الماتى قالاسىنىڭ المالى اۋداندىق سوتىندا سانجار بوقاەۆقا قاتىستى ءىس بويىنشا «قازترانسگاز» كومپانياسىنىڭ بۇرىنعى ءباسپاسوز قىزمەتىنىڭ جەتەكشىسى بەكسۇلتان قۇرمانقۇلدان جاۋاپ الىندى.

كۋاگەردىڭ ايعاقتارى مەملەكەتتىك ايىپتاۋ تاراپىنىڭ نۇسقاسىن تولىق راستايدى: بوقاەۆ وزىنە باعىنىشتى كومپانيالاردى تاڭداۋدان باستاپ، جالعان قۇجاتتاردى بەكىتۋگە دەيىنگى سحەمانىڭ ءاربىر كەزەڭىن جەكە ءوزى باقىلاعان.

قۇرمانقۇل كومپانيانىڭ ءباسپاسوز قىزمەتىن 2014-2022 جىلدارى ارالىعىندا باسقارعان. ول سوتتا بوقاەۆ كەلگەنگە دەيىن دە، كەتكەننەن كەيىن دە بولىمشە تەك اپپارات باسشىسىنا باعىنعانىن ايتتى. الايدا بوقاەۆ قىزمەتكە كەلگەن ساتتەن باستاپ ءباسپاسوز قىزمەتى ونىڭ باقىلاۋىنا وتكەن.

سوتتا كاسىپوداق قاراجاتىنا ۇيىمداستىرىلعان اۆتوشەرۋ باستى نازاردا بولدى. جاۋاپ الۋ بارىسىندا بەكسۇلتان قۇرمانقۇل تەرگەۋ كەزەڭىندە بەرگەن ايعاقتارىن راستادى. بۇل دەرەكتەردىڭ ماڭىزى زور، ويتكەنى ولار قاراجاتتى جىمقىرۋدىڭ ناقتى قالاي راسىمدەلگەنىن ەگجەي-تەگجەيلى تۇسىندىرەدى.

بوقاەۆتىڭ باقىلاۋىنداعى «BM Trust» جانە «WeCan» جشس-لارىنا قاراجاتتى ءبولۋ ماسەلەسى القالى جيىندا تالقىلاندى دەلىنگەنگەن كاسىپوداق كوميتەتى وتىرىسىنىڭ حاتتاماسى جالعان بولىپ شىقتى. قۇرمانقۇل بۇل قۇجاتقا تەك فورمالدى تۇردە قول قويعانىن مويىندادى. شىن مانىندە، ەشقانداي تالقىلاۋ بولماعان: جابدىقتاۋشى كومپانيالاردى بوقاەۆتىڭ ءوزى تارتىپ، دايىن سمەتالاردى دا ءوزى اكەلىپ وتىرعان. وسىعان بايلانىستى جالعان حاتتامادا قاراجات ءبولۋدى ۇسىنۋشى رەتىندە ونىڭ ەسىمى كورسەتىلگەن.

سۋديا جانات ابەنوۆا قۇرمانقۇلدىڭ تەرگەۋ كەزىندە بەرگەن باستاپقى ايعاقتارىن وقىپ، ءىس-شارا بيۋدجەتىن كىم انىقتاعانىن تىكەلەي سۇرادى. كۋاگەر بوقاەۆتىڭ قارجىلىق ماسەلەلەر بويىنشا ونىمەن دە، كاسىپوداق مۇشەلەرىمەن دە اقىلداسپاعانىن، ال كىمگە جانە قانشا اقشا بەرۋ كەرەكتىگى بويىنشا شەشىمدى جەكە-دارا ءوزى قابىلداعانىن راستادى. تاۋەلسىز جابدىقتاۋشىلاردى ىزدەۋمەن ەشكىم اينالىسپاعان: كەڭەسشى وزىنە قاجەتتى كومپانيالاردى جاي عانا جوباعا تارتقان. قۇرمانقۇل بوقاەۆتىڭ «جوعارى باسشىلىقتىڭ» قاتارىنا كىرگەنىن جانە بارلىق اقپاراتتىق ناۋقاندار تەك ونىمەن كەلىسىلگەنىن اتاپ ءوتتى.

بۇل ايعاقتاردان بوقاەۆ بارلىق پروتسەستى ءوز قولىنا شوعىرلاندىرىپ، جالعان كەلىسىمشارتتاردى ءوزى جاساقتاعانىن، بيۋدجەتتى ءوزى بەلگىلەگەنىن جانە قارجىلاندىرۋدى وزىنە باعىنىشتى كومپانيالار ارقىلى جۇرگىزگەنىن اڭعارۋعا بولادى. مەملەكەتتىك ايىپتاۋ تاراپىنىڭ مالىمدەۋىنشە، مۇنىڭ ماقساتى كاسىپوداق قاراجاتىن شىعارىپ، كەيىن ونى ءوزىنىڭ جيھاز بيزنەسى ارقىلى زاڭداستىرۋ بولعان.

جاۋاپ الۋ كەزىندە مەردىگەرلەر تاراپىنان كورسەتىلگەن قىزمەتتەردىڭ شىنايىلىعىنا كۇمان كەلتىرەتىن تاعى ءبىر نازار اۋدارۋعا لايىقتى جايت انىقتالدى. ميلليونداعان تەڭگە جۇمسالعان اۆتوشەرۋدىڭ قورىتىندىسى بويىنشا قانداي دا ءبىر دەرەكتى فيلم ءتۇسىرىلدى مە دەگەن سۇراققا بۇرىنعى ءباسپاسوز قىزمەتىنىڭ جەتەكشىسى قىسقا عانا: «ايتا المايمىن»، – دەپ ءۇن قاتتى.

قۇرمانقۇلدىڭ ايعاقتارى قورعاۋ تاراپىنا ايتارلىقتاي سوققى بولعانىن تۇسىنگەن بوقاەۆتىڭ ادۆوكاتتارى پروتسەستى سوزۋ تاكتيكاسىنا كەزەكتى رەت جۇگىندى. ولار كاسىپوداق كوميتەتىنىڭ جينالىسى وتكەن-وتپەگەنى تۋرالى ساۋالدى قايتا-قايتا قويىپ، كۋاگەردى شاتاستىرۋعا تىرىستى. پروكۋرور قايتالاناتىن سۇراقتار ءۇشىن قورعاۋ تاراپىنا ەسكەرتۋ جاساۋعا ءماجبۇر بولدى. ال سۋديا ادۆوكاتتاردان اڭگىمەنى باسقا ارناعا بۇرۋدى توقتاتىپ، اۆتوشەرۋ تاقىرىبىنا قايتا ورالۋدى تالاپ ەتتى.

وسىلايشا، قۇرمانقۇلدىڭ ايعاقتارى، كاسىپوداقتىڭ بۇرىنعى ءتورايىمى ماحانوۆا مەن «قازترانسگازدىڭ» بۇرىنعى باس ديرەكتورى سۇلەيمانوۆتىڭ جاۋاپتارى بوقاەۆتىڭ «قازترانسگازدا» الاياقتىق سحەمانى قالاي جۇزەگە اسىرعانىن كورسەتەتىن دايەكتى دالەلدەر جيىنتىعىن قالىپتاستىرىپ وتىر.

Abai.kz