاپ ءوتتى:

«ارمەنيانىڭ ۇيىمعا مۇشەلىگىنە قاتىستى تۇپكىلىكتى شەشىمدى تەك ارمەنيا بيلىگى مەن وسى ەلدىڭ حالقى قابىلداۋى ءتيىس», — دەدى ۇقشۇ باس حاتشىسى.

سوڭعى جىلدارى ەرەۆان مەن ۇقشۇ اراسىنداعى قارىم-قاتىناستا سالقىندىق بايقالىپ كەلەدى. ارمەنيا بيلىگى ۇيىمنىڭ ايماقتىق قاۋىپسىزدىكتى قامتاماسىز ەتۋدەگى مىندەتتەرىن ورىنداۋ دەڭگەيىنە نارازىلىق ءبىلدىرىپ، ۇيىم اياسىنداعى دە-فاكتو بەلسەندىلىگىن توقتاتقان بولاتىن.

Abai.kz